ظاہرہ شیخ کو بار بار بیان بدلنے پر ایک سال قید اور پچاس ہزار روپے جرمانے کی سزا دی گئی تھی

بیسٹ بیکری کیس ظاہرہ کو سزا

ظاہرہ شیخ نے عدالت سے درخواست کی تھی کہ وہ غریب ہیں اور وہ اس حالت میں نہیں ہيں کہ وہ جرمانے کی رقم ادا کر سکیں ہے۔

اپنی درخواست میں انہوں نے یہ بھی کہا تھا کہ چوں کہ وہ اپنے بیانات سے بدلنے کے لیے ایک سال کی سخت سزا کاٹ چکی ہیں لہذا انہیں جرمانہ ادا کرنے کی جو سزا دی گئی تھی اس پر نظرِثانی کی جائے۔

گزشتہ برس سپریم کورٹ کے ایک بینچ نے ظاہرہ شیخ کو بار بار اپنے بیان بدلنے کے سبب ایک سال کی قید اور پچاس ہزار روپے کی سزا سنائی تھی۔ اپنے فیصلے میں عدالت نے کہا تھا کہ اگر ظاہرہ جرمانے کی رقم ادا نہیں کرتی ہیں تو انہیں ایک سال کی مزید سزا کاٹنی پڑے گی۔

2002 میں گجرات میں فسادات کے دوران ہنومان ٹیکری پر واقع بیسٹ بیکری میں ظاہرہ کے گھر کے لوگ کچھ ملازمین اور اطراف کے لوگ پناہ لیے ہوئے تھے۔ شر پسندوں نے پیٹرول بم سے بیکری کو جلا دیا تھا جس میں چودہ افراد جل کر ہلاک ہو گئے تھے۔ ظاہرہ نے پولیس کی فرسٹ انفارمیشن رپورٹ میں ملزمان کو پہچان کر ان کے نام لکھوائے تھے لیکن فاسٹ ٹریک عدالت میں سماعت کے دوران منحرف ہوگئیں۔

ظاہرہ شیخ کو سزا کیوں ہوئی؟  ظاہرہ شیخ کو بار بار اپنے بیان بدلنے کے سبب ایک سال کی قید اور پچاس ہزار روپے کی سزا سنائی تھی۔ اپنے فیصلے میں عدالت نے کہا تھا کہ اگر ظاہرہ جرمانے کی رقم ادانہیں کرتی ہیں تو انہیں ایک سال کی مزید سزا کاٹنی پڑے گی

اس کے بعد سپریم کورٹ نے پہلی مرتبہ کسی ریاست کا کیس دوسری ریاست میں چلانے کا حکم جاری کیا۔ اس حکم کے بعد یہ مقدمہ گجرات سے مہاراشٹر منتقل کردیا گیا۔ مہاراشٹر کے شہر ممبئی کی عدالت کے سامنے ظاہرہ پھر مکر گئیں اور انہوں نے تیستا پر سیتلواد پر الزامات کی بوچھاڑ کر دی۔

سپریم کورٹ کی اعلیٰ اختیاراتی کمیٹی نے تفتیش شروع کی اور پھر اس کمیٹی کی تفتیش کے بعد عدالت نے ظاہرہ کو سزا سنائی۔

دلچسپ بات یہ ہے کہ گجرات فسادات کے پانچ برس ہو چکے ہیں۔ اس ہندو مسلمان فسادات میں دو ہزار سے زائد افراد ہلاک ہوئے تھے جس میں بیشتر مسلمان تھے۔

اب تک فسادات کے ملزمان کو کوئی سزا نہیں ملی ہے جب کہ گجرات فسادات میں حکومت کی مبینہ جانب دارانہ کارروائی پر ملک اور بیرونِ ملک نکتہ چینی کی گئی اور بعض اعتدال پسند ہندو سماجی کارکنوں کے ساتھ ساتھ انسانی حقوق کے اداروں نے ریاستی حکومت پر ان فسادات میں مسلمانوں کی جان و مال کی حفاظت کے لیے خاطر خواہ اقدام نہ اٹھانے کا الزام عائد کیا ہے۔