ریحانہ بستی والا بی بی سی اردو ڈاٹ کام، ممبئی

	ظاہرہ شیخ بیسٹ بیکری مقدمے کی چشم دید گواہ ہیں

اس سے قبل مارچ میں انڈیا کی عدالت عالیہ ظاہرہ شیخ کو توہین عدالت کا مرتکب قرار دیتے ہوئے ایک سال کی سزا سنا چکی ہے۔ وہ اس وقت ممبئی کی بائیکلہ جیل میں سزا کاٹ رہی ہیں۔

پیر کے روز عدالت میں ظاہرہ کی والدہ سحرالنساء نے یہی کہا کہ انہیں کچھ نہیں معلوم۔ تاہم جج نے سحرالنساء کو جھوٹ بولنے کا مرتکب قرار دیا۔

بیسٹ بیکری ہلاکتیں گجرات میں سن دو ہزار دو میں فرقہ وارانہ فسادات کے دوران ہنومان ٹیکری پر واقع بیسٹ بیکری میں مسلمانوں نے پناہ لی تھی۔ لیکن اسے ہندوؤں کے ایک ہجوم نے جلا دیا تھا اس آگ میں جھلس کر چودہ افراد ہلاک ہو گئے تھے۔

ظاہرہ اس معاملے کی چشم دید گواہ تھیں۔ پولیس کے مطابق ظاہرہ نے فسادیوں کے خلاف ایف آئی آر درج کرائی تھی۔ جس کے بعد گجرات کی فاسٹ ٹریک عدالت میں مقدمہ چلایا گیا تھا جس میں ظاہرہ نے فسادیوں کو پہچاننے سے انکار کر دیا تھا۔ بعد میں انہوں نے سماجی کارکن تیستا سیتلواد سے کہا تھا کہ انہیں جان سے مارنے کی دھمکیاں ملی تھیں اس لیئے انہوں نے عدالت میں جھوٹ بولا تھا۔

	ظاہرہ کے مطابق انہیں جان سے مارنے کی دھمکیاں ملی تھیں اس لیئے انہوں نے عدالت میں جھوٹ بولا

لیکن عدالت میں ظاہرہ ایک بار پھر اپنے بیان سے پلٹ گئيں اور کہا کہ انہوں نے پہلے جو بیان دیا تھا وہ صحیح ہے۔ اصلیت جاننے کے لیئے سپریم کورٹ نے ایک کمیٹی تشکیل دی جس نے ظاہرہ کو جھوٹا قرار دیا۔

عدالت نے ظاہرہ کو توہین عدالت کا قصوروار قرار دیا اور ایک سال قید کی سزا کے ساتھ پچاس ہزار روپے جرمانہ کی سزا سنائی۔ اس وقت ظاہرہ جیل میں ہیں اور اب ان کی ماں بھی اسی جیل میں تین ماہ کی سزا کاٹیں گی۔

فی الحال عدالت کے حکم کے بعد ظاہرہ کے تمام بینک کھاتے منجمد کر دیئے گئے ہیں اور انکم ٹیکس کا ادارہ اس بات کی تفتیش کر رہا ہے کہ ان کے پاس یہ دولت کہاں سے آئی۔