خدیجہ عارف دلی

	دنیا میں سونے کا سب سے زیادہ استعمال ہندوستان میں ہوتا ہے

صرافہ ماہرین کا خیال ہے ڈالر کی کمزوری، عالمی سطح پر سونے کی پیداوار میں کمی اور سونے کی مانگ میں اضافہ قیمتوں میں تیزی کا سبب بنا ہے۔ صرافہ بازار کے تجزیہ کار آنند راٹھی کاخیال ہے کہ’ آجکل سونے میں سپیکیولٹیو یعنی قیاس پر مبنی ٹریڈنگ ہورہی ہے۔ سونے پر سٹہ بہت تیزی سے چل رہا ہے اور لوگ سونے پر سٹہ لگا کر پیسہ کما رہے ہیں۔‘

اقتصادیات کےماہرین کا یہ بھی خیال عالمی سطح پر اقتصادی سست روی کے اندیشےسے لوگ سونے میں پیسہ لگا رہے ہیں کیونکہ سونے میں پیسہ لگانا عام طور پر ایک محفوظ سرمایہ کاری تصور کیا جاتا ہے۔

پوری دنیا میں سونے کا سب سے زیادہ استمعال ہندوستان میں ہوتا ہے جہاں ہر برس 800 ٹن سونےکی خرید ہوتی ہے۔ ہندوستان میں شادی بیاہ اور بعض تہواروں کے مواقع پر اس کی خریداری سب سے زیادہ ہوتی ہے۔

قیمت میں تیزی سے سونے کی مانگ میں کمی آئی ہے جو لوگ اپنی بیٹی کی شادی کے لیئے دس تولہ سونا خرید سکتے تھے اب آٹھ تولہ ہی خرید رہے ہیں اور لوگوں نے شوقیہ طور پر سونا خریدنا کم کر دیا ہے۔ پی پی جویلر کے مالک ونود گپتا

دلی میں سونے کے بڑے تاجر اور پی پی جویلر کے مالک ونود گپتا کا کہنا ہے کہ سونے کی مہنگائی سے خریداری میں ان دنوں 20 سے 25 فی صد کی کمی آئی ہے اور عام لوگوں پر اس کا اثر صاف دکھتا ہے۔ ان کا خیال ہے کہ ’سونے کی مانگ میں کمی آئی ہے جو لوگ اپنی بیٹی کی شادی کے لیئے دس تولہ سونا خرید سکتے تھے اب آٹھ تولہ ہی خرید رہے ہیں اور لوگوں نے شوقیہ طور پر سونا خریدنا کم کر دیا ہے۔‘

عالمی سطح پر سونے کی پیداوار کم ہونے کے سبب دوسرے ممالک میں بھی سرمایہ کاری کے طور پر سونے کی خرید وفروخت میں اضافہ ہوا ہے۔

اقتصادیات کے ماہر آلوک پرانک کا کہنا ہے کہ آنے والے دنوں میں سونے کے قیمتیں مزید بڑھ سکتی ہیں۔ ان کا خیال ہے کہ ’سونا ایک ایسا دھات ہے جس کی مقدار ہمیشہ محدود رہے گی اور جیسے جیسے اس کی مانگ بڑھے گی ویسے ویسے اس کی قیمتوں میں بھی اضافہ ہوگا۔ اس لیئے جن لوگوں کو مستقبل میں سونا چاہیئے وہ ابھی سونا خرید لیں۔‘

فی الوقت سونے کی قیمتیں بڑھ گئی ہیں لیکن اس کی خرید میں کمی آئی ہے اور صرافہ بازار کے تجزیہ کار کہتے ہیں کہ اگر یہی حال رہا تو سونا عام آدمی کی دسترس سے باہر ہو جائے گا اور تجارت کے لیئے سونے میں سرمایہ کاری کا رحجان شروع ہوگا جس سے صرف تاجر اور مالدار طبقہ ہی فائدہ اٹھا سکے گا۔