شکیل اختر بی بی سی اردو ڈاٹ کام، دلی

	نیپال کے لیئے انڈیا کے خصوصی ایلچی کرن سنگھ

شاہ نے جو اعلان کیا انڈیا نے اس کا خیر مقدم کیا لیکن نیپال کی سیاسی جماعتوں نے اسے قطعی طور پر مسترد کر دیا۔ انڈیا نے ایک دن بعد ایک اور بیان جاری کیا جس میں کہا گیا کہ جمہوریت کے لیئے وہ نیپال کے عوام کے ساتھ ہے لیکن وہ بادشاہ کی بھی حمایت کرتا ہے۔ نیپال کے ذرائع ابلاغ نے انڈیا کی پوزیشن کو’ کنفیوزڈ‘ قرار دیا ہے۔

نیپالیوں کی ناراضگی
نیپالی عوام ان دنوں انڈیا سے سخت برہم ہیں۔ وہ اس بات سے خاص طور پر ناراض ہیں کہ انڈیا نے کرن سنگھ کو خصوصی ایلچی بنا کر بھیجا جو راجہ کے قریب سمجھے جاتے ہیں۔

	نیپال کے مشتعل عوام اور پولیس

بعد میں شاہ کے خطاب کا خیر مقدم کرنے سے لوگوں کی ناراضگی اور بھی بڑھ گئی ہے۔ لوگوں کا کہنا ہے کہ وہ نیپال کو’بھوٹان نہیں بننے دیں گے‘۔ لوگوں کی خاصی تعداد انڈیا کو’سامراجوادی‘ سمجھتی ہے۔

ایم ایف حسین نہیں آئے
پچھلے دنوں ممبئی میں معروف مصور ایم ایف حسین کی زندگی پر ایک ڈرامہ ’حسین کی کہانی حسین کی زبانی‘ کا افتتاحی شو ہوا۔ اداکار ششانت سنگھ اس ڈرامے میں ایم ایف حسین کا کردار ادا کر رہے ہیں۔ اس شو میں حسین کے بیٹے، بیٹی اور نواسی نے شرکت کی لیکن وہ خود نہیں آ سکے۔

	مشہور انڈین مصور مقبول فدا حسین

ششانت کا کہنا ہے کہ وہ بعض ہندو تنظیموں کی دھمکیوں کے پیش نظر اس تقریب میں شریک نہیں ہوئے۔ ان ننظیموں نے ہندو دیوی دیوتاؤں کی برہنہ تصویریں بنانے پر ایم ایف حسین کی انگلیاں کاٹنے والے کو لاکھوں روپے انعام دینے کا اعلان کر رکھا ہے۔

دلّی نمبر ون
انڈیا میں ویسے تو اقتصادی ترقی تیزی سے بڑھ رہی ہے لیکن ایک جائزہ کے مطابق دارالحکومت دلّی روزگار کے مواقع پیدا کرنے میں پہلی پوزیشن پر ہے۔ یوں تو دلّی سیاسی سرگرمیوں کے سبب جانی جاتی ہے لیکن کال سنٹرز اور آئی ٹی انڈسٹری سے تعلق رکھنے والے دوسرے شعبوں میں یہ شہر تیزی سے آگے بڑھ رہا ہے۔

	دہلی کا انڈیا گیٹ

چیمبرز ایسوکیم کی ’ آئیکو پلس سٹڈی‘ کے مطابق سال دو ہزار چھ کے ابتدائی دو مہینوں میں دلّی کے آجروں نے اعلٰی سطحی نوکری کے لیئے1495 اشتہارات شائع کرائے جبکہ ممبئی میں یہ تعداد 1344 رہی۔ بنگلور شہر اس دوڑ میں تیسرے نمبر پر رہا۔گزشتہ برس پہلی پوزیشن ممبئی کے حصے میں آئی تھی۔

اس جائزے کے مطابق گریجوئیٹ اور انڈر گریجوئیٹ طلبہ کی نوکری کے لیئے مواقع پیدا کرنے میں انفارمیشن ٹیکنالوجی کا شعبہ ہی سب سے اوپر ہے جبکہ دوسرے نمبر پر’سیلز اور مارکیٹنگ‘ کا شعبہ ہے۔ تحقیق کے مطابق’انجینئرنگ‘ کو تیسرا مقام حاصل ہوا ہے اور اس شعبہ میں نوکری کی 1050 خالی جگہوں کے لیئے اشتہارات شائع کئے گئے ہیں۔مالیات کے شعبہ کو چوتھا مقام حاصل ہوا ہے اور ممبئی میں اس شعبے سے متعلق سب سے زیادہ 220 خالی جگہوں کے لیئے اشتہارات شائع کئے گئے ہیں۔