جوڈ اور جرمی نے افغانستان کے مشرقی صوبوں کا دورہ بھی کیا

اس دورے کے دوران جوڈ لاء نے برطانوی فلم ساز جرمی گِیلی کے ساتھ عام افغانی شہریوں پر ایک ڈاکومنٹری کی فلم بندی کے لیے افغانستان کے مشرقی حصے میں واقع پرُ خطر علاقوں کا سفر بھی کیا۔

جوڈ لاء نے بی بی سی کو بتایا:’ سفر کے دوران ہمیں لوگوں کی جانب سے ناقابل یقین حد تک مثبت ردِعمل ملا۔ افغانستان کے بارے میں میرا مجموعی تاثر یہ ہے کہ یہاں امید اب بھی زندہ ہے‘۔

جرمی گِیلی کی جانب سے ایک مہم کے آغاز کے بعد اقوام متحدہ نے 2001 میں رائے شماری کے بعد متفقہ طور پر ’یوم امن‘ کی منظوری دی تھی۔ اس مقصد کے لیے اقوام متحدہ کی جنرل اسمبلی میں لابنگ کے لیے 1999 میں جرمی کی ایک ڈاکو منٹری’ پیس ون ڈے‘ کو استعمال کیا گیا۔

	جوڈ نے افغان بچوں اور کمیونٹی رہنماؤں کے انٹرویوز کیے

جرمی گِیلی اور جوڈ لاء نے گزشتہ ہفتہ افغانستان میں گزارا جہاں انہوں نے ’یومِ امن‘ سے متعلق اپنی دوسری ڈاکو منٹری کی فلم بندی کی۔ کابل کے علاوہ وہ ملک کے مشرقی صوبوں لغمان اور ننگرہار بھی گئے۔ سکیورٹی کی وجوہات کی وجہ سے ان کا دورہ خفیہ رکھا گیا۔

جرمی گِیلی نے بی بی سی کو بتایا کہ انہیں توقع ہے کہ اس سال ’یوم امن‘ زندگی بچانے والی سرگرمیوں کے لیے جانا جائے گا جیسے کہ ویکسینیشن، امدادی اشیاء کی فراہمی اور جنگ میں وقفہ۔

ان کا کہنا تھا:’اگر ہم جنگ سے امن کی جانب جانا چاہتے ہیں تو ہم میں سے ہر ایک شخص کو امن کے عمل میں اپنا حصہ ڈالنے کا عہد کرنا ہو گا‘۔

جوڈ لاء نے جو یومِ امن کے سفیر ہیں، بی بی سی کو بتایا کہ انہیں یقین ہے کہ اگر افغانستان کی طرف سے امن کا پیغام آیا تو وہ کہیں زیادہ موثر ہو گا۔

توقع ہے کہ اس ڈاکو منٹری کا پریمیئر اگلے سال افغانستان میں کیا جائے گا۔