ڈی نیرو اور الپچینو نے فلم ’ہیٹ‘ کے دو سین میں ایک ساتھ کام کیا تھا

اخبار ’ورائٹی‘ کا کہنا ہے کہ جرائم کی دنیا کے کرداروں پر مبنی فلم ’رائٹیئس کِل‘ نامی فلم میں دونوں اداکار کسی سیریل کلر کی تلاش میں سرگرداں پولیس سراغ رسانوں کا کردار کریں گے۔

فلم کے پروڈیوسر رینڈل ایمٹ کا کہنا ہے کہ فلم دونوں اداکاروں کے گرد گھومتی ہے جو ایک دوسرے کے دوست ہیں۔

1995 میں ریلیز ہونے والی فلم ’ہیٹ‘ کے برعکس اس فلم میں یہ دونوں اداکار ایک ساتھ ایک ہی تسلسل میں دکھائی دیں گے۔ فلم ’ہیٹ‘ میں دونوں ایک ساتھ محض دو مناظر میں ہی نظر آئے تھے جبکہ 1974 میں ’دی گاڈ فادر پارٹ ٹو‘ میں فلم کے پردے پر دونوں کا کبھی آمنا سامنا نہیں ہوا۔

کانز فلم فیسٹیول میں فلم کی جزیات پر روشنی ڈالتے ہوئے اس فلم کے معاون پروڈیوسر ایوی لرنر کا کہنا تھا کہ یہ فلمی تاریخ کا ایک اہم واقعہ ہے۔ فلم
’ہیٹ‘ میں دونوں نے محض دو سین ہی ایک ساتھ کیے تھے مگر اس فلم میں وہ پوری فلم میں ایک ساتھ اپنے اپنے کردار ادا کرتے نظر آئیں گے۔

اطلاعات کے مطابق فلم ’رائٹیئس کِل‘ کا بجٹ ساٹھ ملین ڈالر کے قریب ہے اور فلم کی کہانی رسل گیوارٹز لکھ رہے ہیں جنہوں نے گزشتہ سال کی مقبول فلم ’انسائڈ مین‘ کی کہانی لکھی تھی۔

اس فلم کے بقیہ کرداروں کے لیے اداکاروں کا انتخاب کیا جانا ابھی باقی ہے۔