ፊሊፒንስ: ብሓያል ህቦብላ ተወቒዓ

"ጎኒ" ዝበሃል ዝናብ ዝሓወሰ ሓያል ህቦብላ: ንፊሊፒንስ ኣዕርዩ ሃስዩዋ ኣሎ።

እዚ ህቦብላ: 225 ኪሜ ብሰዓት እናተሓምበበ: ብሓያል ንፋስን ዝናብን ኣብ'ታ ዓዲ ከቢድ ዕንወት የውርድ ኣሎ።

በቲ ሓደጋ፡ ዛጊድ ብውሕዱ ኣርባዕተ ሰባት ከምዝሞቱ ተገሊፁ'ሎ።

መንበሪ ኣባይቲ ዓንዮምን መገድታት ድማ ብማይ ኣዕለቕሊቖም ኣለዉ።

ፊሊፒንስ: ድሕሪ'ቲ ኣብ 2013 ዘጋጠማን 6000 ሰባት ዝቐተለን ህቦብላ 'ሄይያን' ከም'ዚ ዝኣምሰለ ከቢድ ህቦብላ ሪኣ ኣይትፈልጥን።

ብፍላይ ኸኣ: ድሕሪ'ቲ ህቦብላ ርክብ ብምቁራፁ ድሃያ ክርከብ ኣብ ዘይተኽኣለት ኣስታት 70 ሽሕ ህዝቢ ዝነብረላ ከተማ ቪራክ: ሓያል ዕንወት ወሪዱ ከይኸውን ስግኣት ኣሎ።ካብ መንጎ እቶም ዝሞቱ ኣርባዕተ ሰባት: ወዲ ሓሙሽተ ዓመት ህፃን ይርከቦም።

እቶም ክልተ ኣብ ማይ ድሕሪ ምጥሓሎም እዮም ሞይቶም።

እቲ ሓደ ድማ: ብውሕጅ ተወሲዱ ህይወቱ ዝሓለፈ ክኸውን ከሎ: እቲ ራብዓይ ብሰንኪ እቲ ህቦብላ ብዝወደቐ ኦም እዩ ተቐቲሉ።