జూడోలో మగాళ్లను పల్టీలు కొట్టిస్తున్న మహిళా కోచ్
- రచయిత, అన్నా జీన్ కైసర్
- హోదా, బీబీసీ ప్రతినిధి
30 ఏళ్ల క్రితం జపాన్లో మొదటిసారి జూడో ప్రాక్టీస్ కోసం వెళ్లినపుడు యూకో ఫ్యూజీని ఓ చిన్న పిల్లాడు కింద పడేసాడు. మరెప్పుడూ మార్షల్ ఆర్ట్స్కు వెళ్లకూడదని ఆ రోజు ఆమె నిర్ణయించుకున్నారు.
అలాంటి ఫ్యూజీ ఇవాళ బ్రెజిల్ పురుషుల జూడో టీమ్కు మొదటి మహిళా ప్రధాన కోచ్.
పురుషాధిక్య క్రీడా ప్రపంచంలో, బలిష్టంగా ఉండే బ్రెజిల్ పురుషుల జూడో జట్టుకు ఒక మహిళ ప్రధాన కోచ్గా పని చేయడమన్నది ఊహించుకోలేము.
ప్రొఫెషనల్ క్రీడల్లో సాధారణంగా మహిళల టీమ్లకు కూడా పురుషులే కోచ్లుగా ఉండడం గమనించొచ్చు.
నిజానికి బ్రెజిల్లో మహిళలు క్రీడల విషయంలో చాలా వివక్షను ఎదుర్కొంటారు.
ఫుట్బాల్కు బాగా పేరొందిన బ్రెజిల్లో మహిళా క్రీడాకారులకు పెద్దగా ప్రోత్సాహం లేదు. ఆ దేశంలో ప్రముఖ ఫుట్బాల్ క్రీడాకారిణి మార్తా వైరా డా సిల్వాను చాలా తక్కువ మంది గుర్తు పడతారు.
బ్రెజిల్ జాతీయ మహిళా ఫుట్బాల్ టీమ్కు కోచ్గా పని చేసిన ఒక్కగానొక్క మహిళా కోచ్ను ఏడాదిలోపే తొలగించారు. అలాంటిది ఫ్యూజీ నియామకం చాలా సంచలనంగా మారింది.
ఫ్యూజీ గురించి జూడో సమాఖ్య ప్రతినిధి విల్సన్ మాట్లాడుతూ.. ''మహిళలకు క్రీడల్లో లభిస్తున్న గుర్తింపుకు ఫ్యూజీ ఒక మంచి ఉదాహరణ. అదీ మహిళలు అత్యంత తక్కువగా పాల్గొనే జూడోలో ఫ్యూజీ ఈ స్థాయికి చేరుకోవడం చాలా విశేషం'' అన్నారు.
ఒక్కొక్క జూడో క్రీడాకారుడి బలాలు, బలహీనతల ఆధారంగా ఫ్యూజీ శిక్షణ ఉంటుంది.
''నేనెన్నడూ ఈ క్రీడను స్త్రీ-పురుషుల మధ్య పోటీగా చూడలేదు'' అని ఆమె అన్నారు.
ఆమె కింద శిక్షణ పొందుతున్న వారిలో జెఫర్సన్ సాంటోస్ ఒకరు. సాంటోస్ 73 కిలోల విభాగంలో పోటీ పడుతున్నారు.
క్రీడాకారుల విషయంలో ఆమె అత్యంత శ్రద్ధ వహిస్తారని, ఒక కోచ్గా ఆమె ప్రజ్ఞాపాటవాలు అసాధారణమని సాంటోస్ తెలిపారు. ఆమె తమ ప్రధాన కోచ్గా వస్తోందని తెలిసినపుడు తాము థ్రిల్ అయ్యామని అన్నారు.
మీ ప్రత్యర్థి బలహీనతలు తెలుసుకోండి
ఇటీవల ఫ్యూజీ రియో ఒలంపిక్ పార్క్లో బ్రెజిల్ నలుమూలల నుంచి వచ్చిన యువ జూడోకాలకు శిక్షణా శిబిరం నిర్వహించారు. దానిలో పాల్గొన్న అభ్యర్థులందరినీ పల్టీ కొట్టించి, మ్యాట్పై పడేశారు.
''నీ ప్రత్యర్థి చేతులలోని ఏ భాగం బలహీనంగా ఉందో గుర్తించాలి. అక్కడ పట్టు పట్టి, వాళ్లపై ఆధిక్యత సాధించాలి'' అని ఆమె సూచించారు.
బాల్యంలో ఎన్నడూ మళ్లీ జూడోకు వెళ్లకూడదు అనుకున్న ఫ్యూజీ తల్లి బలవంతం మీద శిక్షణ కొనసాగించకుంటే తను ఈ రోజు ఇంత ఉన్నత స్థాయికి చేరగలిగేవారు కాదు.
నిజానికి ఇంగ్లీష్ నేర్చుకోవడానికి తాను విదేశాలకు ఎలా వెళ్లాలా అని ఆలోచిస్తున్నపుడు ఆమెకు ఈ కోచింగ్ ఆలోచన వచ్చింది. తన జూడో నైపుణ్యాలతో ఆమె మొదట బ్రిటన్లోని యూనివర్సిటీ ఆఫ్ బాత్లో అవకాశం సంపాదించారు.
ఫొటో సోర్స్, Getty Images
మొదట్లో కోచింగ్ ఇవ్వడం ఆమెకు చాలా కష్టంగా ఉండేది. జూడో పట్టులో ఉన్న వ్యూహాల గురించి పిల్లలు ప్రశ్నించినపుడు ఆమె సరిగా వివరించలేకపోయేవారు.
వారి ప్రశ్నలతో ఆమె ఆ క్రీడను మరింత సాంకేతికంగా, లోతుగా పరిశీలించారు. నాటి నుంచి జూడో కోచింగ్ ఆమెకు ఇష్టమైన పనిగా మారిపోయింది.
2012 ఒలంపిక్స్లో బ్రిటన్ టీమ్కు కోచింగ్ ఇచ్చాక ఆమె దృష్టి బ్రెజిల్ టీమ్ మీద పడింది. ఆమెను పురుషులు, మహిళల టీమ్లు రెండింటికీ అసిస్టెంట్ టెక్నికల్ కోచ్గా బ్రెజిల్ నియమించుకుంది. అప్పుడే ఆమె రియో ఒలంపిక్స్లో స్వర్ణపతకం సాధించిన రాఫెలా సిల్వాకు శిక్షణ ఇచ్చారు.
అయితే పురుషుల ప్రధాన కోచ్గా నియమించినపుడు తాను ఆ బాధ్యతను సరిగా నిర్వర్తించగలనా అని ఆమె సందేహించారు.
''నేను మొదట ఒక్కో అథ్లెట్కు విడివిడిగా శిక్షణ ఇవ్వడం ప్రారంభించాను. శిక్షణలో నేను అన్ని వివరాలు తెలుసుకుని, వారికున్న నైపుణ్యాలకు మెరుగుదిద్దడం మొదలుపెట్టాను. అలా క్రమక్రమంగా నాకు వాళ్ల మీద, వాళ్లకు నా మీద నమ్మకం కుదిరింది'' అని వివరించారు.
మగవాళ్లైనా, ఆడవాళ్లైనా.. నైపుణ్యం ఉంటే వాళ్లకు అవకాశం లభించి తీరాలని అంటారామె.
ప్రధాన కోచ్గా ఎంపికైన తర్వాత ఫ్యూజీకి దేశంలోని మహిళా క్రీడాకారుల నుంచి పెద్ద ఎత్తున మద్దతు లభించింది. అప్పుడు కానీ తాను సాధించిన విజయం ఎంత పెద్దదో, క్రీడల్లో మహిళలకు ఎంత తక్కువ ప్రాధాన్యత ఉందో ఆమెకు అర్థం కాలేదు.
''పురుషాధిక్యత ఉన్న బ్రెజిల్ క్రీడారంగంలో ఒక మహిళ పురుషుల జూడో టీమ్కు ప్రధాన కోచ్గా మారడమన్నది పరిస్థితులు మారుతున్నాయనడానికి సూచన. భవిష్యత్తులో మరింత ఎక్కువ మంది మహిళలకు ఇలాంటి అవకాశాలు రావచ్చు'' అని ఆమె అన్నారు.
ఇవి కూడా చదవండి:
(బీబీసీ తెలుగును ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)
