బెట్టింగ్ యాప్స్: ప్రకాశ్‌ రాజ్, విజయ్ దేవరకొండ, రానా, మంచు లక్ష్మీ, నిధి అగర్వాల్‌‌లపై కేసులు

బెట్టింగ్ యాప్స్‌ను ప్రమోట్ చేస్తున్నారనే ఆరోపణలతో పలువురు సినీ ప్రముఖులపై మియాపూర్ పోలీసులు కేసు నమోదు చేశారు. రానా దగ్గుబాటి, ప్రకాష్ రాజ్, విజయ్ దేవరకొండ, మంచు లక్ష్మి, ప్రణీత, నిధి అగర్వాల్ పై కేసు పెట్టారు పోలీసులు.

వీరితోపాటు నటులు, సోషల్ మీడియా ఇన్‌ఫ్లూయెన్సర్లుగా పేరున్న అనన్య నాగళ్ల, సిరి హనుమంతు, శ్రీముఖి, వర్షిణి, వాసంతి కృష్ణన్, శోభా శెట్టి, అమృత చౌదరి, నయని పావని, నేహా పఠాన్, పాండు, పద్మావతి, ఇమ్రాన్ ఖాన్, విష్ణు ప్రియ, హర్షసాయి, బయ్యా సన్నీ యాదవ్, శ్యామల, టెస్టీ తేజ, రితూచౌదరి, బండారు శేషయాని సుప్రీతపైనా మియాపూర్ పోలీసులు కేసులు పెట్టారు.

ఇప్పటికే వీరిలో కొందరిపై పంజాగుట్ట పోలీసులు కేసు నమోదు చేశారు.

బెట్టింగ్ యాప్స్‌ ప్రమోషన్స్‌తో ప్రజలను బెట్టింగ్ ఊబిలో దించుతున్నవారిపై చర్యలు తీసుకోవాలంటూ వినయ్ అనే వ్యక్తి మార్చి 17న పంజాగుట్ట పోలీసులకు ఫిర్యాదు చేశారు.

తమపై కేసు నమోదు కావడంపై వీరిలో కొందరు ఇప్పటికే సోషల్ మీడియాలో స్పందించారు.

మరోవైపు సీనియర్ ఐపీఎస్ అధికారి వీసీ సజ్జనార్ పిలుపు మేరకు సోషల్ మీడియాలో #SayNoToBettingApps హ్యాష్ టాగ్ ట్రెండ్ అవుతోంది.

ఏమిటీ బెట్టింగ్ యాప్స్?

క్రికెట్, ఫుట్‌బాల్, టెన్నిస్, రమ్మీ, క్యాసినో, పోకర్ వంటి గేమ్స్‌‌లో డబ్బులు పెట్టి ఆడేందుకు వీలుగా బెట్టింగ్ యాప్స్‌ను తయారు చేస్తున్నట్లుగా పోలీసులు గుర్తించారు.

ముఖ్యంగా ఐపీఎల్ సీజన్లలో బెట్టింగ్ యాప్స్ ఎక్కువగా జనాల్లోకి వస్తాయని పోలీసులు చెప్పారు.

ఈ యాప్‌లవల్ల ఎంతో మంది డబ్బు పోగొట్టుకుని జీవితాలు నాశనం చేసుకుంటున్నారని, కుటుంబాలు ఛిన్నాభిన్నమవుతున్నాయని ఐపీఎస్ అధికారి సజ్జనార్ బీబీసీతో అన్నారు.

బెట్టింగ్ యాప్‌ల మాయలోపడి, అప్పులపాలై, వాటిని తీర్చలేక ఆత్మహత్య చేసుకునే వారి వార్తలు మీడియాలో కనిపిస్తూనే ఉన్నాయి.

ఎలా పనిచేస్తాయి?

బెట్టింగ్ యాప్స్ వివిధ రూపాల్లో పనిచేస్తుంటాయని తెలంగాణ పోలీసు అధికారి ఒకరు బీబీసీకి చెప్పారు.

ఫేక్ గేమ్స్

ఇందులో ముందుగానే ఆటను యాప్‌లో ప్రోగ్రామ్ చేస్తారు. నమ్మకం కలిగించేందుకు చిన్న మొత్తాలతో ఆటలు ఆడించి లాభాలు వచ్చేలా చేస్తారు. తరువాత ఒకేసారి పెద్దమొత్తంలో అంటే వేలు, లక్షలు పెట్టేలా చేసి, అవి పోయేలా చేస్తారు.

బోనస్

బెట్టింగ్ యాప్‌లలో గేమ్ ఆడేందుకు బోనస్ ఇస్తారు. ఆ బోనస్‌తో గేమ్ స్టార్ట్ చేస్తే లాభం వచ్చినట్లుగా చూపించి, మళ్లీ మళ్లీ డిపాజిట్ చేయిస్తారు. తరువాత డిపాజిట్ పోయినట్లుగా చూపిస్తారు.

కౌంటర్ బెట్స్

తప్పుడు సమాచారంతో ఫలానా దానిపై పెడితే లాభం వస్తుందని యూట్యూబర్లు, సోషల్ మీడియా ఇన్‌ఫ్లూయెన్సర్లతో చెప్పిస్తారు. అందులో పెట్టుబడి పెట్టాక డబ్బు పోయిందని చెబుతారు.

ఇవే కాక వ్యక్తిగత వివరాలు, బ్యాంకు ఖాతా వివరాలు సేకరించి ఇతరులకు విక్రయిస్తుంటారని పోలీసులు చెబుతున్నారు.

వాలెట్‌లో డబ్బులు ఉన్నట్లుగా చూపించి పెట్టుబడి పెట్టిస్తారు. కానీ, గేమ్ అయ్యాక డబ్బు తీసుకునేందుకు వీల్లేకుండా చేస్తారు. ఇలాంటి మోసాలకు పాల్పడే బెట్టింగ్ యాప్స్ కు ఏపీ, తెలంగాణకు చెందిన యూట్యూబర్లు ప్రమోషన్ చేస్తున్నారనేది ఆరోపణ.

బెట్టింగ్ యాప్స్ అక్రమంగా ప్రమోట్ చేసే వారిపై కేసులు నమోదు చేస్తామన్నారు హైదరాబాద్ వెస్ట్ జోన్ డీసీపీ విజయ్ కుమార్.

''యువతను తప్పుదోవ పట్టించే విధంగా బెట్టింగ్ యాప్స్‌ను ప్రమోట్ చేస్తే కఠిన చర్యలు తీసుకుంటాం.'' అని చెప్పారాయన. 11 మంది యూట్యూబర్లు, సోషల్ మీడియా ఇన్‌‌ఫ్లూయెన్సర్లపై నమోదైన కేసులో పోలీసులు వారి సోషల్ మీడియా అకౌంట్లను తనిఖీ చేస్తున్నారు. ఆధారాలు సేకరించాక తదనుగుణంగా తదుపరి చర్యలు తీసుకుంటామని డీసీపీ విజయ్ కుమార్ చెప్పారు .

యూట్యూబర్లకు లక్షల్లో చెల్లింపులు!

ఆన్‌లైన్ బెట్టింగ్ యాప్‌ల ప్రమోషన్ కోసం యూట్యూబర్లు, సోషల్‌మీడియా ఇన్‌ఫ్లూయెన్సర్లను ఆయా కంపెనీలు ఎంచుకుంటున్నాయి. ఇందుకోసం లక్షల్లో చెల్లింపులు చేస్తున్నారని ఇన్‌ఫ్లూయెన్సర్లు చెబుతున్నారు.

బెట్టింగ్‌ యాప్‌లను ప్రమోట్ చేయాలని ఏ విధంగా సంప్రదిస్తారో వశిష్ట 360 కంపెనీ సీఈవో వంశీకృష్ణ బీబీసీకి వివరించారు. తనను ఎంతోమంది సంప్రదించినా.. ఎవరికి మద్దతుగా వీడియోలు చేయలేదని స్పష్టం చేశారు.

''మెయిల్, ఫోన్ కాల్స్ ద్వారా సంప్రదిస్తుంటారు. బెట్టింగ్ యాప్ గురించి తాము రూపొందించిన వీడియోలో కనిపించమని అడుగుతారు. కొందరు ప్రమోషన్ ప్లేట్ (పోస్టర్) వేయాలని కోరుతుంటారు. అందుకు రూ.2 లక్షల నుంచి రూ.5 లక్షల వరకు ఇస్తామని ఆశ పెడుతుంటారు.'' అన్నారు వంశీ.

ఎలా ప్రమోట్ చేస్తారంటే..

బెట్టింగ్ యాప్స్ ప్రమోట్ చేసేందుకు నిర్వాహకులు వివిధ పద్ధతులు ఎంపిక చేసుకుంటున్నారని ఓ పోలీసు అధికారి బీబీసీకి చెప్పారు.

ఫేక్ ప్రమోషన్

ఇందులో భాగంగా యూట్యూబర్లు, సోషల్ మీడియా ఇన్‌ఫ్లూయెన్సర్లు డబ్బులు తీసుకుని తమ వీడియోల్లో ప్రమోషన్ చేస్తుంటారు.

సక్సెస్ స్టోరీలు

ఫలానా యాప్‌లో గేమ్ ఆడి డబ్బులు గెలుచుకున్నానంటూ నమ్మిస్తుంటారు. ఆ యాప్ ఎలా డౌన్‌లోడ్ చేసుకోవాలో చెబుతూ గేమ్ ఆడే విధానాన్ని తెలుపుతుంటారు.

లింక్స్ ప్రమోషన్

బెట్టింగ్ యాప్‌కు సంబంధించి లింకులు ఇచ్చి డౌన్‌లోడ్ చేసుకోవాలని ప్రమోట్ చేస్తుంటారు. టెలిగ్రామ్ గ్రూపుల్లో యాప్ లింక్‌ను ఫార్వర్డ్ చేస్తామని, డౌన్‌లోడ్ చేసుకుని గేమ్ ఆడాలని కోరుతుంటారు.

నకిలీ గ్యారెంటీ

లైవ్‌లో ఫేక్ వీడియో లేదా గేమ్ ఆడుతున్నట్లుగా చూపించి, తనతో కలిసి ఆడాలని యాప్ లింక్స్ ఇచ్చి ప్రమోట్ చేస్తుంటారు.

ఇలా ప్రమోషన్స్ చేసే యూట్యూబర్ల మాయలో ఫాలోయర్లు పడకూడదంటున్నారు వీసీ సజ్జనార్.

''బెట్టింగ్ యాప్‌లను ప్రమోట్ చేస్తున్న ఇన్‌ఫ్లూయెన్సర్లను అన్ ఫాలో చేయండి, వారి అకౌంట్లకు రిపోర్టు కొట్టండి.'' అని సూచించారు.

క్షమాపణలు చెబుతూ వీడియోలు

ఇప్పటికే విశాఖపట్నానికి చెంది లోకల్‌బాయ్ నానీ అలియాస్ వాసుపల్లి నానీని ఫిబ్రవరిలో విశాఖపట్నం పోలీసులు అరెస్టు చేశారు.

తక్కువ పెట్టుబడితో ఎక్కువ మొత్తం పొందవచ్చంటూ ఒక వీడియోను రూపొందించి బెట్టింగ్ యాప్ ప్రమోట్ చేశాడనే ఫిర్యాదు అందినట్టు పోలీసులు చెప్పారు.

నానీ చేసిన వీడియోపై సజ్జనార్ సైతం ట్వీట్ చేశారు. దీంతో వెంటనే పోలీసులు అతనిని అరెస్టు చేశారు.

''బెట్టింగ్ కారణంగా ఎంతోమంది జీవితాలు నాశనం అవుతున్నాయి. గతంలో బెట్టింగ్ యాప్ ప్రమోట్ చేసి తప్పు చేశాను. ఇందుకు క్షమాపణలు చెబుతున్నా.'' అని అప్పట్లో చెప్పారు నానీ.

మరోవైపు యూట్యూబర్ హర్షసాయి కూడా స్పందించారు.

''మా ఆడియన్స్, ఫాలోయర్లకు నష్టం కలిగించేది చేయం. రాబోయే రోజుల్లో బెట్టింగ్ యాప్స్ ప్రమోషన్ అసలు చేయం.'' అని చెప్పారు.

''తెలిసో తెలియకో బెట్టింగ్ యాప్స్ ప్రమోట్ చేశాను. అందుకు సారీ. ఎవరైనా ఇన్‌ఫ్లూయెన్సర్లు బెట్టింగ్ యాప్స్ ప్రమోట్ చేస్తుంటే ప్రభావితం కావొద్దు. మోసాల బారిన పడొద్దు.'' అని చెప్పారు మరో యూట్యూబర్ సుప్రీత.

తాను ఏడాది కిందట బెట్టింగ్ యాప్ ప్రమోట్ చేశానని, అది ఇప్పుడు వైరలవుతోందన్నారు నటి రీతూ చౌదరి.

''ఏ బెట్టింగ్ యాప్స్, ప్రమోషన్స్‌ను నమ్మకండి. ఫోన్‌లో బెట్టింగ్ యాప్స్ ఉంటే అన్‌ఇన్‌స్టాల్ చేయండి.'' అని అన్నారామె.

మిగిలిన యూట్యూబర్ల స్పందన కోసం బీబీసీ ప్రయత్నిస్తోంది. వారి నుంచి స్పందన రాగానే ఇక్కడ అప్‌డేట్ చేస్తాం.

బెట్టింగ్ యాప్స్ వ్యతిరేక ఉద్యమానికి మద్దతు

సోషల్ మీడియాలో #SayNoToBettingApps హ్యాష్ టాగ్ ట్రెండ్ అవుతోంది. ఐపీఎస్ అధికారి సజ్జనార్, ప్రముఖులను ట్యాగ్ చేస్తూ బెట్టింగ్ యాప్స్‌కు వ్యతిరేకంగా జరుగుతున్న ఉద్యమానికి మద్దతుగా నిలబడాలని కోరుతున్నారు.

''ఎంతో మంది ఇన్‌ఫ్లూయెన్సర్లు నన్ను సంప్రదించి బెట్టింగ్ యాప్స్‌కు వ్యతిరేకంగా అవగాహనా వీడియోలు చేయడానికి అనుమతి కోరుతున్నారు. ఒక మంచి పని చేయడానికి ఎవరి అనుమతి అక్కర్లేదు. ఒక మంచి సందేశం ద్వారా మార్పు తీసుకురావాలనుకునే వారందరూ ముందుకు వెళ్లవచ్చు.'' అని సజ్జనార్ చెప్పారు.

అందరం కలిసి అనధికారిక బెట్టింగ్ ప్రమోషన్స్ కు వ్యతిరేకంగా ఉద్యమించి జీవితాలను కాపాడదామని పిలుపునిచ్చారు.

బెట్టింగ్ యాప్ ప్రమోట్ చేయాలని ఎవరైనా అడిగితే వారిని అన్‌ఫాలో చేయాలని, రిపోర్ట్ కొట్టాలని విజ్జప్తి చేశారు.

ఇక సజ్జనార్ పిలుపునకు స్పందించి సినిమారంగానికి చెందినవారు తమ మద్దతు తెలుపుతున్నారు.

గెటప్ శ్రీను, సంపూర్ణేష్ బాబు వంటివారు బెట్టింగ్ యాప్స్ వలలో చిక్కుకోవద్దని వీడియోలు చేసి పోస్టు చేస్తున్నారు.

ఎవరైనా బెట్టింగ్ యాప్స్ ప్రమోట్ చేస్తుంటే 1930 నంబరుకు లేదా సైబర్ క్రైమ్స్ వెబ్‌సైట్‌లో ఫిర్యాదు చేయాలని డీసీపీ విజయ్ కుమార్ ప్రజలను కోరారు.

అక్కడ అనుమతి, ఇక్కడ నిషేధం

భారత్‌లో ఆన్‌లైన్ గేమింగ్ పరిశ్రమ ఏటా వృద్ధి రేటు నమోదు చేస్తోంది. 2023-24 సంవత్సరానికి 23శాతం పెరిగి 3.8 బిలియన్ డాలర్లకు చేరుకుందని బిజినెస్ స్టాండర్డ్ ఇటీవల ఒక కథనంలో పేర్కొంది.

దీంతో పుట్టగొడుగుల్లా ఆన్‌లైన్ గేమింగ్ బెట్టింగ్ యాప్స్ పుట్టుకొస్తున్నాయి. వీటిని డౌన్‌లోడ్ చేసుకుని ఊబిలో కూరుకుపోతున్నారని, వీరిలో ఎక్కువ శాతం మంది యువతేనంటున్నారు నిపుణులు.

దేశంలో ఆన్‌లైన్ బెట్టింగ్ నిషేధంపై ఒకే తరహా విధివిధానాలు లేవు. రాష్ట్రాల వారీగా చట్టాలు వేర్వేరుగా ఉండటం బెట్టింగ్ యాప్ నిర్వాహకులకు కలిసి వస్తోందని సజ్జనార్ అభిప్రాయపడ్డారు .

గ్యాంబ్లింగ్, గేమింగ్ చట్టాలకు 'ది పబ్లిక్ గ్యాంబ్లింగ్ యాక్ట్ 1867' పునాదిగా ఉందని చెప్పవచ్చు. 2000 సంవత్సరంలో వచ్చిన ఐటీ చట్టం సైబర్ నేరాలకు కొంత అడ్డుకట్ట వేస్తున్నప్పటికీ, ఆన్‌లైన్ గ్యాంబ్లింగ్ గురించి ప్రత్యేకంగా ప్రస్తావించడం లేదు.

దేశంలో కొన్ని రాష్ట్రాలలో ఆన్‌లైన్ గేమింగ్స్‌పై నిషేధం లేకపోవడంతో.. ఆయా రాష్ట్రాల్లో రిజిస్టర్ చేసుకుని ఈ యాప్స్ నిర్వహిస్తున్నారని పోలీసులు చెబుతున్నారు.

గోవా, సిక్కిం, నాగాలాండ్ రాష్ట్రాలలో కొన్ని ఆన్‌లైన్ గేమింగ్స్‌‌పై నిషేధం లేదు.

2017లో వచ్చిన గేమింగ్ యాక్ట్ ప్రకారం తెలంగాణలో ఆన్‌లైన్ గ్యాంబ్లింగ్ పై నిషేధం ఉంది. 1974లో వచ్చిన ఆంధ్రప్రదేశ్ గేమింగ్ యాక్ట్‌కు సవరణ చేసి ఏపీలోనూ 2020 డిసెంబరులో ఆన్‌లైన్ గ్యాంబ్లింగ్, బెట్టింగ్ గేమ్స్ పై నిషేధం విధించారు.

తమిళనాడు, కర్ణాటక, కేరళలోనూ నిషేధం అమల్లో ఉంది. అలాగే రాజస్థాన్ వంటి రాష్ట్రాల్లోఫాంటసీ గేమ్స్‌పై నిషేధం లేదు. కానీ ఏపీ, తెలంగాణలో వాటిపై నిషేధం ఉంది.

ఈ నిషేధం ప్రకారం ఆన్‌లైన్‌లో డబ్బలుపెట్టి గేమ్స్ ఆడకూడదు. అయినా ఈజీ మనీ కోసం ఆన్‌లైన్ గేమ్స్‌కు కొందరు అలవాటు పడుతున్నారని సజ్జనార్ బీబీసీకి చెప్పారు.

బెట్టింగ్ యాప్స్ నియంత్రణకు కేంద్ర ప్రభుత్వం కూడా స్పందించి దేశవ్యాప్తంగా ఒకే తరహా నిబంధనలు రూపొందించాల్సిన అవసరం ఉందని సజ్జనార్ అభిప్రాయపడ్డారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)