సునీతా విలియమ్స్, విల్మోర్: అంతరిక్షం నుంచి భూ ప్రయాణానికి తేదీ, సమయం ఖరారు..
ఫొటో సోర్స్, NASA
అంతర్జాతీయ అంతరిక్ష కేంద్రం (ఐఎస్ఎస్)లో 9 నెలల నుంచి చిక్కుకుపోయిన వ్యోమగాములు సునీతా విలియమ్స్, విల్మోర్లు అన్నీ అనుకూలిస్తే మంగళవారం( అమెరికా కాలమానం ప్రకారం) సాయంత్రం భూమి మీదకు రానున్నట్లు నాసా ప్రకటించింది.
స్పేస్ ఎక్స్కు చెందిన డ్రాగన్ స్పేస్ క్రాఫ్ట్లో నిక్ హేగ్, రష్యన్ కాస్మోనాట్ అలెగ్జాండర్ గోర్బునోవ్తో పాటు సునీతా విలియమ్స్, విల్మోర్లు తిరిగి భూమి మీదకు వస్తారని నాసా తెలిపింది.
అంతర్జాతీయ అంతరిక్ష కేంద్రం నుంచి వీరు భూమి మీదకు వచ్చే స్పేస్ఎక్స్ క్రూ-9 మిషన్ను లైవ్ కవరేజ్గా అందించనున్నట్టు నాసా తెలిపింది.
అమెరికా కాలమానం ప్రకారం సోమవారం (మార్చి 17) రాత్రి 10.45కు అంటే భారత కాలమానం ప్రకారం మంగళవారం ఉదయం 8.15కు డ్రాగన్ స్పేస్క్రాఫ్ట్ బయలుదేరే ప్రక్రియ మొదలవుతుందని చెప్పింది.
డ్రాగన్ స్పేస్క్రాఫ్ట్ తలుపు మూసే దగ్గరి నుంచి ఈ కార్యక్రమాన్ని లైవ్గా ఇవ్వనున్నట్లు నాసా తెలిపింది.
అంతర్జాతీయ అంతరిక్ష కేంద్రం నుంచి వచ్చే ఏజెన్సీ క్రూ-9 మిషన్ కోసం ఫ్లోరిడా తీర ప్రాంతంలో వాతావరణ, ఇతర పరిస్థితులన్నింటినీ నాసా, స్పేస్ఎక్స్లు ఆదివారమే పరిశీలించాయి.
ఫొటో సోర్స్, NASA
సునీతా విలియమ్స్, విల్మోర్ భూమి మీదకుతిరిగిరావడానికి అనువుగా, వారిని రిలీవ్ చేసేందుకు స్పేస్ ఎక్స్లో పంపిన నలుగురు వ్యోమగాములు ఇప్పటికే ఐఎస్ఎస్కు చేరుకున్నారు. వారికి చెందిన ఓ వీడియోను నాసా విడుదల చేసింది.
ఐఎస్ఎస్ చేరుకున్న నలుగురు వ్యోమగాములకు సునీతా విలియమ్స్, విల్మోర్తోపాటు అందులో ఉన్న వ్యోమగాములు స్వాగతం పలికారు.
ఈ కథనంలో X అందించిన సమాచారం కూడా ఉంది. వారు కుకీలు, ఇతర టెక్నాలజీలను ఉపయోగిస్తుండొచ్చు, అందుకే సమాచారం లోడ్ అయ్యే ముందే మేం మీ అనుమతి అడుగుతాం. మీరు మీ అనుమతి ఇచ్చేముందు X కుకీ పాలసీని , ప్రైవసీ పాలసీని చదవొచ్చు. ఈ సమాచారం చూడాలనుకుంటే ‘ఆమోదించు, కొనసాగించు’ను ఎంచుకోండి.
పోస్ట్ of X ముగిసింది
బాధ్యతలు అప్పగించి బయల్దేరుతారు
అంతరిక్షంలో చిక్కుకుపోయిన సునీత,విల్మోర్లను వెనక్కు తీసుకువచ్చే ప్రణాళికలో భాగంగా నలుగురు వ్యోమగాములతో ప్రయోగించిన స్పేస్ ఎక్స్ రాకెట్ అంతర్జాతీయ అంతరిక్ష కేంద్రంతో అనుసంధానమైంది. దీంతో సునీత, విల్మోర్ల 9 నెలల అంతరిక్ష వాసం ముగింపు దశకు చేరుకుంది.
కొత్త వ్యోమగాములకు వీరిద్దరూ బాధ్యతలు అప్పగించడానికి రెండురోజులు పడుతుందని, ఆ తరువాత వాతావరణ అనుకూలతను బట్టి వారి తిరుగు ప్రయాణం ఉంటుందని ఇప్పటికే నాసా ప్రకటించింది.
‘‘కచ్చితంగా వాతావరణం అనుకూలించాలి. అప్పుడే వారి తిరుగు ప్రయాణం ఉంటుంది’’ అని ఐఎస్ఎస్ ప్రోగ్రామ్ మేనేజర్ డానా వీగెల్ ఇప్పటికే చెప్పారు.
ఫొటో సోర్స్, Getty Images
సునీత రికార్డు
అంతర్జాతీయ అంతరిక్ష కేంద్రానికి వ్యోమగాములను తీసుకు వెళ్లడానికి, తీసుకు రావడానికి నాసా ప్రస్తుతం స్పేస్ ఎక్స్కు చెందిన రాకెట్లను ఉపయోగిస్తోంది.
స్పేస్ ఎక్స్కు చెందిన డ్రాగన్ స్పేస్ క్రాఫ్ట్ ద్వారా వ్యోమగాముల్ని అంతరిక్షంలోకి తీసుకు వెళ్లేందుకు నాసా చేపట్టిన పదకొండో మిషన్ ఇది.
అంతర్జాతీయ అంతరిక్ష కేంద్రంలో ఉన్న వ్యోమగాములను తీసుకుని స్పేస్ ఎక్స్ డ్రాగన్ ఐఎస్ఎస్తో విడివడిన తర్వాత మార్చ్ 16,19 మధ్యన ఈ రాకెట్ భూ కక్ష్యలోకి వచ్చేలా ఈ మిషన్ను షెడ్యూల్ చేశారు.
రాకెట్ తిరుగు ప్రయాణానికి నాసా అస్ట్రోనాట్ నిక్ హేగ్ పైలట్గా వ్యవహరించనున్నారు. ఆయనతో పాటు సునీత విలియమ్స్, బుచ్ విల్మోర్, రష్యన్ కాస్మోనాట్ అలెగ్జాండర్ గోర్బునోవ్ భూమి మీదకు రానున్నారు.
సునీత విలియమ్స్ భూమి మీదకు వచ్చేందుకు స్పేస్ ఎక్స్ స్పేస్ క్రాఫ్ట్ ఎక్కితే ఆమె పేరున మరో రికార్డు నమోదవుతుంది. నాలుగు రకాల అంతరిక్ష నౌకల్లో ప్రయాణించిన తొలి వ్యోమగామిగా సునీత గుర్తింపు పొందుతారు.
ఫొటో సోర్స్, NASA
ఆరోగ్యం దెబ్బతింటుందా?
సుదీర్ఘకాలం అంతరిక్షంలో ఉండటం వల్ల అస్ట్రోనాట్స్ శరీరంలో వచ్చే మార్పులపై అనేక సందేహాలు వ్యక్తం అవుతున్నాయి. సుదీర్ఘకాలం అంతరిక్షంలో ఉండటం వల్ల వారి ఆరోగ్యంపై ప్రభావం చూపుతుందని చెబుతున్నారు.
అయితే అస్ట్రోనాట్స్ ఇద్దరూ ఇది తమకు లభించిన అరుదైన అవకాశం అని అంటున్నారు.
వీళ్లిద్దరూ అంతరిక్షంలో ఉన్న 9నెలల కాలంలో క్రూ నైన్తో కలిసి స్పేస్ వాక్, అంతరిక్షంలో మొక్కల పెంపకం సహా అనేక ప్రయోగాల్లో పాల్గొన్నారు.
ఫొటో సోర్స్, NASA
ఎందుకు వెళ్లారు?
2024 జూన్ 5న టెస్ట్ మిషన్ కోసం స్టార్లైనర్ అంతరిక్ష నౌకలో సునీత్, విల్మోర్ ప్రయాణించారు. ఎనిమిది రోజుల తర్వాత వారు తిరిగి భూమ్మీదకు రావాల్సింది.
బోయింగ్ స్టార్లైనర్ క్యాప్సుల్ను పరీక్షించేందుకు వీరిద్దరూ జూన్ 2024లో భూమిపై నుంచి అంతర్జాతీయ అంతరిక్ష కేంద్రానికి పయనమయ్యారు. కానీ దాని థ్రస్టర్లలో సమస్యలు, హీలియం లీకేజీని ఇంజనీర్లు గమనించారు.
దీంతో 58 ఏళ్ల విలియమ్స్, విల్మోర్లను (61)లను 2025 వరకు అంతర్జాతీయ అంతరిక్ష కేంద్రంలోనే ఉంచాలని నాసా నిర్ణయించింది.
బోయింగ్ ప్రత్యర్థి సంస్థ స్పేస్ ఎక్స్ తయారు చేసిన వ్యోమనౌకలో వీరు తిరిగి తీసుకురావాలని నిర్ణయించడంతో సునీత, విల్మోర్లను అంతరిక్షంలోనే వదిలేసి స్టార్లైనర్ భూమికి తిరిగి వచ్చేసింది.
ఈ సందర్భంగా ‘‘అనుకోని పరిస్థితులను ఎదుర్కొనేలా శిక్షణ పొందినట్టు’’ విల్మోర్ చెప్పారు.
ఖర్చుల నియంత్రణ, వ్యోమగాములకు వాణిజ్య అంతరిక్ష ప్రయాణ అనుభవాన్ని అందించేందుకు ఈ రెండు కంపెనీలకు నాసా కాంట్రాక్టులు ఇచ్చింది.
(బీబీసీ కోసం కలెక్టివ్ న్యూస్రూమ్ ప్రచురణ)
(బీబీసీ తెలుగును వాట్సాప్,ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)
