"Space Rangers": Kikosi cha Marekani kinachoweza kufuatilia makombora yaliyorushwa kutoka popote duniani

Kelele fupi na wazi zinasikika: "Shambulia Yemen!" Wanaume na wanawake waliovalia sare, wameketi mbele ya kompyuta zao, wanajibu kwa pamoja: "Nakili, shambulia Yemen!"

Katika Jeshi la Anga la Marekani, hawawaiti wanajeshi wao askari, wanawaita Walinzi. Wakitazama skrini zao kwenye kituo nje ya Denver, Colorado, wanaweza kufuatilia uzinduzi wa kombora kutoka popote ulimwenguni na kulifuata kutoka kwenye eneo lilikofyatuliwa hadi mahali litakapiga.

Sisi ndio waandishi wa habari wa kwanza wa kimataifa kuruhusiwa ndani ya Chumba cha Operesheni cha Tahadhari na Ufuatiliaji wa Makombora cha Jeshi la Anga la Marekani kilichopo katika kituo cha ngome ya kijeshi ya -Buckley Space Force Base, ambapo Walinzi wako macho kwa saa 27 siku 7.

Wamezungukwa na mitambo mikubwa ya uchunguzi inayoonyesha ramani na data inayoangaziwa kutoka kwa kundi la satelaiti za kijeshi angani.

Walinzi hawa ndio wa kwanza kugundua ishara za joto linalotokea wakati kombora linaporushwa. Muda mfupi baadaye, kelele nyingine zinasikika: "Uzinduzi wa Iran!" zikifuatiwa na kwaya za maneno "Nakili, uzinduzi wa Iran!"

Wakati huu ni mazoezi ya operesheni. Lakini mwezi uliopita walifanya hivyo kwa vitendo: Iran ilirusha makombora mengi kwenye kambi ya kijeshi ya Marekani huko al-Udeid nchini Qatar, kujibu mashambulizi ya Marekani na Israeli dhidi ya Iran.

Luteni Kanali Ann Hughes anaelezea mazingira siku hiyo kama hali "nzito." Tofauti na mashambuli mengi , ngome ilikuwa imeonywa mapema. Iliwezekana kufuatilia makombora ya Iran na kisha kupeleka habari hiyo kwa betri za ulinzi wa anga ardhini.

"Mwishowe, tuliokoa kituo kizima na wafanyakazi huko," Hughes anasema, akiwa amefarijika.

Hughes anasema wamekuwa na shughuli nyingi sana katika miaka ya hivi karibuni, na vita katika Mashariki ya Kati na Ulaya.

Ninapouliza ikiwa wametoa maonyo kwa Ukraine, Luteni Kanali Hughes anajibu, "Tunatoa maonyo ya kimkakati na mbinu ya makombora kwa vikosi vyote vya Marekani na washirika."

Marekani haijathibitisha hili hadharani, lakini inaonekana kuna uwezekano kwamba Kyiv pia ilionywa ilipokuwa karibu kushambuliwa na Urusi.

Buckley Space Force Base itakuwa sehemu muhimu ya mipango ya Rais Donald Trump ya mfumo wa ulinzi wa makombora wa Marekani, unaojulikana kama Golden Dome.

Serikali imetenga dola bilioni 175 kwa mpango huo kabambe, ambao uliigwa kutoka mfumo wa ulinzi wa anga wa Israeli wa Iron Dome. Wengi wanaamini utakuwa na gharama zaidi.

Lakini misingi tayari imewekwa huko Buckley. Katika msingi wake, anga inaongozwa na "radomes" kubwa, vifuniko vya mviringo ambavyo hulinda sahani zenye nguvu za satelaiti ndani. yanafanana na mipira mikubwa ya gofu.

Luteni Jenerali David Miller, kamanda wa Amri ya Operesheni ya Anga ya Marekani, anasema maendeleo ya Gold Dome, ambayo bado iko katika hatua zake za mwanzo, inatambua vitisho vinavyoongezeka dhidi ya Marekani.

Anazitaja hasa China na Urusi.

Nchi zote mbili zimetengeneza makombora ya hypersonic ambayo yanaweza kusafiri kwa zaidi ya mara tano ya kasi ya sauti. Pia wamejaribu Mifumo ya Mabomu ya Fractional Orbital, ambayo ni mangumu zaidi kuyafuatilia.

"Kasi na fizikia inayohusishwa na kukatiza makombora haya inahitaji kuzingatia uingiliaji wa anga," anasema Jenerali Miller. Anapendelea kuzungumza juu ya "uwezo" wa kutetea masilahi ya Marekani badala ya silaha za angani.

Kuundwa kwa Jeshi la Anga la Marekani miaka mitano iliyopita kunaonyesha kuwa anga limekuwa uwanja wa vita. Rais Trump alizindua kikosi hicho wakati wa muhula wake wa kwanza, akielezea anga kama "uwanja mpya wa vita wa ulimwengu."

China na Urusi zimejaribu makombora ya kupambana na satelaiti, pamoja na njia za kuzuia mawasiliano yao.

Jenerali Miller anadai kuwa Urusi "imeonyesha uwezo wa kurusha kichwa cha nyuklia" angani. Anasisitiza kuwa ang tayari ni eneo "lenye ushindani mkubwa", akiongeza kuwa "lazima pia tuwe tayari kwa mizozo ya anga."

Kanali Phoenix Hauser anasimamia kitengo cha Ujasusi, Ufuatiliaji, na Upelelezi cha Jeshi la Anga, kinachojulikana kama Delta 7. Kazi yake ni kujua kinachotokea angani.

Katika msingi wake karibu na Colorado Springs, timu hiyo hufuatilia skrini zinazoonyesha maelfu ya nukta ndogo kote ulimwenguni. Tayari kuna takriban satelaiti 12,000 angani. Kufikia mwisho wa muongo, idadi hiyo inaweza kuongezeka hadi 60,000.

Kanali Hauser anasema lengo lake kuu ni China. "Ni tisho linalokaribia," anasema. China tayari ina satelaiti 1,000, nusu yake ni za kijeshi. Katika muongo mmoja ujao, Hauser anaongeza, China itakuwa na makumi ya maelfu ya satelaiti zaidi katika obiti ya chini ya Dunia. Anga inazidi kuwa na msongamano na ushindani.

"Tayari kuna uhasama katika anga," anasema. "Tunaona vitendo visivyo vya kitaalamu na visivyo salama vya wapinzani wetu." Hii ni pamoja na satelaiti zilizo na viboreshaji vya kielektroniki, leza, na hata nyavu na mikono ya kugombana, ambayo inaweza kutumika kugeuza satelaiti nyingine kutoka kwenye mkondo wake.

Jeshi la Anga la Marekani linajiandaa kwa uwezekano wa migogoro angani.

Kanali Hauser anasema kwamba mwaka mmoja uliopita, "hawakuweza kuzungumza juu ya uwezo wa mashambulizi ya anga za juu ." Sasa, anasema lengo lake "ni kutoa chaguzi kwa rais ili tuweze kufikia na kudumisha ubora wa anga za juu kupitia udhibiti wa mashambulizi ya angani na ya kujihami."

Luteni Jenerali Miller anasema kwamba njia pekee ya kuzuia mzozo ni "kwa nguvu, na lazima tuwe na uwezo wetu wenyewe wa kutetea rasilimali zetu." Hafafanui ana maaninisha nini hasa.

Lakini mashambulizi ya hivi majuzi ya Marekani dhidi ya mpango wa nyuklia wa Iran, Operesheni Midnight Hammer, yanatoa muhtasari wa kile ambacho Jeshi la Anga la Marekani tayari linaweza kukifanhya. Mashambulizi haya ya makombora ya B-2 pia yanasisitiza ni kwa nini kuendelea kutawala angani bado ni muhimu kwa jeshi la Marekani.

"Tunahitaji kuelewa ni kwa kiwango gani jeshi la Marekani linatumia faida tunayopata kutoka angani," anasema Jenerali Miller. Hii ni pamoja na uwezo wa kusogeza na kuwasiliana katika upeo wa macho, na kuzindua shambulizi kwa usahihi kwa kutumia GPS.

BBC imepata maelezo ya kwanza ya ushiriki wa Walinzi wa Jeshi la Anga la Marekani katika operesheni hiyo.

"Tulijua kutakuwa na msongamano," anaoongezeka . Kikosi cha Anga cha Marekani kilihakikisha kuzuia msongamano huo ili makombora yake ya B-2 yaweze kufikia lengo lake na kutoa mabomu yao yanayoongozwa na GPS kwa usahihi.

Wataalamu wa vita vya kielektroniki kutoka Delta 3 ya Jeshi la Anga la Marekani walikuwa tayari wakifanya kazi ardhini katika eneo hilo.

Kamanda wake, Kanali Angelo Fernández, ananionyesha safu za sahani za satelaiti na vyombo vya amri ambavyo vinaweza kutumwa popote ulimwenguni.

Antena, anaelezea kuwa, zinaweza kutumika kukatiza na kisha kunyamazisha mawasiliano ya adui, "kwa kutoa kelele kwa kiwango cha juu."

"yaliweza kulinda mali za Amerika na, wakati huo huo, kufungua ukanda wa ndege," anasema.

Kabla, wakati, na baada ya misheni, Walinzi wa Delta 7 wa Jeshi la Anga la Marekani walifuatilia operesheni hiyo.

Kanali Phoenix Hauser anasema waliweza kufuatilia wigo wa sumaku ya umeme "kuelewa ikiwa Iran ilijua kinachotokea, ikiwa ilikuwa na onyo lolote la busara kwamba mashambulizi yanaweza kutokea."

Walinzi walisaidia kufanikisha opresheni na hata kuwaruhusu wafanyakazi wa ndege kukamilisha misheni bila kugunduliwa.

Jeshi la Anga la Marekani linaweza kuwa huduma ya kijeshi changa zaidi ya taifa, lakini ni muhimu kwa nguvu zake za kijeshi. Luteni Jenerali Miller anadai kwamba jeshi lote laMarekani "linategemea ubora wa anga."

Anataka kuhakikisha kuwa uwezo huo unaendelea. Na ana onyo kwa adui yeyote: "Wakati jeshi la Marekani linazingatia jambo fulani, Mungu awasaidie!"