۹ کلنې نجلۍ څنګه ماشومانو ته کتابتون جوړ کړ؟
د عکس سرچینه، S Niazi
د هند د مدهیه پردېش ایالت په مرکز بهوپال کې د یوې بې وزله کورنۍ نهه کلنه نجلۍ مسکان د خپلې سیمې د ماشومانو لپاره د یوه کتابتون د سمبالښت چارې پر غاړه لري.
د درګانګر ښار د کلیوالې سیمې اوسېدونکې مسکان سږ کال دا کتابتون د دغه ایالت د ښوونیز مرکز په همکارۍ پیل کړی دی.
مسکان په ډېلي کې د حکومت د پالیسۍ کمېسون له خوا له جایزې ترلاسه کولو وروسته تازه خپلې سیمې ته ستنه شوې ده.
دغه کمېسون مسکان ته د "فکري مشر" جایزه ور کړې ده.
د دې کتابتون د پیلولوپه هکله په خبرو کې مسکان وویل: "زما لیک لوست ډېر خوښیږي، خو دلته ماشومان هسې خوشي ګرځېدل. بیا د ایالتي زدکړو مرکز څو چارواکي دلته راغلل، د هغوی په همکارۍ مې د جنورۍ پر ۲۶ کتابتون پیل کړ."
د مسکان د دې نوښت له امله په دې سیمه کې د هر چا په ژبه د هغې نوم دی او د کلیوالې سیمې خلک د هغې دا هڅې ستايي او درناوی یې کوي.
د عکس سرچینه، S Niazi
مسکان هیله منه ده چې یوه ورځ به ډاکټره شي، هغه دې موخې ته د رسېدو لپاره زیارکښه معلومیږي.
هغه چې هره ورځ له ښوونځي لاړه شي، نو کتابتون پرانیزي. اوس هغه په کتابتون کې نږدې ۴۰۰ کتابونه لري.
دا د هغې د زیار پایله ده چې پرلپسې یې کتابونه ډېریږي او اوس له بهر هم کتابونه ورته لېږل کیږي.
د هغې د کتابتون په وجه د کلیوالې سیمې اوسېدونکي نور ماشومان هم لیک لوست او د زدکړو ترلاسه کولو ته هڅیږي.
* <link type="page"><caption> د ماشومانو سنتول د اېډز خطر کموي</caption><url href="http://www.bbc.com/pashto/world/2014/12/141208_hh-guidline_male_circumcision" platform="highweb"/></link>
د دې سیمې یو اوسېدونکي دیپک ساکیت وايي: "د دې کتابتون په سبب د کلي ماشومانو ته ښوونکي د درس ویلو لپاره راځي ـ هغوی ماشومانو ته لیک لوست ښيي او که ماشومان له کومې ستونزې سره مخ کیږي، نو ښوونکي یې ور سره اواروي. "
د مسکان پلار منوهر اهروار په مزدورۍ سره خپله کورنۍ چلوي.
د لور په دې بري ډېر خوشال دی. هغه کله هم دا فکر نه و کړی چې له لور سره به ډېلي ته د تللو چانس په لاس ور شي.
