اوکرايين جګړه کې" ۳۶۴ ملکيان وژل شوي"

پر اوکرايين د روسيې د بريد پر يوولسمه ورځ هم د دغه هېواد په بېلابېلو برخو کې جګړه روانه وه. د ملګرو ملتونو د بشري چارو د همغږۍ اداره (اوچا) وايي د فبرورۍ له ۲۴مې راهیسې د ۲۵ ماشومانو په ګډون ۳۶۴ ملکیان وژل شوي او ۷۵۹ نور ټپیان دي شوي دي.

خو دغه اداره وېره څرګندوي چې ښايي د مرګ کره شمېر له دې هم لوړ وي.

د دغې ادارې په راپور کې همدا راز راغلي چې، د ثبت شویو ملکي تلفاتو ډېره برخه په سیمه کې د چاودېدونکو وسلو د کارولو له امله ده چې د درنو توپونو ګوزار، توغندیز او هوایي بریدونه په کې شامل دي.

بل پلو د سره صلیب نړیوالې ادارې اعلان کړی چې د اوکرایین په سویل ختیځ کې د ماریوپل ښاره د ملکي کسانو ایستل بېرته بند کړي دي.

روسي او اوکراییني پوځیان یو بل له اوربنده پر سرغړونې تورنوي.

د ماریوپل ښار چارواکو ویلي، په لنډ مهالي اوربند په دې موخه هوکړه شوې وه چې عامو خلکو ته اجازه ورکړي چې له سیمې ووځي.

دا په داسې حال کې ده چې د کرملین چارواکي وايي، ولادمیر پوتین د ترکیې ولسمشر رجب طیب اردوغان سره ټلیفوني خبرو کې ویلي، اوکرایین به هغه مهال خپل نظامي عملیات پای ته ورسوي چې اوکرایین خپلې وسلې په ځمکه کېږدي او د مسکو غوښتنې ومني.

روسیه ټینګار کوي چې پر اوکریین هوايي او ځمکني بریدونه یې "ځانګړي نظامي عملیات" دي.

د روسیې ولسمشر بیاځلي ټينګار کړی چې بریدونه به یې د پلان او وخت له مخې دوام ولري.

خو د ترکیې د ولسمشرۍ دفتر په وينا، اردوغان پوتین سره ټلیفوني خبرو کې د بېړني اوربند غوښتنه کړې ده.

ملګري ملتونه وايي پر اوکرایین د روسیې د یرغل له پیل راهیسې له دغه هېواده د وتلو کسانو شمېر تر یو نیم میلیون اوښتی دی.

کډوالو لپاره د ملګرو ملتونو د ادارې (یو این اېچ سي ار) مشر فېلېپو ګراندي ویلي دغه کسان تېرو لسو ورځو کې ګاونډیو هېوادونو ته اوښتي دي.

د اوکرایین د جګړې له کبله کډوالي د کډوالۍ څپه له دویمې نړیوالې جګړې را وروسته اروپا کې د کډوالۍ تر ټولو لويه څپه بلل شوې ده.