پاکستان هند ته: د الوتکو ټوټې دې هر چا ولیدې
د عکس سرچینه، AFP
د پاکستان د پوځ ویاند تورنجنرال اصف غفور وايي، بیا بیا درواغ ویل نه ریښتیا کېږي.
نوموړي هند ته په اشاره وویل، نوی ډېلی وایي، د پاکستان اېف ۱۶ الوتکه یې غورځولې، خو ثبوت یې وړاندې نه کړ.
د اصف غفور دا خبرې دوه ورځې له هغه وروسته دي چې د پاکستان د بهرنیو چارو وزیر شاه محمود قریشي وویل، هند دې میاشت کې بیا پر پاکستان د برید پلان لري.
نوي ډېلي فرورۍ کې هم د پښتونخوا په بالاکوټ کې د جیش محمد پر مرکز د هوايي برید دعوه وکړه.
له هغې پېښې یوه ورځ وروسته د کشمیر په کنټرول کرښه کې د پاکستان د هوايي ځواک په برید کې د هندۍ الوتکې تر غورځېدو وروسته نوي ډېلي وویل، د پاکستان اېف شپاړس الوتکه یې هم غورځولې ده.
هند د غورځېدلې پاکستانۍ الوتکې د ثبوت لرلو دعوه هم وکړه، خو تر اوسه یې دا ثبوت وړاندې نه کړ.
اوس تورنجنرال اصف غفور خپل ټوېټر کې هندي چارواکو ته ځواب کې ویلي، چې په پاکستان د هند هوايي ځواک ته د رسېدلي تاوان ډنډوره مه غږوئ، چوپتیا له پام مه غورځوئ:
"حقیقت دا دی چې پاکستاني هوایي ځواک د هند دوه الوتکې وغورځولې او ټوټې یې هم ټولو پر ځمکه ولیدې".
د امریکا پلټنې څه وايي؟
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
له دې مخکې د امریکا فارن پالیسي هم ویلي چې د متحده ایالتونو دفاع وزارت چارواکو د پاکستان اېف ۱۶ الوتکې شمېرلې او پوره دي.
امریکايي چارواکو فارن پالیسي ته ویلي، د هند او پاکستان وروستۍ لانجې له امله څو الوتکې سملاسي نه وې، ځکه یې د ټولو د ګڼلو لپاره دوی څو اونۍ کار وکړ.
د دوی په خبره، اوس دا شمېر شوی او ټولې الوتکې شته او کتل شوې دي.
د امریکايي چارواکو دا خبره د هند هغه دعوه ردوي چې ویل یې له پاکستان سره د فرورۍ جنجال کې یې د دغه هېواد یوه اېف ۱۶ الوتکه غورځولې ده.
د عکس سرچینه، ISPR
د هند هوايي ځواک ویل چې دغه کړکېچ کې د پاکستاني الوتکو له خوا په نښه شوي هندي پیلوټ ابهینندن ورتمان د خپلې الوتکې له غورځېدو مخکې د پاکستان الوتکه غورځولې ده.
خو د اسلام اباد حکومت بیا بیا د نوي ډېلي دا دعوه رد کړې ده.
د جمعې په ورځ هم د پاکستان د عامه اړیکو مشر د امریکا د فارن پالیسۍ رپوټ ته په اشاره وویل، دلته د پاکستان دریځ هم روښان او ریښتیا وخوت.
تورنجنرال اصف غفور دا هم وویل، چې د هند له لوري د برید او د هغه د اغېز په تړاو دعوه یې هم دروغ ده او اوس د دې وخت دی چې هند د پاکستان په لاس د خپلې دویمې الوتکې د غورځېدلو په ګډون د ټول زیان په هکله ریښتیا ووايي.
