بي بي سي پښتو وېبپاڼه کابل

	ولسي وگړو ته په وروستيو کې د مرگ ژوبلې ډېرى پېښې په هلمند کې شوې

د سيمې اوسېدونکي هم وايي په گرشک ولسوالۍ کې تېره شپه د بهرنيو ځواکونو الوتکو بمبارد کړى او د کلي خلکو ته گڼه مرگ ژوبله اوښتې.

ځايي اوسېدونکو بي بي سي ته وويل په ده ادم خان کلي کې د تېرې شپې په بمبارۍ کې ٣٠ تنه عادي خلک وژل شوي، چې ښځې او ماشومان هم پکې دي.

د هلمند د پوليسو مشر، محمد حسين انډيوال، وايي ناټو ځواکونو په ياد شوي کلي کې پر دوو کورونو بمونو غورځولي او ٢٥ کسان يې وژلي، چې نهه پکې ښځې، درې نوي زېږېدلي ماشومان او يو د کلي ملا هم دي.

ښاغلي انډيوال له ناټو ځواکونو گيله وکړه چې دوى يې د تېرې شپې د پوځي عملياتو او بمباريو په اړه هېڅ خبر کړي نه و او دا چې حکومتي چارواکي سهار له پېښې خبر شول.

کله چې د بي بي سي خبريال، عبد الصمد روحاني، په سيمه کې د ناټو ځواکونو له يوۀ وياند سره خبرې وکړي، هغوى د تېرې شپې د بمبارد په اړه له خبرو کولو په څنگ تېرېدل او وسله والو طالبان يې پړۀ بلل چې گواکې د خلکو له کورونو څخه د مورچو په توگه کار اخلي.

د وسله والو طالبانو يوۀ وياند هم وويل چې دوى ته په گرشک کې هېڅ زيان نه دى رسېدلى.

په وروستيو مياشتو کې ولسي خلک په ډېرېدونکي توگه د وسله والو طالبانو او افغان او نړيوالو ځواکونو تر منځ جگړو کې وژل شوي.

مرستندويه ټولنې وايي بهرنيو او افغان ځواکونو سږ کال لږترلږه ٢٣٠ ولسي خلک وژلي.

وروستيو پېښې ښيي چې څومره چې په سويلي ولايتونو کې ناامني زياتېږي هومره ملکي وگړو ته مرگ ژوبله زياتېږي.

په همدې مسالې باندې ولسمشر حامد کرزي په وار-وار خپل سخت غبرگون ښوولى او خپلو خلکو ته يې د مرگ ژوبلې اوړېدل له زغمه وتلي بللي.

په ځواب کې يې نړيوال ځواکونه هم تل وايي چې دوى ټولې هغه هڅې کوي چې په وس کې يې وي چې ولسي خلک د جگړې له زيانه خوندي پاتې شي.

خو داسې ښکاري چې د دغې ستونزې تر بد بترېدل هم د افغان حکومت او هم د نړيوالو ځواکونو لپاره پر زياتېدونکي سرخوږي اوړي.