ارواکي د ولس د زړۀ او ذهن په گټلو کې د ولسي وگړو د وژنو مخنيوى خورا مهم بولي

ولسمشر بوش له افغان ولس سره د وير کولو پر وخت د دغو وژنو پړه د وسله والو طالبانو پر جنگي تکتيکونو اچولې ده .

د وسله والو طالبانو پر ضد د نړيوالو ځواکونو د مبارزې له هغه پيله د ملکي کسانو د وژنې مساله افغان ولس او چارواکو په بيا بيا ياده کړې او د تکرار د مخنيوي غوښتنه يې کړې ده.

ايمل پسرلى دغه مساله داسې څيړي:
په افغانستان کې د ملکي کسانو د تلفاتو مساله افغان چارواکو او په ځانگړې توگه ولسمشر کرزي ډېره مطرح کړې ده. افغان مشر په يوې وينا کې په ژړغوني غږ پر دغې مسالې وير کړى و .

چارواکي د ولس د زړۀ او ذهن په گټلو کې د دغه ډول پېښو مخنيوى خورا مهم بولي. په افغانستان کې له ميشتو نړيوالو ځواکونو سره هم پر دې مسالې کابل څو ځلي خبرې کړي دي .

خو ښايي دا لومړى ځل وي چې ولسمشر بوش دغه خبره دومره سپينه يادوي . د ناټو له سرمنشي سره د يوۀ گډ خبرې کنفرانس په ترڅ کې ښاغلي بوش هغه افغانان چې خپل خپلوان يې وژل شوي ياد کړل او ويې ويل چې دى ورسره په وير کې شريک دى.

د ولسمشر بوش او ښاغلي شيفر پيغامونه ښيي چې د افغان چارواکو پر لپسې يادونو بالاخره په مهمو سياسي کړيو کې ښايي ځاى نيولى وي

د ناټو سر منشي ياپ دي هوپ شيفر ملکي وگړو ته د ځينو اوښتو زيانونو مخنيوى له امکانه ليرې وبالۀ.

د خبري کنفرانس دواړو ويناوالو پړه د وسله والو طالبانو پر جنگي تکتيکونو واچوله. دوى وسله وال طالبان تورنوي چې له ملکي کسانو څخه د ډال کار اخلي .

افغان پوځ هم دغه ډول څرگندونې پخوا درلودې . خو ولسمشر کرزي او افغان ولس په پوځي عملياتو کې د ناټو په څير له يوۀ پياوړي نړيوال ځواک څخه تل د دقت غوښتنه کړې ده .

همداپيغام ښايي ولسمشر بوش هم د ناټو سرمنشي ته په خپلو څرگندونو کې ورکاوۀ . د دغو پيغامونو اغېز به راتلونکى وخت ښکاروي .

خو څه چې د اوس لپاره شوي ښايي دا وي چې د افغان چارواکو پر لپسې يادونو بالاخره په مهمو سياسي کړيو کې ځاى نيولى دى.