د هلمند ولايت د گريشک ولسوالي په يوې مهمې لويې لارې پرته ده

گريشک د هلمند ولايت په شمال کې پر يوې مهمې لويې لارې پرته ولسوالي ده . د کندهار هرات لويه لاره د همدغې ولسوالۍ پر بازار تيريږي .

د گريشک ښارگوټى په هلمند کې له لشکرگاه وروسته دويم لوى بازار لري . خو اوسيدونکي يې وايي چې په تيرو ١٦ کلونو کې دغلته ښوونځي په منظم ډول نه دي فعاله شوي او ډيرى اوسيدونکي يې نالوستي پاتې دي .

دغه ولسوالي د مخدره توکو د قاچاق د ليږد راليږد مهم مرکز هم بلل شوى دى . د هلمند سيند د دغې ولسوالۍ له زړۀ تيريږي او په دې ډول د کرهڼې لپاره خورا ښيرازه مځکه همدغلته شته ده .

پر دغو مځکو د کوکنارو کرکيله ډيره کيږي خو وروسره د ميوه لرونکو ونو ډير باغونه هم شته دي . د پوځي چارو شننونکي په دې باور دي چې د همدغو باغونو له امله په گريشک کې د خرپ و ترپ جگړو ته شرايط ښه جوړ دي .

وسله وال طالبان له دغې ولسوالۍ څخه د کندهار ، فراه او د هلمند په شمال کې پرتو سيمو ته د تگ راتگ د يوې لارې کار اخلي .

دلته د افغانستان د ملي پوځ يو مهم غونډ له ډيرو کلونو ځاى پر ځاى دى .د طالبانو له نسکوريدو وروسته او هلمند ته د ناټو په مشرۍ کې د برتانوي ځواکونو له ورتگ سره په گريشک کې د ناټو يوه مهمه قرارگاه هم جوړه شوه .

د ځينو په گومان د گريشک ساتل او خوندي کول د افغانستان په لږ تر لږه درو ولايتونو کې د وسله والو طالبانو د فعاليتونو د ختمولو يا تر ډيره ځايه يې د شنډولو په مانا دي .

همدغه اهميت ته په پام سره د گريشک ولسوالي په تيرو څو کلونو کې په پرله پسې توگه د نښتو ، چاودنو او بمباريو شاهده ده .