ارش پاکطين له کابله

	د ولسمشر کرزي د وياند اوونيز خبري کانفرانس له لويه سره د هلمند په وروستيو پېښو را څرخيدۀ .

په کابل کې يوۀ خبري کانفرانس ته د وينا پر وخت د ولسمشر کرزي وياند کريم رحيمي ډاډ وښود چې د هلمند له گرمسير ولسوالۍ څخه به وسله وال طالبان ژر په شا کړي .

دغه ولسوالي په دې وروستيو کې وسله والو طالبانو نيولې ده .

د ولسمشر کرزي د وياند اوونيز خبري کانفرانس له لويه سره د هلمند په وروستيو پېښو را څرخيدۀ .

د هلمند د گرمسير ولسوالۍ په باب د ولسمشر کرزي د وياند نظر دا و چې افغان پوليسو په لوى لاس دغه ځاى طالبانو ته پراېښى دى .

د ښاغلي رحيمي استدلال دا و چې په گرمسير ولسوالۍ کې د افغان پوليسو شميره لږ وه او په پرله پسې توگه پرې د وسله والو طالبانو توغندي توغيدل .

څه موده وړاندې ولسمشر کرزي هم څو ځلي دغه يادونه وکړه چې گواکې په ليرې پرتو ولسواليو کې د افغان پوليسو شميره لږ ده او په ښو وسايلو هم نه دي سمبال شوي .

ولسمشر کرزي دغه ليرې پرتې سيمې هغه وبللې چې د ډيورنډ کرښې ته نژدې پرتې دي .

د ولسمشر وياند کريم رحيمي بې له دې چې ښکاره ووايي دا يادونه کوله چې گواکې پر وسله والو کسانو ډک گاډي له پاکستان څخه هلمند ته اوښتي دي . دۀ په دې برخه کې نور جزييات ورنه کړل .

د ولسمشر کرزي وياند يو وار بيا د ښاغلي کرزي هغه نظر تکرار کړ چې گواکې د ترهگرۍ اصلي ځالې له افغانستان څخه دباندې دي او نړيواله ټولنه بايد د هغو ځالو د له منځه وړلو لپاره کار وکړي .