خپلواک ساپى کابل

	د افغانستان په جنوب تقريبا ٤٠٠٠ برتانوي عسکر شته دي

خو هغه ټينگار وکړ چې ڼاتو يو سپيڅلي هدف تعقيبوي او ماموريت به يې برى ومومي .

" مونږه بايد دا ومنو چې وضعه له هغه څه نه چې مونږه فکر کوه ډيره ستونزمنه ده . د ډيرو تلفاتو سره سره د طالبانو سرسختي حيرانونکې ده او له هغې اندازې نه چې مونږه هيله کوله زمونږه هڅې زياتره په همدې باندې مترکزې شوي دي . چې په نتيجه کې د هيواد پرمختگ او بيا رغونه ځنډيدلې ده . سږ کال د کوکنارو کښت چې زمونږه د راتلو نه مخکې کرل شوي و له پخوا نه زيات دى او د پولې بلې غاړې ته د پاکستان پولې ته څېرمه نوې رامنځته شوې امنيتي تگلارې ښايي د راتلونکې لپاره د هيلو ډکې وي خو په نژدې وخت کې ښايي د طالبانو په فعاليتونو کې زياتوالى ووينو."

ښاغلي براون لندن کې و وينا په ترڅ کې د ڼاټو په نورو غړو هيوادو غږ وکړو چې بايد په افغانستان کې د ٢٥٠٠ نورو ځواکونو په هکله د ناټو غوښتنه ومني .

د جنوبي افغانستان په هلمند ولايت کې د ناتو په ځواکونو کې ٤٠٠٠ برتانوي عسکر شامل دي .

ښاغلي برا ون وويل هغه انتقاد کونکي چې په افغانستان کې په نولس سوه اتيايمو کلنو کې د شوري او د نولسمې پيړى په باى او دشلمې پىړى په پيل کې د برتانيا د ناکامې ذکر کوي دناټو ددې نوي ماموريت په ماهيت نه پوهيږي .

ښاغلي براون وويل " مونږ يرغل نه دې کړې . مونږ د يو داسې حکومت په بلنه تللې يو چې مشروعيت او ملاتړ لري "

هغه زياته کړه چې په ٢٠٠١ميلادي کال کې د طالبانو د ظالم رژيم د ړنگيدو وروسته افغانستان کې نوي ښونځي او روغتونونه جوړ شوي دي . نوي روزگارونه رامنځ ته شوي او کډوال بيرته خپل هيواد ته راستانه شوي دي .

د ناټو ماموريت

د افغانستان په سويل کې د بيا بيا لپاره د طالبانو له لورې د سيمو لاندې کولو او د جگړو بې سارې پراختيا په دغه سيمه کې د ناتو ماموريت له پوښتنو سره مخامخ کړيدى .

دغو جگړو د ناتو د هغو ژمنو مخه هم اړولې چې ويل يې د خلکو زړونه به گټي او د ملکي تلفاتو مخه به نيسي . خو په افغانستان کې د ناتو پوځي چارواکي وايي چې د مني تر پايه به د دغې سيمې په حالاتو کې ژور بدلون راشي .

په کابل کې زموږ همکار خپلواک ساپي د ناتو همدغه ماموريت ته ديو کتنې په ترڅ کې وايي :
د افغانستان په سويل کې د ناتو د پوځي ماموريت له پيله بيا تر اوسه دوه مياشتې تيريږي . په دغه موده کې په ټوله سيمه کې جنگ جگړو په بې ساري ډول زور اخيستى .

	دناټو ځواکونه په هلمند کې په عملياتو بوخت و

نږدې هره ورځ له وسله والو طالبانو سره د نښتو خبر ورکول کيږي . دا په داسې حال کې ده چې ناتو د خپل ماموريت د پيل په مهال د بيا رغونې د پروژو د مخې ته کولو له لارې د خلکو د زړونو د گټلو ژمنه کړې وه . اوس داسې ښکاري چې په سيمه کې د طالبانو د پرله پسې مقاومت له کبله د ناتو دغه ماموريت هم د سيمې اقتصادي پرمختگ ته د پام اړولو پر ځاې ورو ورو د بريد او مقابلې بڼه خپلوي .

په کابل کې د ناتو ملکي وياند مارک ليتي دا مني چې د ماموريت بڼه له لومړنيو اټکلونو د لږ څه بدلون په حال کې ده .

(( البته چې د ماموريت په بڼه کې يو څه بدلون راغلى . څه چې زموږ له راتلو وروسته پيښ شوي ، هغه د جگړو ډيروالى دى . دا د ناتو په گډون د ډيرو له اټکله وتلې خبره وه . طالبان د سيمو د لاندې کولو او هلته د خپلو پښو د ټينگولو په هڅه کې دي . نو ځکه خو موږ جگړې او مقابلې ته اړيو او ددې پايله په سيمه کې د تاو تريخوالي ډيريده دي . ))

ڼاټو په دې جگړو کې د سوونو طالبانو د وژلو خبره کوي . طالبان بيا له خپل لورې د ناتو ځواکونو او افغان سرتيرو ته د سر د درانه تاوان د اړولو ادعا لري .

ملکي تلفات

د سيمې ملکي استوگن بيا دا گني چې د دغو جگړو اصلي قربانيان گواکې همدوى دي . د کندهار د پاشمول اوسيدونکى ميزا محمد چې کور او کرونده يې په جگړه کې ويجاړه شوې ، دواړو لورو ته د پړې گوته نيسي .

(( که طالب ځان نامې بولي خو وردې شي ، دوى هلته پر وچ ډاگ پراته دي ، ورسره معلومه دې کړي . که فير پرې کوي او که ځان پرې چوي . د طالبانو ځاى هم معلوم دى . ناتو دې هلته ورشي او ورسره معلومه دې کړي . خو زموږ سر په دې نه خلاصيږي چې دوى دواړه لوري ولې زموږ د کورونو مينځ ته راځي او په جگړو کې موږ تباه کوي . ))

د سيمې يوه بله استوگنه چې د نوم له ښودو ډډه کوي وايي چې د ناتو او اتلافي ځواکونو د فعاليتونو تر مينځ څه توپير نه ويني .

(( که ناټو ده که امريکايان دي ، موږ يو هم نه پيژنو . اول امريکايانو بمبارئ کولې او اوس ناټو بمبارئ کوي . موږ د کور پريښودو ته اړوتي يو او دا دى ښار ته راغلي يو . موږ له مرستو تير يو خو بمبارۍ دې راباندې نه کوي . ))

	خلک د پوځي عملياتو په ترڅ کي د ملکي تلفاتو په اړه انديښمن دي

خو ناتو د ملکي وگړو د تلفاتو او تاوانونو پړه پر طالبانو اچوي . وياند ليتي د پنجوايي وروستي عمليات يادوي او وايي چې طالبانو گواکې په دغه جگړه کې له ملکي وگړو نه د سپر په توگه کار واخيست .

(( موږ د ملکي وگړو خونديتوب ته ډير پام کوو . موږ د مديوسا د عملياتو په مهال د خلکو د خبرولو لپاره له هوا نه پاڼې وشيندلې . له قومي مشرانو سره مو سلا مشورې وکړې . د مطبوعاتو له لارې مو خبر دارى ورکړ. تاسو وواياست ، له دې زيات څه کيدى شي . خو طالبان د دوى په کورونو ورننوتل او مورچې يې پکې جوړې کړې . ))

خلک اصلا له چا سره دي ؟

دافغانستان په سويل کې د ناتو د روان ماموريت په تړاوو داسې گنگوس هم شته چې دغه ماموريت که ناکام ونه بلل شي نو لږ تر لږه له سختو خنډونو سره مخامخ دى . خو په کابل کې د ناټو پوځي وياند لوک کينيټيگ وايي چې جبهه د خلکو له فکرونو تيريږي اودا چې خلک گواکې له دوى سره دي ، نو ځکه خو دوى گتونکي دي .

(( دلته جبهه د خلکو فکرونه دي . ښکاره ده چې د وگړو اکثريت طالبان نه غواړي . خلک سولې ته اړتيا لري او موږ هغوى ته د سولې د ورکولو لپاره دلته يو . موږ د دې لپاره نه يو چې د طالبانو په اشاره نڅا وکړو . موږ به په يوه وخت په ټول هيواد کې په هغوى پسې ونه گرځو ، بلکه په ځانگړو سيمو کې به هغوى راايساروو او ځپو به يې . ))

	" لنډ مهالې ستونزې د ناکامى په معنا ندي "

په افغانستان کې د ناتو د ځواکونو قوماندان جنرال ديويد ريچارد هم وايي چې لنډ مهاله ستونزې د ناکامۍ معنا نلري .

(( لنډ مهاله ستونزو موږ نه يو مات کړي . موږ يو ډير ښه پلان لرو چې په اړه يې زموږ له امريکايي ملگرو او افغان حکومت سره پوره پوره سلا مشورې شوي . زما باور دى چې له دغه پلان نه به د مني تر پايه ښې پايلې راووزي او حالات به په سويل کې ژور بدلون ومومي . ))

له عملياتو وروسته بايد څه وشي

خو په ولسي جرگه کې د کندهار ولاېت وکيل خالد پښتون سيمې ته په بيا بيا د طالبانو د راستنيدو لامل د حکومت د بې پروايي پايله بولي . داسې چې په وينا يې له طالبانو نه د سيمو د پاکولو تر شا بيرته د سيمو خونديتوب ته گواکې پام نه کيږي .

(( دلته يو لوى مشکل دا دى چې له عملياتو وروسته تعقيب او لټونه نه کيږي . دولت بايد د طالبانو د پاتې کسانو د نيولو هڅه وکړي . درې کاله مخکې همداسې کيدل . ))

خو جنرال ريچارد وايي چې دوى به له دې وروسته کله هم اجازه ورنکړي چې د دوى تر کنټرول لاندې سيمو ته طالبان بيرته ورستانه شي .

(( موږ به بيا دغه لوبه تکرار نه کړو . موږ به په ځانگړې سيمه کې امنيت راولو . د حکومت واک به ورغزوو او نړيوالې ټولنې ته به د بيا رغوونې شرايط برابر کړو. زموږ تکل دا دى چې په ځانگړي ځانگړې سيمه کې د طالبانو اغيز ختم کړو . ))

خو له دې ټولو سره سره ځان وژونکي او د سړک د غاړې بمي بريدونه داسې يو گواښ دى چې ناتو يې هم کابو کول د اوس لپاره ستونزمن بولي . د دې بيلگه د پنجوايي د دوشنبې د گهيځ بمي بريد وو چې د سيمې د ملکي وگړو د ژوبلې تر څنگه يې څلور کاناډايي سرتيري ووژل .