د طالبانو کډوالو چارو وزارت؛ له ایرانه تر ۳۰۰۰ ډېر افغان کډوال هرات ته شړل شوي
د عکس سرچینه، @MoRRAfg
د طالبانو د کډوالو چارو وزارت وايي، ایران د هرات له لارې تر ۳۰۰۰ ډېر افغان کډوال افغانستان ته شړلي دي.
په دې کې ۲ زره او ۸۴ کسه کډوال د ۹۶ کورنیو په بڼه شړل شوي او تر یونیم زر ډېر مجرد کسان هم پکې دي. دوی د اسلام کلا او ابرېشم پل له لارې افغانستان ته شړلي دي.
ایران نژدې هره اونۍ سلګونه او آن ځینې وخت زرګونه افغان کډوال خپل هېواد ته استوي.
د طالبانو د کډوالو وزارت پر ټویټر پاڼه لیکلي چې تېره اونۍ هم نژدې ۲۰۰۰ افغان کډوال د نیمروز له لارې افغانستان ته استول شوي وو.
ایران وايي د میلیونونو افغان کډوالو کورب دی او دا شمېر تېر کال پر افغانستان د طالبانو له واکمنۍ راهیسې لا ډېر شوی دی.
د طالبانو د کډوالو وزارت وايي، په دې کډوالو کې ۴۷۶ تنه یې د مرستې ترلاسه کولو لپاره IOM یا د کډوالو نړیوالې ادارې ته معرفي شوي دي.
هر کال ګڼ شمېر افغانان د ایران له لارې په قاچاقي ډول ترکیې او بیا اروپايي هېوادونه ته د تللو هڅه کوي چې ګڼ شمېر یې نېول شوي او بېرته ډیپورټ شوي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
ځینې کډوالو بي بي سي پښتو ته ویلي چې د ایران او ترکیې ترمنځ پوله کې د دواړو هېوادونو پولیسو ناسم چلند ورسره کړی دی خو ایران تل ټینګار کړی چې کډوالو سره ناسم چلند نه کوي.
تېره اونۍ د بشري حقونو د څار سازمان په ایران او ترکیه له دې امله نیوکې کړې وې چې ګواکې په زور او فرېبانه ډول افغان کډوال له خپل هیوادونو بیرته افغانستان ته ستنوي.
د بشري حقونو د څار نړیوال سازمان له ترکیې او ایرانه غوښتي وو چې له افغان کډوالو سره د کډوالۍ د نړیوالو اصولو له مخې چلند وکړي.
