تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د کرېکټ د ۱۹ کلنو لوبډلو نړیوال جام: افغانستان ایرلنډ ته ۳۱۶ منډې هدف وټاکه
د کرېکټ له نوولس کنو کمعمره لوبډلو د ۲۰۲۶ کال یو ورځینو سیالیو د نړیوال جام شپږ غوره لوبډلو (سوپر ۶) پړاو کې د افغانستان او ایرلنډ ترمنځ برخلیک ټاکونکې لوبه روانه ده.
افغان لوبډلې د ټاس له ګټلو وروسته لومړۍ توپوهنه وکړه او په ټاکلو ۵۰ اوورنو کې یې د ۷ لوبغاړو په سوځېدو سره ایرلنډ ته د ۳۱۶ منډو هدف وټاکه
د افغانستان له اړخه توپوهنه کې تکړه ښي لاسي توپوهونکي فیصل خان شینوزاده په ۱۴۲ توپونو له څه باندې ۱۱۴ سټرایک رېټ سره ۱۶۳ منډې وکړې.
هغه ۱۸ څلوریزې او یوه شپږیزه ووهله.
لوبډلمشر محبوب خان هم د ۵ څلوریزو او ۲ شپږیزو په مټ ۸۹ چټکې منډې وکړې او وروستي اوور کې وسوځېد.
د یادونې ده چې محبوب خان او فیصل شینوزاده د افغانستان له ۱۹کلنو کمعمره لوبډلې لپاره توپوهنه کې د اوږدې ملګرتیا نوی ریکارډ هم جوړ کړ.
دوی دواړو په ۱۵۷ توپونو د ۱۸۸ منډو ملګرتیا وکړه.
تر دې مخکې د افغانستان د تنکیو ځوانانو د توپوهنې اوږده ملګرتیا (پارټنرشیپ) ۱۵۲ منډې وه.
هغه پارټنرشیپ هم د فیصل شینوزاده او خالد احمدزي ترمنځ په روان نړیوال جام کې د سویلي افریقا خلاف سیالۍ کې ثبت شوی و.
د ایرلنډ له اړخه په توپ اچوونه کې روبن وېلسن او اولیور رایلي درې - درې ویکټې ترلاسه کړې.
دا سیالي د زمبابوې د پلازمېنې هرارې په لوبغالي کې کېږي.
ایرلنډ د دې لوبې له ګټلو سره هم بل پړاو ته نشي وتلی، خو افغانستان لپاره بیا ځکه مهمه ده چې له دې بریا سره د نړیوال جام نیمهپایلوبې ته لار مومي.
د افغانستان لپاره نن د محبوب خان په مشرۍ لوبډله کې فیصل شینوزاده، عثمان خان سادات، خالد احمدزی، عزیر خان، عزیزالله میاخېل، عبدالعزیز خان، واحد ځدراڼ، روحالله عرب، عقیل خان او نصرت نورستاني لوبه کوي.
دا د شپږ غوره لوبډلو پړاو کې د ایرلنډ او افغانستان دواړو دویمه او وروستۍ لوبه ده.
افغان تنکیو ځوانانو چې د روان نړیوال جام په لومړي یا ګروپي سټېج کې یې خپلې درېواړه لوبې ګټلې وې، په سوپر شپږ پړاو کې لومړۍ لوبه شريلنکا ته وبایلله.
د ایرلنډ لوبډلې بیا روان نړیوال جام کې تر دې دمه یوازې له جاپانه یوه لوبه ګټلې او د شپږ غوره لوبډلو په لومړي ګروپ کې تر ټولو وروستی ځای لري.
په دغه ګروپ کې له افغانستان او ایرلنډ سره د استرالیا، سویلي افریقا، وېسټ اینډیز او شريلنکا لوبډلې ملې دي.
که افغان زلمیان نننۍ لوبه وګټي، نو له لومړي ګروپ څخه به له خپلو استرالیايي همزولو سره نیمه پایلوبو ته ووځي.
استرالیا په دې پړاو کې خپلې دواړه لوبې ګټلې او له ۸ پواینټونو سره د ګروپ د سر لوبډله ده.
افغانستان د لومړي سټېج د بریاو له کبله څلور پوانیټونه او ښه رن رېټ لري او له دې بریا سره یې د نمبرو شمېر شپږو ته لوړېږي.
د افغانستان ماته بیا شريلنکا چې وار دمخه ۶ پوانیټونه لري، خو رن رېټ یې منفي دی، نیمه پایلوبې ته رسوي.
په دویم ګروپ کې هند، انګلنډ، پاکستان، بنګلهدېش، نیوزیلنډ او زمبابوې لوبډلې سیالي کوي.
له دغه ګروپه د هند، انګلنډ او پاکستان له منځه دوه لوبډلې نیمهپایلوبو ته د رسېدو چانس لري.
انګلنډ نن له نیوزیلنډ او پاکستان د یکشنبې پر روځ له هند سره سیالي لري.
