پاکستان کې د تېلو د لوړې بیې نوی ریکارډ
د عکس سرچینه، EPA
د پاکستان مالیې وزارت اعلان کړی چې دغه هېواد کې یې د پېترول بیه لس روپۍ نوره هم لوړه کړې ده.
له دې سره پاکستان کې د یوه لیټر پېټرول بیه د ۲۸۲ روپیو ریکارډ کچې ته ختلې.
د پاکستان مرکزي حکومت یوازې روان کال تر دې دمه د پېترول بیه کې ټولټال ۶۷ اعشاریه ۷ روپۍ لوړوالی راوستی.
د روان کال جنورۍ کې د دغو تېلو بیه په یوه ځل په بې ساري ډول ۳۵ روپۍ لوړه شوه.
تر هغې را وروسته د روان کال فبرورۍ کې هم د پاکستان مرکزي حکومت د پېټرول د یوه لیټر بیه ۲۲ اعشاریه ۲ روپۍ لوړه کړه.
ژورنالیست شهباز رانا وايي پاکستان کې د تېل او ګاز د مقرراتو د تنظیم ادارې "اوګرا" د ډالر پر وړاندې د کلدارو د ارزښت پرېوتلو ته په کتو له ۳۰۰ روپیو د یوه لیټر پېټرول د بیې ختلو د احتمال یادونه کړې.
نوموړی زیاتوي چې ښايي د را روانې می میاشتې په لومړۍ نېټه د تېلو بیه نوره هم لوړه شي.
د پاکستان مالیې وزارت لخوا پرون شنبه په خپره شوې اعلامیه کې راغلي چې سر له نن یکشنبې (د اپریل ۱۶مې) له دغو لس روپیو سره د یوه لیټر پېټرول نوې بیه ۲۸۲ کلدارې ټاکل شوې.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د ډیزل بیه دمګړۍ پر خپل ځای ده او لوړوالی پکې نه لیدل کېږي.
خو د خاورو تېلو بیه بیا ۵ روپۍ لوړه او ۱۸۶ اعشاریه ته رسېدلې ده.
د پاکستان مالیې وزیر اسحاق ډار په یوه پیغام کې ویلي چې نړیوال بازار کې د تېلو بیه په تېرو ۱۵ ورځو کې ختلې ده.
هغه همدا راز د ډالر پر وړاندې د کلدارو د ارزښت پرېوتلو یادونه هم کړې.
د ۲۰۲۲ کال جولای کې په پاکستان کې د یوه لیټر پېترول بیه نږدې ۲۴۹ کلدارو ته رسېده.
دا هغه مهال د تاریخ تر ټولو لوړه بیه وه.
