دانش: افغانستان کې د شیعه او هزاره وګړو د شمېر په اړه د امریکا رپوټ ناسم دی
د عکس سرچینه، Social media
د افغانستان د ولسمشر دویم مرستیال سرور دانش د امریکا د بهرنیو چارو وزارت په هغه رپوټ نیوکه کړې چې د افغانستان د وګړو شمېر او د بېلابېلو توکمونو د سلنې په هکله یې خپور کړی چې وايي هزاره او شیعه د افغانستان د نفوس له ۱۰ تر ۱۵ سلنه جوړوي. دغه راپور په ۲۰۱۹ کال کې جوړ شوی وو او تېره اونۍ خپور شو، او د افغانستان د ټولو وګړو شمېر پکې ۳۵،۷ میلیونه ښوول شوی.
ښاغلی دانش وايي د هزاره او شعیه ګانو په اړه دا شمېرې کره نه دي او د امریکا د بهرنیو چارو وزارت څخه یې غوښتي که په دې اړه کره سرچیني لرې نو وړاندې دې کړي.
که څه هم دا راپور شاوخوا یوه اوونۍ مخکې خپور شوی، خو د ښاغلي دانش څرګندونو یو ځل بیا په افغانستان کې د مذهبي او قومي جوړښت په اړه بحث راولاړ کړی دی.
په افغانستان کې د قومونو او مذهبونو د وګړو شمېر موضوع بحث پارونکې او ډېره حساسه موضوع ګڼل کیږي، او له همدې کبله د امریکا د بهرنیو چارو وزارت دې وروستي رپوټ غبرګونونه را پارولي دي.
د ښاغلي دانش د دفتر ریس محمد هدایت وايي، شیعه ګانو ته دغه شمېرې د منلو نه دي، د خلکو غبرګونونه لامل شوي چې ښاغلی دانش د امریکا د بهرنیو چارو وزارت د راپور پر وړاندې اعتراض وکړي. نوموړی وایي:
"دغه شمېرې لږ ترلږه د افغانستان د شیعه او هزاه قوم لپاره د منلو نه دي. په خواشینۍ سره چې موږ هم په افغانستان کې د قومونو ، لږکیو او ولایتونو په اړه کره شمېرې نه لرو. چې دا د ناسم پوهاوي لامل کیږي. نو له همدې کبله د ولسمشر مرستیال هم د خلکو د غبرګونونو په تړاو پر خپله ټویټر پاڼه ولیکل چې دا شمېرې کره او ریښتینې نه دي. "
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د امریکا د بهرنیو چارو وزرات په راپور کې ویل شوي په افغانستان کې د شعیه ګانو ۹۰ سلنه رهبران د هزاره توکم څخه دي چې زیاتره یې جعفري دي، دغه رازه اسماعیلیه شعیه ګان هم شته.
په راپور کې دا هم ویل شوي په دغه هېواد کې د سني او شعیه وګړو په تړاو د منلو وړ اطلاعات نشته.
د ولسمشر دویم مرستیال ویلي په افغانستان کې د قومونو او وګړو شمېر په اړه د باوري شمېرو نه شتون د دغه هېواد له ستونزو څخه ده او حکومت غواړي دغه ستونزه د برېښنايي تذکرو د ویش له لارې حل کړي. ښاغلي دانش ویلي اړوندې ادارې غواړي چې د برېښنايي تذکرو ویش بهیر ګړندی کړي.
افغان حکومت د یو شمېر سیاستوالو له مخالفت سره سره د ۱۳۹۷ کال په پسرلي کې دغه بهیر پیل کړ. خو د ویش بهیر ډېر ګړندی نه دی او تر اوسه شاوخوا اته سوه زرو کسانو دغه تذکرې اخیستې دي.
په برېښنايي تذکرو کې د شخصي معلوماتو سربېره د قوم، ملت او دین په اړه هم معلومات ځای پر ځای شوي، هغه څه چې د ډېرو په باور په افغانستان کې د کره شمېرو ستونزه به تر یوه حده حل کړي.
