داعش کابل کې پر جومات د خونړي برید مسؤولیت منلی، د وژل شویو شمېر ۵۶ ته ختلی
د عکس سرچینه، Reuters
د افغانستان پلازمېنه کابل کې د شیعه ګانو پر یوه جومات د جمعې ورځې د ځانمرګي برید مسؤولیت"اسلامي دولت" نومې ډلې منلی دی. د کورنیو چارو وزارت وايي، په برید کې د وژل شویو شمېر ۵۶ تنو ته رسېدلی، چې درې پکې ښځې دي.
سرچینه وايي د درو ښځو په ګډون ۵۵ کسان ټپیان شوي دي.
ویل کېږي په وژل شویو او ټپیانو کې ماشومان هم شته.
دغې ډلې ویلي، یوه ځانمرګي بریدګر یې لومړی جومات کې پر لمونځ کوونکو ډزې پیل کړې او بیا یې پر ځان پورې تړلي چاودېدونکي توکي چوولي دي.
کابل کې پر جومات برید (انځورونه)
"اسلامي دولت" ډلې نه دي ویلي چې د جمعې په ورځ د مرکزي فراه ولایت یوه جومات کې برید دوی کړی او که څنګه.
په دې برید کې شل کسان ووژل شول.
په وژل شویو کې یو حکومت پلوی پخوانی قومندان هم دی.
د شنبې په ورځ وختي د کابل پر زرغونې سیمې ځینې توغندي لګېدلي، خو تر اوسه یې د مرګ ژوبلې اړولو په اړه رپوټونه نه دي ورکړل شوي.
داعش کابل کې د جمعې په ورځ د ماښام لمانځه پرمهال یو جومات په نښه کړ.
افغانستان کې د هالنډ سفیر ویلي، په دې غمجنه اونۍ کې ګڼ ولسي وګړي وژل شوي، چې ځینې یې ان د لمانځه پرمهال وژل شوي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د افغانستان حکومت ویلي، ددغه برید ټول قربانیان لمونځ کوونکي دي.
عیني شاهدانو ویلي بریدګر لومړی په لمونځ کوونکو ډزې وکړې او وروسته یې په ځان پورې تړلیو باروتو ته چاودنه ورکړه.
لومړنی برید د مرکزي ولایت غور په دولینه ولسوالۍ کې په یوه جومات کې د مازدیګر لمانځه پرمهال وشو چې د چارواکو په وینا د یوه دولت پلوي قومندان په ګډون یې ۲۰ کسان ووژل.
د عکس سرچینه، ATA MOHAMMAD NOOR/FB
ولسمشر محمد اشرف غنی او اجراییه رییس عبدالله عبدالله دغه برید غندلی دی. ولسمشر غني ویلي، هغه څوک چې دغسې بشر ضد جنایتونه کوي، د (نابودۍ) مستحق دي.
دا اوونۍ ګردېز، غزني، کندهار او بیا پلازمېنه کابل کې خونړیو بريدونو کې د ګڼ شمېر ملکيانو په ګډون لسګونه کسان ووژل شول او نژدې درې سوه نور په کې ټپيان شول.
