د اهواز برید غبرګون کې پر سوریه د ایران توغندیز برید
د عکس سرچینه، MEHAR
د ایران سپاه پاسدران وايي، د سوریې د فرات ختیځ ته یې هغه سیمه په څو بالستیک توغندیو ویشتلې ده، چې د اهواز برید پلانوونکو مرکز پکې دی.
د ایران دولتي رسنۍ وايي، سپاه پاسدران په بیانیه کې زیاتوي چې دې برید کې یې "ګڼ تکفیري ترهګر" وژلي دي.
د دې رپوټ له مخې برید د دوشنبې په ورځ( د اکټوبر اوله) سهار شوی او پکې له ځمکې- ځمکې ته توغېدونکي بالستیک کارېدلي دي.
که څه هم سپاه د توغندیو د توغولو ځای نه ښيي، خو د پنځو ګوزار شویو توغندیو ویډیووې په ټوېټر کې خپرې شوې او ادعا کېږي چې له کرمانشا توغول شوي دي.
د دې ویډیوو له مخې داسې ښکاري چې یو توغندی د توغېدو له ځای سره غورځي، خو بي بي سي دا ویډیووې تاییدولی نه شي.
د اهواز برید
د عکس سرچینه، EPA
د سپټمبر پر ۲۲ د ایران اهواز کې وسلوالو پر پوځي پرېډ برید وکړ چې له امله یې د سپاه پاسدران د ۱۲ غړو په ګډون لږ تر لږه ۲۵ کسان ووژل او نږدې ۵۰ کسان ټپیان شول.
ویل کېږي د هغه برید دوه وسلوال وژل شوي او دوه نیول شوي وو.
له برید یوه ورځ وروسته داعش یا اسلامي دولت ډلې د بریدګرو ویډیو خپره کړه چې له برید مخکې ریکارډ شوې وه او ادعا یې وکړه دا حمله دوی کړې ده.
د ایران د اطلاعاتو(استخباراتو) وزارت له هغه برید دوه ورځې وروسته وویل چې په دې تړاو یې ۲۲ کسان نیولي دي.
د دې وزارت بیانیه کې راغلي و: "په پېښه کې ښکېل او ملاتړي ۲۲ کسان هم نیول شوي دي. په دې برخه کې د دې ترهګریز برید بهرني ملاتړي او لارښوونکي هم پېژندل شوي".
ایراني چارواکو دا هم ویل، چې د نیول شویو کسانو په کورونو کې یې باروت، پوځي وسایل او اړیکتیايي الې هم موندلې او ضبط کړې دي.
سعودي او امارات تورنول
د عکس سرچینه، khamenei.ir
د ایران مدهبي مشر ایت الله علي خامنه يي له برید دوه ورځې وروسته د دې برید عاملان په سعودي او اماراتو پورې تړلي وبلل.
هغه یوې غونډې ته وینا کې وویل: "د رپوټونو له مخې دا کار د هغو ډارنو دی چې سوریه او عراق کې نیول کېږي، امریکا یې ژغوري او لاسونه یې د سعودي او عربي اماراتو په جیب کې دي".
د ایران ولسمشر حسن روحاني کوم هېواد ته له ګوتې نیولو پرته وویل، روښانه ده چې دا برید چا کړی دی.
خو د دغه هېواد د بهرنیو چارو وزیر جواد ظریف د پېښې په ورځ وویل، د ترهګرۍ ملاتړي سیمه ییز لوبغاړي او امریکايي استادان یې باید ځواب ووايي.
امریکا او اماراتو په دغه برید کې لاس لرل رد کړي دي.
