A bheil am bus seo a' dol gu...? Gàidhlig ga brosnachadh air na busaichean

Tha draibhearan bhusaichean poblach sna h-Eileanan a' gabhail pàirt ann an iomairt ùr gus a' Ghàidhlig a bhrosnachadh, cleas mar a tha draibhearan tagsaidh na sgìre.

Chì luchd-siubhail a bheil Gàidhlig aca agus soidhnichean follaiseach gu bhith orra fhèin agus air na busaichean aca.

'S e co-obrachadh mì-fhoirmeil a th' anns an iomairt eadar An Taigh Cèilidh, Sgioba na Gàidhlig aig Comhairle nan Eilean Siar agus na companaidhean bus.

Dh'òrdaich an Dr Teàrlach Wilson, Àrd-oifigear An Taigh Cèilidh baidsean agus steigearan bho Bhòrd na Gàidhlig air a bheil sgrìobhte 'Cleachd i'.

Bha seo an dèidh do dhraibhear bus thighinn a-steach dhan chafe Ghàidhlig a' faighneachd an robh an leithid aca dìreach mus do thòisich Seachdain na Gàidhlig.

Thuirt an Dr Wilson: "Bha draibhearan nam busaichean airson a bhith mar phàirt dheth, agus airson sealltainn don phoball gum faod iad a' Ghàidhlig a chleachdadh air na busaichean cho math ri sna tagsaidhean!"

Thòisich a' chomhairle iomairt bho chionn ghoirid airson draibhearan tagsaidh aig a bheil a' Ghàidhlig a mhisneachadh a bruidhinn leis an fheadhainn dha bheil iad a' toirt còmhdhail.