Bliadhna nan Òran air dachaigh ùr fhaighinn aig Tobar an Dualchais
- Air fhoillseachadh
Bidh 600 òran Gàidhlig rim faotainn air-loidhne, taobh a-muigh bho an-diugh le compàirteachas ùr eadar am BBC agus Tobar an Dualchais.
B' àbhaist do na h-òrain a bhith air an làraich-lìn Bliadhna nan Òran aig a' BhBC, agus an goireas ùr a' toirt a-steach faclan nan òran, a thuilleadh air clàraidhean-fuaime agus eachdraidhean-beatha nan seinneadairean 's nam bàrd a rinn na h-òrain.
Chaidh Bliadhna nan Òran a chur air bhog ann an 2010 mar phàirt de bhliadhna shònraichte de dh'òrain aig BBC Radio nan Gàidheal, agus rannsachadh mòr air a dhèanamh tro chlàraidhean ann an Tasglann a' BhBC.
Thèid Clàr nan Òran Gàidhlig a chomharrachadh ann an diofar phrògraman air BBC Radio nan Gàidheal ann an Seachdain na Gàidhlig (23 Gearran – 1 Màrt), a' tòiseachadh le 'Mire ri Linda' aig 10:00m-12.00f an-diugh le Linda NicLeòid aig an stiùir.
Thèid am prògram a chraoladh bho stiùidio a' BhBC an Inbhir Nis le seinn bheò bho Chalum Ailig Mac a' Mhaoilein, Cairistìona Cheanadach, Donnchadh MacLeòid is Saffron Hanvidge.
A bharrachd air sin, bidh taghadh de chlàraidhean bho thasglann 'Bliadhna nan Òran' ri chluinntinn.
Bidh sgeulachdan agus naidheachdan mu na h-òrain, seinneadairean, is bàird a' nochdadh air 'Naoi gu Deich' madainn Dimàirt agus madainn Diardaoin
Bidh fiosrachadh mu sheinneadairean agus bàird an lùib a' ghoireis ùir
"Tha Clàr nan Òran Gàidhlig a' cur gu mòr ri làrach-lìn Tobar an Dualchais agus tha sinn fada an comain a' BhBC airson a bhith ag obair cuide rinn gus susbaint 'Bliadhna nan Òran' a ghluasad dhan làraich-lìn againn," thuirt Stiùiriche Tobar an Dualchais, Flòraidh Forrest.
"Tha an gluasad seo gu Tobar an Dualchais a' ciallachadh gum bi na h-òrain agus am metadata air a ghlèidheadh fad iomadh bliadhna ri thighinn."
Chaidh Bliadhna nan Òran a dhealbh bho thùs le Jo NicDhòmhnaill.
Thuirt Ceannard Seirbheisean Gàidhlig a' BhBC, Mairead Màiri Mhoireach, gur e naidheachd air leth a th' ann gun d' fhuair an tasglann dachaigh ùr.
"Tha sinn cho toilichte gun deach an goireas iongantach, beartach is iomadh-chuimseach seo, a chaidh a chruthachadh le Jo NicDhòmhnaill agus a chleachdadh le mìltean de dhaoine thairis air na còig bliadhna deug a dh'fhalbh, ùrachadh agus gun d' fhuair e dachaigh iomchaidh aig Tobar an Dualchais.
"Bheir e cothrom do dhaoine òrain is fiosrachadh a lorg, ath-lorg agus a rannsachadh air 'Clàr nan Òran Gàidhlig."
Thèid an goireas a leudachadh thar nan seachdain ean agus nam mìosan ri teachd, gus goireas maireannach a chruthachadh do dhaoine air feadh an t-saoghail le ùidh ann an òrain Ghàidhlig.
Fhuair Tobar an Dualchais maoineachadh bho Riaghaltas na h-Alba, Iomairt na Gàidhealtachd 's nan Eilean, Maoin nan Ealan Gàidhlig, agus Urras Brosnachaidh na Gàidhlig a dh'ionnsaigh cosgaisean an leasachaidh.
