रायगडमध्ये बस दरीत कोसळली, 13-14 जण मृत्यूमुखी पडल्याची भीती

जुन्या पुणे-मुंबई महामार्गावर शिंगरोबा मंदिराच्या पाठीमागच्या घाटामध्ये खासगी बस दरीत कोसळल्याची घटना घडली आहे. या बसमध्ये 40 ते 45 लोक होते.

अपघातात 13-14 लोक मृत्यूमुखी पडल्याची भीती असल्याचं बचाव पथकातील कर्मचाऱ्याने पीटीआयशी बोलताना म्हटलं आहे.

मृतांमध्ये महिला आणि लहान मुलांचा समावेश असल्याची शक्यताही या कर्मचाऱ्याने व्यक्त केली.

अडकलेल्या प्रवाशांना बाहेर काढण्याचं कामही सुरू आहे.

जखमी प्रवाशांना खोपोली नगरपालिकेच्या रुग्णालयात दाखल करण्यात आलं आहे. सध्या त्यांच्यावर उपचार सुरु आहेत.

अपघातग्रस्ताच्या मदतीला हायकर्स ग्रुप, आयआरबी टीम दाखल झाली आहे. खाजगी रुग्णालयातील डॉक्टर्सनाही मदतीसाठी बोलावण्यात आलं आहे.

या खाजगी बसमध्ये बाजी प्रभू वादक गट (झांज पथक) गोरेगाव येथील लोक होते. ते पुण्याचा कार्यक्रम संपवून गोरगावला परत चालले होते.

मृतांच्या नातेवाईकांना 5 लाखांची मदत - मुख्यमंत्री

मुख्यमंत्री कार्यालयाकडून ट्वीटद्वारे सांगण्यात आले आहे की, "जुन्या मुंबई-पुणे महामार्गावर खाजगी बस दरीत कोसळून झालेल्या भीषण अपघाताबद्दल मुख्यमंत्री एकनाथ शिंदे यांनी तीव्र दुःख व्यक्त केले आहे. अपघातातील मृत आणि त्यांच्या कुटुंबिंयाप्रति सहवेदना प्रकट करुन मृतांच्या नातेवाईकांना प्रत्येकी 5 लाख रुपयांची मदत जाहीर केली आहे.

"अपघाताची माहिती मिळताच मुख्यमंत्री एकनाथ शिंदे यांनी रायगड जिल्हाधिकारी, पोलीस अधिक्षकांशी दूरध्वनीवर संपर्क साधून घटनेची माहिती घेतली. अपघातग्रस्तांना तातडीने मदत करण्याच्या सूचना देतानाच जखमींना शासकीय खर्चाने तात्काळ वैद्यकीय उपचार पुरविण्याचे निर्देशही मुख्यमंत्र्यांनी दिले.

"अपघातानंतर तातडीने मदतकार्यात सहभागी झालेल्या हायकर्स आणि आयआरबी टीममधील तरुणांशीदेखील मुख्यमंत्री एकनाथ शिंदे यांनी चर्चा केली, या संकटसमयी मदतकार्यात तातडीने धावून आल्याबद्दल या टीमच्या सदस्यांचे त्यांनी कौतुक केले."

विरोधी पक्षनेते अजित पवार यांनीही या घटनेबाबत दु:ख व्यक्त केलं.

अजित पवार ट्वीटद्वारे म्हणाले की, "जुन्या पुणे-मुंबई महामार्गावर बोरघाटात खासगी बस दरीत कोसळून प्रवासी मृत्यू पावल्याची घटना दुर्दैवी,वेदनादायक आहे. घटनेतील जखमींना तत्काळ उपचार मिळून त्यांच्या प्रकृतीत लवकर सुधारणा व्हावी,ही प्रार्थना.मृतांना भावपूर्ण श्रद्धांजली!त्यांच्या कुटुंबियांच्या दुःखात आम्ही सहभागी आहोत."

हेही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता. 'गोष्ट दुनियेची', 'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)