Космонавттар Жерге кайтты: Жезказгандагы капсула, космостогу футбол тобу
Эл аралык космос станциясынын экипажы жекшембиде Жерге кайтып келди. Космосто беш ай убакыт болгон космонавттар орусиялык Антон Шкаплеров, америкалык Скотт Тингл жана жапониялык Норишиге Канаи олтурган капсула Казакстандын Жезказган шаарынан анчейин алыс эмес аралыктагы талаага конгон.
Сүрөттүн булагы, AFP
"Роскосмос" тарткан сүрөттөрдө тик учактар капсула конгон жерди айланып жатканын көрүүгө болот. Капсула жергиликтүү саат боюнча 18:39да конгон.
Сүрөттүн булагы, AFP
"Биз бир аз чаалыгып турабыз. Бирок ошого карабастан өз жумушубузга ыраазыбыз. Анан Жерге кайтып келгенибизге өтө кубанычтабыз",-деди капсуладан биринчи болуп сыртка чыккан Антон Шкаплеров.
Сүрөттүн булагы, Reuters
Капсуладан экинчи болуп жылмайган Скотт Тингл чыгып келди.
Сүрөттүн булагы, Getty Images
Кабинаны акыркы болуп Норишиге Канаи таштап чыкты. Ал өзүнүн миссиясынын жүрүшүндө жапониялыктарга Эл аралык космос станциясы тууралуу көп маалымат берүүгө катуу аракет кылды. Жапон тилинде космосто туруп алып "твиттерди" жөнөтүп турду.
Сүрөттүн булагы, AFP
Экипаждын үч мүчөсү капсуладан чыккандан кийин буттарын жуурканга ороп, олтургузушту.
Сүрөттүн булагы, Reuters
Тингл менен Канаи оболу Карагандага барып, андан ары Техас штатынын Хьюстон шаарына жөнөп кетет. Шкаплеров Москвага сапар алды. Өзү менен чогуу космосто болгон футбол боюнча дүйнөлүк чемпионаттын расмий тобун дагы алып кетти.
Сүрөттүн булагы, Getty Images
Эл аралык космос станциясынан алынган репортаждардын жүрүшүндө Шкаплеров кесиптештери менен орбитада футбол ойноп жатканы дагы көрсөтүлгөн эле.
ТАСС агенттигинин маалыматына караганда, дал ушул топ чемпионат ачылышындагы беттеште ойнотулат. Бирок ФИФА муну расмий тастыктай элек.
Сүрөттүн булагы, EPA
Экипаж мүчөлөрү Эл аралык космос станциясында илимий-прикладдык иликтөөнү жана эксперименттерди жүргүзгөн. (AbA)
