Ebee ọzọ ka Ihedioha ga-etinye isi ugbua o wepụrụ onwe ya ịzọ ọkwa gọvanọ na PDP?

Akụkọ pụtara n'ụbọchị Tuzde na Emeka Ihedioha, bụbu gọvanọ Imo Steeti, ewepụla onwe ya n'iso zọọ maka onye ga-eji ọkọlọtọ pati PDP zọọ ọkwa gọvanọ Imo steeti na ntuliaka a ga-eme na steeti ahụ n'ọnwa Nọvemba afọ a.

Ihedioha kwuru na ya na-ewepu onwe ya na ndọrọndọrọ ahụ iji "chụọ aja" maka ọdịmma PDP, nakwa iji kwenye na arịrịọ ndị PDP Imo Steeti rịọrọ ndị isi ha n'Abuja ka e wepụta naanị otu onye ga-eso zọọ ya bụ ọkwa, nke a na-akpọ 'concensus candidate' na bekee.

Mana akụkọ na-efesa, ọ kachasị na soshal midia, na Ihedioha nwereike ịwụba n'otu ndọrọndọrọ ọzọ iji zọọ ọkwa gọvanọ Imo steeti.

Ọtụtụ na-ekwu na Ihedioha ma na ọ gaghị emeri ntuliaka imeụlọ ndị PDP nke a ga-enwe n'ụbọchị 15 nke ọnwa Eprel, na ọ bụ nke a mere o ji kwuo na ya anaghịkwa azọ ya bụ ọkwa.

BBC Igbo gbalịrị ịnụ n'ọnụ Ihedioha maọbụ ndị ọrụ mgbasaozi ya, mana ọ mịtabeghị mkpụrụ.

Ihedioha ọ pụọla kpamkpam na PDP?

N'akwụkwọ ozi o wepụtara n'ụbọchị Tuzde iji kwuo na ya na-ewepụ onwe ya na ndọrọndọrọ ọkwa Gọvanọ Imo steeti na PDP, Ihedioha ekwughị na ya na-ahapụ pati ahụ kpamkpam.

Onweghịkwa ihe dị n'akwụkwọ ozi ahụ nke rụtụrụ aka na ọ na-eche echiche ịbanye pati ọzọ.

Mana kepukepu BBC Igbo nụrụla bụ na o nwereike ị na-atule ịbanye pati ọzọ, iji nwalee ma ọ ga-enwetali mmeri ebe ahụ.

Kepukepu a na-ekwu na ọ bụrụ na Ihedioha ga-ahapụ PDP, pati abụọ o nwereike itinye anya ga-abụ 'Labour Party' maọbụ 'All Progressives Grand Alliance' (APGA).

Mana BBC achọpụtabeghị eziokwu dị n'akụkọ ndị a. Ihedioha n'onwe ndị na-ekwuchitere ya azabeghi oku nakwa ozi ekwenti anyị zigaara ha.

Ka ọ dị ugbua, mmadụ 13 ekwupụtala mmasị ha ịzọ ọkwa gọvanọ na Labour Pati, mana otu n'ime ha bụ Humphrey Anumudu, lara mmụọ n'izuụka gara aga, nke mere ka ọ fọdụ mmadụ 12.

Ụfọdụ ndị nọ Ihedioha nso gwara onye ntaakụkọ anyị na Ihedioha agaghị apụ na PDP; nke a pụtara na ọ gaghị esozi zọọ ọkwa gọvanọ Imo steeti n'afọ a.

Ndị ahụ na-achọghị ka a kpọọ aha ha n'ihi na ha anatabeghị ikikere ịgwa ndị ntaakụkọ okwu, kwuru na "Ihedioha anaghị eche ịpụ na PDP bụ pati o so na ndị malitere ya n'afọ 1998."

Ha kọwara na ebumnuche ya bụ ịnọ n'akụkụ na-ele etu ihe si aga ruo mgbe e mechara ntuliaka ahụ. "O nwereike ịzọ ọkwa gọvanọ ọzọ n'afọ 2027, mana ka ọ dị ugbua, ọ naghị ahapụ PDP," ka onye ahụ kwuru.

Onye ga-eji aha PDP zọọ ọkwa gọvanọ Imo na 2023?

Tupu ugbua, ha dị naanị mmadụ abụọ kwupụtarala mmasị ha iso zọọ ọkwa gọvanọ Imo steeti na pati PDP, ha bụ Emeka Ihedioha na Samuel Anyanwu onye bụkwa odeakwụkwọ pati PDP na Naịjirịa.

Ndị ma maka ndọrọndọrọ ọchịchị na-ekwu na ọ bụ nghọtahie dị n'etiti Ihedioha na Anyanwu - onye e ji Sam Daddy mara - kpatara Ihedioha ji wepụ onwe ya.

"A na-ahụta ya na Sam Daddy ka nwee ohere ịbụ onye ga-anọchite anya PDP na ntuliaka Nọvemba n'Imo steeti, n'ihi na ọ bụ ya ka nọrọ nso n'isiụlọọrụ PDP n'Abuja, bụ ebe a na-anọ ahọpụta ndị ga-abịa hazie ntuliaka imeụlọ ndị PDP n'Imo Steeti, Chidiebube Okeoma, onye ntaakụkọ okwu ndọrọndọrọ ọchịchị Imo Steeti doro anya, gwara BBC Igbo.

"Ugbua Ihedioha pụrụla na ya bụ ndọrọndọrọ, Sam Anyanwu ga-abụzi naanị onye na-azọ ya bụ ọkwa na PDP Imo Steeti, nke pụtara na o turula ugo."

Ihe i kwesịrị ịma maka Ihedioha na Anyanwu

Emeka Ihedioha

Samuel Nnaemeka Anyanwu