Unknown Gunmen in Anambra State: Ọ bụ Gọvanọ Obiano ka ndị ojiegbe wakporo n'Ihiala Oktoba 12?

Nkọwa foto, November 2019 mgbe Gọvanọ Obiano mere ịchụ nta vootu

12 Ọktọba 2021

Akụkọ na-ewu na soshal midia na-ekwu na ndị ojiegbe wakporo ụgbọala Gọvanọ Anambra steeti bụ Willie Obiano taa bụ Tuzde.

Mana otu onye nọ ebe ihe a mere gwara BBC Igbo na ọ bụ ebe ndị pati APGA na-eme emume ịchụ nta vootu ha n'ụlọakwụkwọ Odoata Primary School dị n'Ihiala ka e mere mwakpo ahụ.

Onye ahụ kwuru na ọ bụ ndị ọrụ nchekwa gbawakwara egbe ma chụọ ndị ekperima ahụ ọsọ ụkwụ eru ala.

Ndị uweojii Anambra steeti kwuru na mwakpo dị otu ahụ mere.

Aha onyonyo, Nnobi Attack: Ụmụnwaanyị abụọ so n'ime ndi oji egbe gburu ndi mmadu na Nnobi - Omenugha

Lee ihe gọọmentị Anambra kwuru banyere mwakpo a

C-Don Adinuba, bụ Kọmishọna mgbasaozi Anambra steeti, kwuru na ndị ọrụ nchekwa chụsara ndị ojiegbe wakporo emume ịchụnta vootu ndị APGA n'Ihiala.

Adinuba kwuru nke a n'akwụkwọ ozi o wepụtara n'ụbọchị Tuzde.

O kwuru na ndị ekperima ahụ bucha ọgbatumtum nakwa ụgbọala atọ wee mee mwakpo ahụ.

Adinuba kwuru na oge ndị ọrụ nchekwa malitere ịkwa ndị ekperima ahụ mgbọ, ha gbabara n'ime ụlọọgwụ 'Our Lady of Lourdes' nke dị nso ebe ahụ.

Skip Akachasị Gụọ and continue reading

Akachasị Gụọ

End of Akachasị Gụọ

"Ihe zọrọ ndị ekperima ahụ bụ na ha gbabara ebe ndị ọrụ nchekwa enweghị ike ịgba egbe," Adinuba kwuru.

"Ndị ọrụ nchekwa jichiri ụgbọala na ọgbatumtum niile ndị ekperima ahụ jiri mee mwakpo ahụ."

Lee ihe ndị uweojii kwuru

Ọnụ na-ekwuru ndị uweojii Anambra steeti bụ Toochukwu Ikenga kwuru na ndị uweojii chụsara ndị ekperima wakporo ụlọakwụkwọ Odata Central School nke dị nso n'ụlọụka Katọlik 'St Martin' dị n'Ihiala.

Ikenga kwuru na ọ bụ n'elekere itoolu na ọkara nke ụtụtụ Tuzde ka ihe a mere.

Ọ kọwara na ndị uweojii jichiri otu egbe AK47, mgbọegbe karịrị iri atọ, otu ụgbọala 'Lexus 350', otu ụgbọala 'Rav 4', ụgbọala 'Mercedes', na ụgbọala 'Toyota Corolla'.