Coronavirus Vaccine: E nwetela ọgwụ e ji agwọ coronavirus na Naịjirịa?

Ọtụtụ mmadụ na soshal midia na Naịjịrịa nakwa ụfọdụ ụlọ ntaakụkọ na-ekesa akụkọ na-ekwu na o nwere ọkammụta chopụtara ọgwụ na-agwọ nje coronavirus.

Ọkammụta ahụ bụ Maduike Ezeibe bụ onye na-akuzi nkuzi na mahadum ọrụ ugbo Michael Okpara dị na Umudike.

Ọkammuta Ezeibe, dịka akụkọ siri kwuo, sị na ọgwụ ya ga-enye aka n'ịgwọ ịba Lassa na Coronavirus.

Ka a ka na-atule akụkọ a, Ọkammụta Maurice Iwu bụ onye bụbu onyeisi ngalaba na-ahụ maka ntuliaka na Naịjirịa kpọrọ ndị ntaakụkọ oku wee si na ya nwere ọgwụ olemole ya na-enyocha maka ọgwụgwọ nje a.

Akụkọ ndị ọzọ maka ọgwụ coronavirus

Tupu ndị a ekwuo na ha nwere ihe nwereike ịrụ ọrụ n'ịgwọ coronavirus, o nwekwara ndị ọzọ wuru ewu.

Otu akụkọ si Chaina kwuru na a choputara na ọgwụ ejibu agwọ ịba na Naịjirịa na ọtụtụ mba a kpọrọ chloroquine na-ere dịka ọgwụ nje choronavirus.

Ndị ọkammụta na sayensi ekwubeghị na nke a bụ eziokwu.

Ọzọkwa bụ ụfọdụ ndị ntaakụkọ na-ede na ndị sayensị na maba Izrel nọ n'ụzọ ịchọpụta ọgwụ nje a.

Kedụ ihe ndị na-ahụ maka ahụike na-ekwu maka okwu ndị a?

Ngalaba na-ahụ maka ahụike n'ụwa a kpọrọ "World Health Organisation" (WHO) dere na webụsaịti ha na enwebeghi ọgwụ coronavirus ugbua.

WHO sị na-enweghị ọgwụ ọbụla nwereike gbochie nje a kama na ndị butere ya kwesiri inwete ọgwụgwọ ga-enyere ha aka maka mpụtara ya bụ ọrịa na-ahụ ha.

Dịka WHO - so na ndị ejechaa ọgwụ n'ihe banyere ọdịmma mba ụwa - siri kwuo ọ bụ mgbochi bu ihe a ma dịka ihe ga-enyere mmadu aka n'ebe ọrịa dị.

Anthony Fauci bụ onyeisi ngalaba na-ahụ maka ọrịa na mba Amerịka a kpọrọ "National Institute of Allergy and Infectious Diseases" sị na ọ ga-eru otu afọ tupu ewepụta ọgwụ ọrịa coronavirus.

Ọ sị, "Ọgwụ e mere ma bido na-enyocha n'ime otu afọ abụghị ihe a ga-ekesa ndị mmadụ."

Okwu ya a bụ maka na a na-enyocha etu ọgwụ ga-adị mmadụ na-ahụ site n'ihe Bekee kpọrọ "clinical trials".

Usoro eji emepụta ọgwụ

Ọgwụ ọhụrụ ọbụla ga-agabiga nyocha na nwale tupu ndị dọkịta amalite inye ya ndị mmadụ maka ọgwụgwọ ọrịa.

A na-eme nnyocha ọgwu ahụ maka:

E nwere ụzọ atọ eji enyocha ọgwụ:

1)A ga-eji ihe Bekee kpọrọ "computer models" na anụ ahu eji ihe Bekee kpọrọ 'human skins cells" mee nyocha ọgwụ

Usoro a ga-enye aka ka a mata etu ọgwu ahụ ga-esi nye mmadụ nsogbu

Ọtụtụ ihe eji chọọ ime ọgwụ na-ada nyocha a maka na ha na-emebi anụ ahụ

2) A ga-eji anụmanụ dị ka oke ọcha nwaa ọgwụ gafere nyocha nke mbụ ahụ. A ga-elele etu ya bu ọgwụ di na-ahu ya bụ anụmanụ

3) Ọgwụ gafere nyochaa e ji anụmanụ mee ga-agazị n'ihu ma bụrụ ihe a ga-enyocha na-ahụ mmadụ

Ndi e ji eme nyocha bụ ndị na-arịa ọrịa a chọrọ iji ọgwụ a gwọo

4) Site ebe a, a ga-enyezi ikike ka a malite inye ọha ya bu ọgwụ.

Enwere ihe ọzọ eji agwọ coronavirus

Ọkanmụta Osibogun, bụ onye ọkachamara n'ihe banyere nje na ụlọọgwụ mahadum Legọs, sị na ọtụtụ ihe ndi mmadụ na-ekwu na-eji agwọ nje a dịka mmanya ọkụ na ofe ose abụghị ihe sayensi kwadoro.

Osibogun sị," Oke ofe ose na mmanya bụ inyere ndi na-ere ahịa aka ire ahịa ha ọfụma maka na amaghị ha ka ihe eji agwo ọrịa."

Ọ sịkwa ka agbadogodi ụkwụ maka okwu Chloroquine, nke o sị na ndị WHO ekwubeghi na ọ ga-ere.

"Ndị mmadụ na-anwa ọtụtụ ihe mana ọ ga-eru ọnwa isii tupu a mata ihe ga-arụ ọrụ."

Kedụ ihe Ọkammuta Ezeibe na-ekwu?

BBC Kpọrọ Ọkammụta Ezeibe ka ajụta ya ma nchopụta ya o gara n'uzoro anyi dere n'elu mana ọ sị na ya no n'ụzọ ka akọghachie ya.