ISWOTY : ઇન્ડિયન સ્પૉર્ટ્સવુમનની સફળતાનો વિકિપીડિયામાં ઉમેરો

સુશ્રી દિવ્યાદર્શિની પ્રધાન (23) ઓડિશાના ઢેનકાનલની ક્રિકેટર છે. તેઓ ઓડિશાની અંડર-23 ટીમનાં સુકાની છે.

2019માં યોજાયેલી એસીસી વિમેન્સ ઇમર્જિંગ ટીમ એશિયા કપમાં દિવ્યાદર્શિની સૌથી વધુ વિકેટ લેનારાં બૉલર હતાં. તેમણે આ ટુર્નામેન્ટમાં ભારતનું પ્રતિનિધિત્વ કર્યું હતું. 2019માં જ અંડર-23 વિમેન્સ ચેલેન્જર્સ ટ્રૉફીમાં તેમની આગેવાની હેઠળ ભારતીય ગ્રીન ટીમ ફાઇનલમાં પ્રવેશી હતી પરંતુ જીતી શકી ન હતી.

સુમિત્રા નાયક (20) ઓડિશાના જયપુર જિલ્લાના એક ગામની રગ્બી ખેલાડી છે. તેઓ ભારતીય સિનિયર ટીમ માટે રગ્બી રમે છે અને આ ટીમે એશિયન રગ્બી વિમેન્સ ચૅમ્પિયનશિપમાં બ્રોન્ઝ મેડલ જીત્યો હતો તથા 2019માં એશિયા રગ્બી સેવન્સ ટ્રૉફીમાં સિલ્વર મેડલ જીત્યો હતો.

2019માં નાયકે ભારતની અંડર-19 અને અંડર-20 રગ્બી ટીમની આગેવાની લીધી હતી. 2016માં એશિયન ગર્લ્સ રગ્બી સેવન્સમાં ભારતે બ્રોન્ઝ મેડલ જીત્યો તેમાં નાયકે મહત્ત્વની ભૂમિકા અદા કરી હતી.

સોનાલી વિષ્ણુ શિંગાટે (25) મહારાષ્ટ્રના મુંબઈની પ્રોફેશનલ કબડ્ડી ખેલાડી છે. 2019માં સાઉથ એશિયન ગેમ્સમાં ગોલ્ડ અને 2018માં એશિયન ગેમ્સમાં સિલ્વર મેડલ જીતનારી ભારતીય ટીમમાં સોનાલી પણ રમ્યાં હતાં.

2020માં સોનાલીને મહારાષ્ટ્ર રાજ્યના સર્વોચ્ચ રમતગમત શિવ છત્રપતિ ઍવૉર્ડથી સન્માનિત કરવામાં આવ્યાં હતાં.

શિવાની કટારિયા (23) હરિયાણાના ગુરુગ્રામ ખાતેની એક એમેટર ફ્રી સ્ટાઇલ સ્વિમર છે.

2019માં નેશનલ એક્વેટિક ચૅમ્પિનશિપમાં તેમણે ગોલ્ડ મેડલ જીત્યો હતો. કટારિયાએ 2016ની ઑલિમ્પિક ગેમ્સમાં ભાગ લીધો હતો. 2004 બાદ ભાગ લેનારાં ભારતનાં પ્રથમ સ્વિમર બન્યાં હતાં.

આ જ વર્ષે તેમણે સાઉથ એશિયન ગેમ્સમાં ગોલ્ડ મેડલ જીત્યો હતો. 2017માં તેમને રમતગમતમાં શ્રેષ્ઠ પ્રદર્શન બદલ હરિયાણા રાજ્યનો ભીમ ઍવૉર્ડ એનાયત કરાયો હતો.

શેફાલી વર્મા (17) હરિયાણાના રોહતકનાં ક્રિકેટર છે. તેઓ માત્ર 15 વર્ષની વયે ભારત માટે ટી-20 ઇન્ટરનેશનલ રમનારાં સૌથી યુવા ક્રિકેટર બન્યાં હતાં.

એ જ વર્ષે વર્માએ તેમની કારકિર્દીની પ્રથમ અડધી સદી ફટકારી હતી અને આમ કરનારાં ભારતનાં સૌથી યુવાન ક્રિકેટર બન્યાં હતાં.

હાલમાં ઇન્ટરનેશનલ ક્રિકેટ કાઉન્સિલના ટી-20 ક્રમાંકમાં શેફાલી ત્રીજો ક્રમ ધરાવે છે. શેફાલીના પિતાએ એક વાર તેમના વાળ કપાવીને ટૂંકા કરાવી દીધા હતા, જેથી તેઓ છોકરા જેવાં લાગે અને સ્થાનિક ક્લબ ક્રિકેટમાં તેમના ભાઈના સ્થાને રમી શકે.

સંધ્યા રંગનાથન (તામિલનાડુ)ના કુડ્ડાલોરનાં ફૂટબૉલર છે. નેશનલ ફૂટબૉલ ટીમમાં તેઓ મિડ ફિલ્ડર તરીકે રમે છે. 2019માં SAFF વિમેન્સ ચૅમ્પિયનશિપ અને સાઉથ એશિયન ગેમ્સમાં ગોલ્ડ મેડલ જીતનારી ભારતીય ફૂટબૉલ ટીમમાં સંધ્યા રંગનાથન પણ રમ્યાં હતાં. તેમણે સૌથી વધુ ગોલ કર્યા હતા.

તેઓ સેતુ એફસી ક્લબ માટે પણ રમે છે. આ ક્લબે 2019માં ઇન્ડિયન વિમેન્સ લીગ જીતી હતી અને રંગનાથનને ટુર્નામેન્ટનાં સૌથી વેલ્યુએબલ પ્લેયર જાહેર કરાયાં હતાં.

નોંગનાઇથેમ રતનબાલા દેવી (22) મણિપુરના બિષ્ણુપુર જિલ્લાનાં ફૂટબૉલર છે. તેઓ ફોરવર્ડ અને મિડ ફિલ્ડર તરીકે રમે છે.

2017માં તેમની ભારતીય ટીમમાં પસંદ કરવામાં આવી હતી અને તેમણે 2019માં નેશનલ ટીમને સાઉથ એશિયન ગેમ્સમાં ગોલ્ડ મેડલ જીતવામાં મદદ કરી હતી.

તેઓ KRYPHSA FC ક્લબ માટે રમે છે અને ટીમની કૅપ્ટન તરીકે તેમણે ટીમને 2020ની ઇન્ડિયન વિમેન્સ લીગની ફાઇનલમાં પહોંચાડી હતી પરંતુ ટીમ જીતી શકી ન હતી. દેવી હાલમાં મણિપુરની સ્ટેટ ફૂટબૉલ ટીમનાં કૅપ્ટન છે.

રાની (26) હરિયાણાના કુરુક્ષેત્રનાં હોકી ખેલાડી છે. તેઓ નેશનલ હોકી ટીમમાં સ્ટ્રાઇકર અને મિડ ફિલ્ડરની ભૂમિકા ભજવે છે.

2018માં રાનીને ભારતીય હોકી ટીમનાં કૅપ્ટન બનાવાયાં હતાં અને તેમની આગેવાનીમાં ભારતે એશિયન ગેમ્સમાં સિલ્વર મેડલ જીત્યો હતો. આ સાથે ભારતીય ટીમ ટોક્યો ઑલિમ્પિક્સ માટે ક્વૉલિફાઈ પણ થઈ હતી.

રાની રાજીવ ગાંધી ખેલરત્ન ઍવૉર્ડ તથા અર્જુન ઍવૉર્ડથી સન્માનિત થઈ ચૂક્યાં છે. તેમને 2019માં વર્લ્ડ ગેમ્સ ઍથ્લીટ ઑફ ધ યર જાહેર કરાયાં હતાં. 2020માં તેમને પદ્મશ્રીથી નવાજવામાં આવ્યાં હતાં.

વૈશાલી રમેશબાબુ (19) તામિલનાડુના ચેન્નાઈનાં ચેસ ખેલાડી છે. 2020માં રશિયા સાથે મળીને ફિડે ઑનલાઇન ચેસ ઑલિમ્પિયાડ જીતનારાં કોનેરુ હમ્પી અને વિશ્વનાથન આનંદની ભારતીય ટીમમાં વૈશાલી પણ હતાં.

વૈશાલીએ 2012માં અંડર-12 ગર્લ્સ વર્લ્ડ ચેસ ચૅમ્પિયનશિપ, 2015માં અંડર-14 ગર્લ્સ વર્લ્ડ ચૅમ્પિયનશિપ અને 2017માં એશિયન બ્લિટ્ઝ ચેસ ચૅમ્પિયનશિપમાં ગોલ્ડ મેડલ જીત્યો હતો. 2018માં તેઓ વિમેન્સ ગ્રાન્ડમાસ્ટર બન્યાં હતાં.

પૂનમ યાદવ (29) ઉત્તર પ્રદેશના આગ્રાનાં ક્રિકેટર છે. તેઓ ભારતની મહિલા ક્રિકેટ ટીમ માટે પહેલી વાર 2013માં રમ્યાં હતાં. ટી-20 ઇન્ટરનેશનલમાં યાદવે ભારત માટે સૌથી વધુ વિકેટ ઝડપી છે. આઈસીસીના વિમેન્સ ક્રિકેટમાં સાતમા ક્રમે છે. વિમેન્સ ટી2-0 વર્લ્ડ કપમાં તેમણે સૌથી વધુ વિકેટ ઝડપી હતી.

ભારતીય ક્રિકેટ કંટ્રોલ બોર્ડ (બીસીસીઆઈ)એ 2019માં પૂનમને બેસ્ટ વિમેન્સ ક્રિકેટર જાહેર કર્યાં હતાં. એ જ વર્ષે તેમને અર્જુન ઍવૉર્ડથી નવાજવામાં આવ્યાં હતાં.

પારુલ દલસુખભાઈ પરમાર (47) ગુજરાતના ગાંધીનગરનાં પેરા-બેડમિન્ટન ખેલાડી છે. પેરા-બેડમિન્ટનના તાજા વર્લ્ડ રૅન્કિંગ મુજબ પારુલ હાલમાં મોખરાના ક્રમે છે.

2017ની BWF પેરા-બેડમિન્ટન વર્લ્ડ ચૅમ્પિયનશિપમાં પરમારે સિંગલ્સ અને ડબલ્સમાં ગોલ્ડ મેડલ જીત્યા હતા.

તેઓ ત્રણ વર્ષની વયે પોલિયોનાં શિકાર થયાં અને તેમની સાથે દુર્ઘટના પણ ઘટી હતી. તેમ છતાં તેમણે આ રમત અપનાવી. 2009માં પારુલ પરમારને અર્જુન ઍવૉર્ડ એનાયત કરાયો હતો.

એન. બાલા દેવી (31) મણિપુરના બિષ્ણુપુર જિલ્લાના એક ગામનાં ફૂટબૉલર છે. તેઓ વિમેન્સ નેશનલ ફૂટબૉલ ટીમમાં ફૉરવર્ડ તરીકે રમે છે.

દેવી ભારત માટે સૌથી વધુ ગોલ કરનારાં ખેલાડી છે અને પાંચ વર્ષથી ભારતની નેશનલ ફૂટબૉલ ટીમનાં કૅપ્ટન છે. 2020માં તેમણે રેન્જર્સ એફસી સાથે કરાર કર્યો હતો અને એ સાથે તેઓ ભારતનાં સૌપ્રથમ પ્રોફેશનલ ફૂટબૉલર બની ગયાં હતાં.

2015 અને 2016માં દેવીને ઑલ ઇન્ડિયા ફૂટબૉલ ફેડરેશન દ્વારા વિમેન્સ પ્લેયર ઑફ ધ યર જાહેર કરાયાં હતાં.

માનસી જોષી (31) ગુજરાતના રાજકોટનાં પેરા-બેડમિન્ટન ખેલાડી છે. 2019માં તેમણે પેરા-બેડમિન્ટન વર્લ્ડ ચૅમ્પિયનશિપમાં ગોલ્ડ મેડલ જીત્યો હતો.

2017માં તેમણે ચૅમ્પિયનશિપમાં સિંગલ્સ ઇવેન્ટમાં બ્રોન્ઝ મેડલ જીત્યો હતો અને 2015માં મિક્સ ડબલ્સમાં સિલ્વર મેડલ જીત્યો હતો.

તેઓ એન્જિનિયર છે પણ 2011માં એક અકસ્માતમાં ઘાયલ થયાં હતાં અને સારવાર દરમિયાન તેમણે બેડમિન્ટન રમવાનું પસંદ કર્યું હતું. અંતે તેમણે ઇન્ટરનેશનલ લેવલે રમવા માટે તાલીમ લીધી હતી.

માલવિકા બંસોડ (19) મહારાષ્ટ્રના નાગપુરનાં બેડમિન્ટન ખેલાડી છે. આ ડાબોડી ખેલાડીએ 2018ની વર્લ્ડ જુનિયર ચૅમ્પિયનશિપમાં ભારતનું પ્રતિનિધિત્વ કર્યું હતું.

2019માં માલદિવ્સ ઇન્ટરનેશનલ ફ્યુચર સિરીઝ અને અન્નપૂર્ણા પોસ્ટ ઇન્ટરનેશનલ સિરીઝમાં માલવિકાએ ગોલ્ડ મેડલ જીત્યા હતા. આ સાથે તેઓ વિશ્વ ક્રમાંકમાં મોખરાનાં 200 ખેલાડીમાં આવી ગયાં હતાં.

એ જ વર્ષે તેમણે ઑલ ઇન્ડિયા સિનિયર રૅન્કિંગ ટુર્નામેન્ટ અને ઑલ ઇન્ડિયા જુનિયર રૅન્કિંગ ટુર્નામેન્ટ જીતી હતી.

લાલરેમસિયામી (20) મિઝોરમના કોલાસિબનગરનાં હોકી ખેલાડી છે. નેશનલ ટીમમાં તેઓ ફોરવર્ડ તરીકે રમે છે. એશિયાડ મેડલ જીતનારાં મિઝોરમનાં તેઓ સૌપ્રથમ રમતવીર હતાં, જ્યારે 2018માં એશિયન ગેમ્સમાં ભારતીય ટીમ સિલ્વર મેડલ જીત્યો હતો.

ઇન્ટરનેશનલ હોકી ફેડરેશને 2019માં તેમને રાઇઝિંગ સ્ટાર ઑફ ધ યર જાહેર કર્યાં હતાં.

ટોક્યો ઑલિમ્પિક્સ માટે ક્વૉલિફાઈ થયેલી ભારતીય હોકી ટીમમાં લાલરેમસિયામી પણ રમ્યાં હતાં.

કોલ્લી વારાલક્ષ્મી પાવનીકુમારી (17) આંધ્ર પ્રદેશના વિશાખાપટ્ટનમ જિલ્લાના એક ગામનાં વેઇટલિફ્ટર છે. તેઓ 45 કિગ્રા વર્ગમાં ભાગ લે છે.

2020માં એશિયન યૂથ ઍન્ડ જુનિયર વેઇટલિફ્ટિંગ ચૅમ્પિયનશિપમાં કુમારીએ યૂથ ગર્લ્સ અને જુનિયર કૅટેગરીમાં સિલ્વર મેડલ જીત્યો હતો.

આ સફળતાને કારણે તે ટોક્યો ઑલિમ્પિક્સ માટે ક્વૉલિફાઇ થયાં હતાં. 2019માં તેમણે નેશનલ વેઇટલિફ્ટિંગ ચૅમ્પિયનશિપમાં બેસ્ટ લિફ્ટરનો ઍવૉર્ડ જીત્યો હતો.

કોમેરુ હમ્પી (33) આંધ્ર પ્રદેશના વિજયવાડાનાં ચેસ ખેલાડી છે. ચેસના રેપિડ વિભાગમાં તેઓ હાલમાં વર્લ્ડ ચૅમ્પિયન છે.

2002માં 15 વર્ષની વયે ગ્રાન્ડસ્લેમ ટાઇટલ પ્રાપ્ત કરનારાં તેઓ ઇતિહાસનાં સૌથી યુવા મહિલા બન્યાં હતાં.

હમ્પી એવાં પ્રથમ ભારતીય મહિલા છે જેમણે મેન્સ ગ્રાન્ડમાસ્ટર ટાઇટલ હાંસલ કર્યું હોય. 2003માં તેમને અર્જુન ઍવૉર્ડ અને 2007માં પદ્મશ્રીથી નવાજવામાં આવ્યાં હતાં.

દીક્ષા ડાગર (20) હરિયાણાના ઝજ્જરનાં પ્રોફેશનલ ગોલ્ફર છે. 2018માં તેઓ લેડીઝ યુરોપિયન ટૂરમાં ટાઇટલ જીતનારાં સૌથી યુવા ભારતીય બન્યાં હતાં.

આ ગોલ્ફર જન્મથી જ બધિર હતાં અને કોક્લિયર ઇમ્પ્લાન્ટ કરાવવાની સાથે સ્પીચ થૅરપી લેવી પડી હતી, તેનાથી તેમની શ્રવણશક્તિ થોડા અંશે પાછી આવી હતી.

2017માં તેમણે ડિફાલિમ્પિક્સમાં સિલ્વર મેડલ જીત્યો હતો. આમ કરનારાં તેઓ પ્રથમ ભારતીય બન્યાં હતાં. ડાગરની ગણના એવા જૂજ ગોલ્ફરોમાં થાય છે જે ડાબા હાથે રમે છે.

ચંદાવાલાડા આનંદા સુંધરારામન ભવાની દેવી (27) તામિલનાડુના ચેન્નાઈનાં વતની છે અને ભવાની દેવી તરીકે ખ્યાતનામ છે. તેઓ તલવારબાજી (ફેન્સિંગ)ની રમતમાં સાબ્રે કૅટેગરીમાં સ્પર્ધા કરે છે.

2018માં કૉમનવેલ્થ ગેમ્સમાં વ્યક્તિગત કૅટેગરીમાં ગોલ્ડ મેડલ જીતીને ભવાની દેવી તલવારબાજીમાં ગોલ્ડ જીતનારાં પ્રથમ ભારતીય મહિલા ખેલાડી બન્યાં હતાં.

2015માં તેમણે બ્રોન્ઝ મેડલ જીત્યો હતો અને 2014માં એશિયન ચૅમ્પિયનશિપમાં અંડર-23 કૅટેગરીમાં સિલ્વર મેડલ જીત્યો હતો. ઉપરાંત તેમણે ઇન્ટરનેશનલ લેવલે વિવિધ ટુર્નામેન્ટોમાં મેડલ જિતેલા છે.

અર્ચના ગિરીશ કામથ (20) કર્ણાટકના બેંગલુરુનાં ટેબલ ટનિસ ખેલાડી છે. 2019માં તેમણે સિનિયર વિમેન્સ નેશનલ ટેબલ ટેનિસ ચૅમ્પિયનશિપ જીતી હતી અને ભારતીય નેશનલ ટેબલ ટેનિસ ટીમનાં સભ્ય બન્યાં હતાં.

એ જ વર્ષે કામથે કૉમનવેલ્થ ટેબલ ટેનિસ ચૅમ્પિયનશિપમાં ડબલ્સ ઇવેન્ટમાં ગોલ્ડ મેડલ જીત્યો હતો.

2018માં તેઓ યૂથ ઑલિમ્પિક્સમાં ક્વૉલિફાઈ થયાં હતાં અને સેમિફાઇનલ સુધી પહોંચીને ચોથા ક્રમે રહ્યાં હતાં.

અંકિતા રવીન્દરકૃષ્ણ રૈના (28) ગુજરાતના અમદાવાદનાં પ્રોફેશનલ ટેનિસ ખેલાડી છે. હાલમાં તેઓ ભારતના વિમેન્સ સિંગલ્સ અને ડબલ્સમાં બંને વર્ગમાં નંબર વન ખેલાડી છે.

2018માં બ્રોન્ઝ મેડલ સાથે અંકિતા રૈના એશિયન ગેમ્સમાં સિંગલ્સમાં મેડલ જીતનારાં સાનિયા મિર્ઝા બાદ પ્રથમ ભારતીય બન્યાં હતાં.

એ જ વર્ષે તેઓ ટેનિસ વિશ્વ ક્રમાંકમાં મોખરાનાં 200 ખેલાડીઓમાં સ્થાન મેળવનારાં પાંચમા ભારતીય ખેલાડી બન્યાં હતાં.

ઐશ્વર્યા પિસ્સાઈ (25) કર્ણાટકના બેંગલુરુનાં મોટરસાઇકલ રેસર છે. 2019માં FIM વર્લ્ડ કપ જીતીને તેઓ મોટરસ્પૉર્ટ્સમાં વર્લ્ડ ટાઇટલ જીતનારાં પ્રથમ ભારતીય બન્યાં હતાં.

પિસ્સાઈને 2016, 2017 અને 2019માં ફેડરેશન ઑફ મોટરસ્પૉર્ટ્સ ક્લબ ઑફ ઇન્ડિયા દ્વારા આઉટસ્ટેન્ડિંગ વુમન ઇન મોટરસ્પૉર્ટ્સ ઍવૉર્ડથી સન્માનિત કરાયાં હતાં.

તેમણે નેશનલ રોડ રેસિંગ અને રેલી ચૅમ્પિયનશિપમાં છ ટાઇટલ જિતેલાં છે.

અદિતિ અશોક (22) કર્ણાટકના બેંગલુરુનાં પ્રોફેશનલ ગોલ્ફર છે. 2016માં તેઓ લેડીઝ યુરોપિયન ટૂર જીતીને આ સિદ્ધિ હાંસલ કરનારાં ભારતનાં પ્રથમ મહિલા ગોલ્ફર બન્યાં હતાં અને તેમને રૂકી ઑફ ધ યર જાહેર કરાયાં હતાં.

એ જ વર્ષે અદિતિ અશોક રિયો ઑલિમ્પિક્સમાં રમ્યાં અને આ સાથે તેઓ 18 વર્ષની વયે પ્રથમ ભારતીય અને સૌથી યુવા ગોલ્ફર બન્યાં, જેમણે વૈશ્વિક ઇવેન્ટમાં ભાગ લીધો હોય.

2017માં તેઓ એવાં પ્રથમ ભારતીય ગોલ્ફર બન્યાં હતાં, જેમને લેડીઝ પ્રોફેશનલ ગોલ્ફ ઍસોસિયેશન ટૂર કાર્ડ પ્રાપ્ત થયું હોય.