ભારતીયોએ શૅર કરેલી ફોટોશૉપ્ડ તસવીરો અંગે ઇવાન્કાએ શું કહ્યું?

અમેરિકાના રાષ્ટ્રપતિ ડોનાલ્ડ ટ્રમ્પ તેમનાં પત્ની સાથે ભારતની મુલાકાતે આવ્યા હતા. તેમની સાથે તેમનાં પુત્રી ઇવાન્કા પણ ભારત આવ્યાં હતાં.

આ મુલાકાત દરમિયાન ઇવાન્કાએ તાજમહેલની પણ મુલાકાત લીધી હતી.

જોકે આ મુલાકાતના ફોટો સોશિયલ મીડિયામાં વાઇરલ થયા બાદ કેટલાક લોકોએ તેનાં મિમ બનાવીને શૅર કર્યા હતા.

જાણીતા પંજાબી સિંગર દલજિત દોસાંજેએ ફોટોશૉપ્ડ કરેલી પોતાની તસવીરને પોતાના ટ્વિટર હૅન્ડલ પર શૅર કરી હતી. જે વાઇરલ થઈ ગઈ હતી.

પંજાબી સિંગર દલજિત દોસાંજે હાલમાં ટ્વિટર એકાઉન્ટ પર એક પોસ્ટ શૅર કરી છે, જેમાં તેઓ અમેરિકાના રાષ્ટ્રપતિ ડોનાલ્ડ ટ્રમ્પની પુત્રી ઇવાન્કા સાથે તાજમહેલ પર ફોટો પડાવતાં જોઈ શકાય છે.

દલજિતે મજાકિયા અંદાજમાં લખ્યું હતું, 'પાછળ પડી ગઈ હતી. કહેતી હતી કે તાજમહેલ જવું છે, તાજમહેલ જવું છે.'

'પછી હું લઈ ગયો. બીજું શું કરી શકું.'

ઇવાન્કાએ પણ દલજિતના ટ્વીટનો મજાકમાં જવાબ પાઠવતાં દલજિતનો આભાર માન્યો હતો.

જોકે, આવી તસવીરો માત્ર દલજિતે જ નહીં નહીં, મોટા પ્રમાણમાં સોશિયલ મીડિયા યૂઝર્સે પોસ્ટ કરી હતી. આદિત્ય ચૌધરી નામની એક વ્યક્તિએ ટ્વીટ કર્યું કે "યૂ આર લૅટ પાજી."

તો ઇવાન્કાએ પણ ટ્વીટ કરીને લખ્યું કે મેં ઘણા નવા મિત્રો બનાવ્યા.

'ગૅન્ગ્સ ઑફ વાસેપુર'ના સરદાર ખાન ઇવાન્કાનો હાથ પકડીને ઊભા હોય એવું પણ એક મિમ વાઇરલ થયું હતું.

તો ગૌરવ મિશ્રા નામના યુઝરે દલજિતને ટ્વીટ કરતાં લખ્યું કે 'પાજી તમારી પહેલાં મારી સાથે આવ્યાં હતાં.'

નોંધનીય છે કે ફેબ્રુઆરીના અંતમાં અમેરિકાના રાષ્ટ્રપતિ પરિવાર સાથે ભારતની મુલાકાતે આવ્યા હતા.

તેઓ દિલ્હી, આગ્રા સહિત ગુજરાતની પણ મુલાકાત લીધી હતી.

અમદાવાદમાં નવા બનેલા મોટેરા સ્ટેડિયમમાં યોજાયેલા કાર્યક્રમમાં તેમણે હાજરી આપી હતી અને ગાંધીઆશ્રમની મુલાકાત પણ લીધી હતી.

તમે અમને ફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો