Penis Fish: પુરુષના જનનાંગ જેવા દેખાતા આ જીવ માછલી છે કે બીજું કાંઈ?

પુરુષના શિશ્ન એટલે કે જનનાંગ જેવા દેખાતા જીવ દરિયાકિનારે ઢસડાઈ આવતાં સ્થાનિકોના કૂતુહલનો પાર નથી રહ્યો.

જોકે, આ પુરુષના જનનાંગ જેવા દેખાતા આ જીવનું નામ યુરેકિસ કાઉપો છે. જે ખરેખર તો એક જંતુ છે.

જે 'પેનિસ ફિશ' તરીકે પણ ઓળખાય છે.

નોંધનીય છે કે કેલિફોર્નિયાના દરિયાકિનારે આ જંતુ ઢસડાઈ આવ્યા હતા.

સામાન્યપણે તો આ જીવો રેતીની નીચે દબાયેલા જ રહે છે.

પરંતુ તાજેતરમાં આવેલા તોફાનને પગલે સાન ફ્રાન્સિસ્કોથી 50 માઈલ દૂર આવેલા ડ્રેક બીચ નામના સ્થળે ખુલ્લામાં પથરાયેલા જોવા મળ્યા હતા.

ઇવાન પાર નામના જીવવૈજ્ઞાનિકે આ જંતુ વિશે જણાવતાં લખ્યું :

"જી હા, આ જંતુના બાહ્ય દેખાવને જોઈને આશ્ચર્યચકિત થયા વગર રહી શકાય એવું નથી."

"પરંતુ આ જીવની દેહરચના મોટા ભાગે રેતીની નીચે જીવન ગાળવા માટે અનૂકુળ છે."

તેમણે આ અનોખા જંતુ અંગે માહિતી આપતાં લખ્યું :

આ જંતુઓ 300 મિલિયન વર્ષોથી ધરતી પર હોવાના પુરાવા આપતા અશ્મિઅવશેષો મળી ચૂક્યા છે. તેમજ આ જંતુઓ 25 વર્ષ સુધીનું આયુષ્ય ધરાવતા હોવાના પણ આધારભૂત પુરાવા મળી ચૂક્યા છે.

દરિયાકિનારે આ જંતુઓ જમીનમાં U-આકારના લાંબા દર બનાવે છે.

કેલિફોર્નિયામાં જોવા મળ્યા અનોખા જંતુ

આ સિવાય આ જંતુઓને ઇનકિપર વૉર્મના નામે પણ ઓળખવામાં આવે છે.

આ જંતુઓને આ નામ તેમની ભૂમિગત જીવનશૈલીને કારણે મળ્યું છે.

માછલીઓ, શાર્ક અને અન્ય ઘણા મોટા જીવો 'પીનિસ ફીશ'નો શિકાર કરે છે.

આ સિવાય આ જંતુઓ માણસના ભોજન તરીકે પણ ઉપયોગી બને છે.

આ જંતુ જેવી જ અન્ય એક યુરેકિસ યુનિસિન્કટસ નામક જંતુની પ્રજાતિ દક્ષિણ કોરિયા સહિતના પૂર્વ એશિયાના દેશોમાં સ્વાદિષ્ટ વાનગી ગણાય છે.

તમે અમને ફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો