ગુજરાતમાં ફરી દલિત પર અત્યાચાર, તરુણને ઝાડ સાથે બાંધીને ઢોરમાર મરાયો

ગુજરાતમાં દલિત અત્યાચારનો વધુ એક બનાવ સામે આવ્યો છે. પાટણ જિલ્લામાં એક દલિત તરુણને વૃક્ષ સાથે બાંધીને માર મારવાની ઘટના બની છે.

18 માર્ચની આ ઘટનામાં મહેસાણા 17 વર્ષના દલિત તરુણને બે વ્યક્તિ દ્વારા ઝાડ સાથે બાંધીને માર મારવાની અને જાતિના આધારે અપમાન કરવાની ફરિયાદ નોંધાઈ છે.

ચાણસ્મા પોલીસના ચોપડે નોંધાયેલી ફરિયાદ અનુસાર મહેસાણાનો રહેવાસી મીતકુમાર ચાવડા 12માં ધોરણનું અંગ્રેજીનું પેપર આપવા જઈ રહ્યો હતો ત્યારે આ ઘટના ઘટી હતી.

પીડિતના જણાવ્યા અનુસાર ધીણોજ ગામમાં આવેલી સાર્વજનિક વિદ્યા મંદિર હાઇસ્કૂલ બહારથી તેને બે વ્યક્તિએ બળજબરીપૂર્વક બાઇક પર બેસાડી નજીકમાં આવેલા ખેતરમાં લઈ જઈ માર માર્યો હતો.

ઘટના શું છે?

ફરિયાદમાં પીડિતે જણાવ્યું છે કે તે 12માં ધોરણમાં અભ્યાસ કરે છે.

ધીણોજ ગામની 'સાર્વજનિક વિદ્યામંદિર હાઇસ્કુલ'ના પરીક્ષા કેન્દ્ર ખાતે મીત બોર્ડની પરીક્ષાનું અંગ્રેજીનું પેપર આપવા ગયો હતો.

હાઇસ્કુલની બહાર તે ઊભો હતો એ દરમિયાન જ એક શખ્સ તેની પાસે આવ્યો અને 'તારું કામ છે' એવું કહીને મીતને સાથે આવવા કહ્યું હતું.

મીતને બોલાવનારી વ્યક્તિ રમેશ પટેલ બસ કંડક્ટર તરીકે નોકરી કરતી હોવાથી મીત તેને ઓળખતો હતો એવું મીતે ફરિયાદમાં જણાવ્યું છે.

પરીક્ષા હોવાથી મીતે સાથે આવવાની ના પાડી અને આરોપીએ પરીક્ષા ચાલુ થતા પહેલાં પાછા મૂકી જવા કહ્યું હતું.

મીતના જણાવ્યા અનુસાર રમેશ પટેલ અને અન્ય એક વ્યક્તિ તેમને બાઇક પર બેસાડીને નજીકના ખેતરમાં લઈ ગયા હતા.

જ્યાં લીમડાના વૃક્ષ સાથે બાંધીને 'લીમડાની સોટીથી' મીતને માર મારવામાં આવ્યો હોવાનું પણ ફરિયાદમાં નોંધ્યું છે.

ફરિયાદમાં જણાવ્યા અનુસાર મીતને માર મારતી વખતે જ્ઞાતિવાચક અપમાન પણ કરાયું હતું સાથે જ ધમકી પણ આપી હતી કે કોઈને વાત કરશે તો 'જીવતો નહીં છોડાય.'

ઘટના બાદ મીતે ઘરે કોઈને વાત નહોતી કરી. જોકે, મીતના શરીર પર પડેલાં નિશાન મિતનાં માતા જોઈ ગયાં હતાં અને સમગ્ર ઘટના સામે આવી હતી.

પોલીસ શું કહે છે?

બીબીસી ગુજરાતી સાથેની વાતચીતમાં મીતનાં માતા તરુણાબહેન ચાવડા ઘટનાનું વર્ણન કર્યું.

તરુણાબહેને જણાવ્યું કે મારા પુત્રને ઉપાડીને લઈ ગયા અને પછી ઢોરમાર માર્યો હતો.

તેમણે કહ્યું, "મારો પુત્ર પરીક્ષા આપવા ગયો હતો. ત્યાંથી તેને બાઇક પર ઉપાડી જવાયો અને નજીકના ખેતરમાં તેને ઢોર માર માર્યો."

"એને જાતિસૂચક ગાળો પણ અપાઈ અને તેને પરીક્ષા પણ ના આપવા દીધી. આરોપીઓએ તેને પરીક્ષા ના આપવાની પણ ધમકી આપી છે."

આ ઘટના પાછળ પ્રેમપ્રકરણ જવાબદાર હોવાની વાતો પણ વહેતી થઈ છે. જોકે, તરુણાબહેન દ્વારા આ વાત ફગાવી દેવાઈ છે.

આ મામલે હાલમાં ચાણસ્મા પોલીસ સ્ટેશન ખાતે ફરિયાદ દાખલ કરવામાં આવી છે.

બીબીસી ગુજરાતી સાથેની વાતચીતમાં ચાણસ્મા પોલીસ સ્ટેશનના પી.એસ.ઓ. રસુલ ખાને આ મામલે તપાસ ચાલું હોવાનું કહીને જણાવ્યું,

"પીડિતે લખાવેલી ફરિયાદ અનુસાર ધીણોજ ગામની શાળાની બહારથી બે વ્યક્તિ મીતને બાઇક પર બેસાડીને નજીકમાં આવેલા ખેતરમાં લઈ ગયા હતા. જ્યાં લીમડા સાથે બાંધીને લીમડાની સોટીથી તેને માર માર્યો હતો."

પોલીસે આ મામલે આઈ.પી.સી અધિનિયમની કલમ સેક્શન 323, 341, 504સ 506(2), 144 અને અનુસુચિત જાતિ અને અનુસૂચિત જન જાતિ પ્રતિબંધ અધિનિયમ સેક્શન 3(1)(R)(S),3(2)(5)(a)કલમો હેઠળ ફરિયાદ નોંધી છે.

આ ઘટના બાદ મીતકુમાર ચાવડાની તસવીરો સોશિયલ મીડિયા પર વહેતી થઈ છે.

વડગામના ધારાસભ્ય અને દલિત નેતા જિગ્નેશ મેવાણીએ પણ મીતકુમારની તસવીર સોશિયલ મીડિયા પર પોસ્ટ કરી આરોપીની ધરપકડ કરવા અને પીડિતને ન્યાય અપાવવાની વાત કરી છે.

મેવાણીએ ખાસ વ્યવસ્થા કરીને પીડિતને પરીક્ષા અપાવવા અને તેનું શૈક્ષણિક વર્ષ ના બગડે એ માટે રાજ્ય સરકારને અપીલ કરી છે.

આ ઘટનામાં તુરંત કાર્યવાહી કરવા ઉપરાંત પાટણ બંધની પણ વાત કરી છે.

ગુજરાતમાં દલિતોની સ્થિતિ

(છેલ્લાં 17 વર્ષ દરમિયાન ગુજરાતમાં નોંધાયેલા દલિત અત્યાચારના કિસ્સા, સ્રોત: પોલીસ મહાનિદેશક અને મુખ્ય પોલીસ અધિકારીની કચેરી, ગુજરાત રાજ્ય )એક આરટીઆઈમાં આવેલી માહિતી અનુસાર વર્ષ 2018માં ગુજરાતમાં દલિતો વિરુદ્ધ અત્ચાચારની કુલ 1,545 ઘટનાઓ નોંધાઈ હતી. જેમાં 22 હત્યા, 104 દુષ્કર્મ તેમજ 81 ગંભીર ઈજાની ઘટનાઓ સામેલ છે. આમાં સૌથી વધુ કિસ્સા અમદાવાદમાં નોંધાયા હતા.

તમે અમને ફેસબુક, ઇન્સ્ટાગ્રામ, યુટ્યૂબ અને ટ્વિટર પર ફોલો કરી શકો છો