ભાવનગર: ટીંબી ગામમાં ઘોડી રાખવા બદલ દલિત યુવકની હત્યા

ભાવનગરથી 60 કિલોમીટર દૂર આવેલા ઉમરાળા તાલુકાના ટીંબી ગામમાં 21 વર્ષના દલિત યુવાન પ્રદીપ રાઠોડની માત્ર ઘોડી રાખવા જેવા મુદ્દે હત્યા કરી દેવાઈ હોવાની ફરિયાદ થઈ છે.

આ ઘટના ગુરુવારે મોડી બની જ્યારે પ્રદીપ રાતનું ભોજન પિતા સાથે જમવાનું જણાવ્યા બાદ તે પરત ન આવ્યો અને ગામના ટીંબા પાસેથી ઘોડી અને તેનો મૃતદેહ મળ્યો.

પોલીસે ફરિયાદ બાદની કાર્યવાહીમાં ત્રણ શંકાસ્પદ વ્યક્તિઓની અટકાયત કરી છે અને વધુ આરોપીઓની શોધખોળ ચાલુ છે.

હાલ ભાવનગરની સર ટી હોસ્પિટલમાં પ્રદીપના મૃતદેહને પોસ્ટમોર્ટમ માટે લઈ જવામાં આવ્યો છે.

પ્રદીપના પરિવારે જ્યાં સુધી આરોપીઓની ધરપકડ ન થયા ત્યાં સુધી તેનો મૃતદેહ સ્વીકારવાનો ઇન્કાર કર્યો છે.

ક્યારે બની ઘટના?

પ્રદીપના પિતા કાળુભાઈ રાઠોડે બીબીસી ગુજરાતી માટે ભાર્ગવ પરીખ સાથેની વાતચીતમાં કહ્યું, “પ્રદીપ છેલ્લાં બે મહીનાથી ઘોડી લાવ્યો હતો. તેને ઘોડી નહીં રાખવા માટે આસપાસના ગામડાંના લોકો તે ખેતરે જતો ત્યારે રોકીને ધાક-ધમકી આપતા હતા.”

“તેણે મને કહ્યું હતું કે, તે ઘોડી વેચી દેવા ઇચ્છતો હતો. પરંતુ મેં ના પાડી હતી. ગઈ કાલે સાંજે ખેતર પર ઘોડી લઈને ગયો. મને કહ્યું હતું કે વાળુ સાથે કરીશું. પણ મોડી રાત સુધી એ પાછો ન ફરતા અમે તેની શોધખોળ કરીને. છેવટે ગામના ટીંબા પાસેથી ઘોડી મળી અને તેનાથી થોડે દૂર પ્રદીપનો મૃતદેહ મળી આવ્યો હતો.”

ટીંબી ગામની વસતી 300 લોકોની છે.

તમને આમ વાંચવું ગમશે:

પોલીસ ફરિયાદમાં કાળુભાઈ એ જણાવ્યું છે કે, પીપરાળા ગામના દરબાર જેમનું નામ તેમને ખબર નથી તેમણે પ્રદીપને સાત-આઠ દિવસ પહેલા ઘોડી પર નહીં બેસવા, તેને વેચી દેવાનું કહ્યું હતું અને તેમ ન થાય તો જાનથી મારી નાખવાની ધમકી આપી હતી.

શું કહે છે, પોલીસ?

ટીંબી ગામની ઘટના અંગે ભાવનગરના એસપી પ્રવીણ માલે બીબીસી સાથે વાત કરતા જણાવ્યું કે પ્રાથમિક તપાસની અંદર આ મામલો ઘોડી પર સવારી કરવા બદલ સવર્ણોએ દલિતોને માર્યા હોય તેવું દેખાતું નથી.

તેમણે કહ્યું, "પ્રાથમિક તપાસમાં મળેલી માહિતી પ્રમાણે તે નાનપણથી શાળામાં ઝઘડા કરતો હતો. તેટલું જ નહીં ટીંબી ગામે જ્યારે શાળા છૂટે ત્યારે છોકરીઓની મસ્કરી કરતો, ઘોડા અને મોટર સાઇકલ દ્વારા સ્ટંટ કરતો હતો."

તેમણે કહ્યું, "આ અગાઉ તેણે એક નર્સની છેડતી કરી હોવાનું જાણવા મળ્યું છે. આ અંગે FIRમાં જે વ્યક્તિના નામ છે તથા પ્રવીણ રાઠોડના પરિવારજનોએ જેમના પર શંકા વ્યક્ત કરી છે તે તમામને પૂછપરછ માટે બોલાવાયા છે. શકમંદો પાસેથી પ્રવીણ રાઠોડની હત્યાના કોઈ પૂરાવા હજુ સુધી મળ્યાં નથી."

આ વિસ્તારના દલિત આગેવાન અશોક ગિલાધર કહે છે, “દલિતો પર આ વિસ્તારમાં લાંબા સમયથી ત્રાસ ગુજારવામાં આવી રહ્યો છે. ભૂતકાળમાં પણ તેમને મારવાના બનાવો બન્યા છે. જેને રોકવાનો પ્રયાસ કરવામાં આવ્યો છે. પોલીસને પણ રજૂઆતો કરી હતી. આમ છતાં આ ઘટનાઓ અટકતી નથી.”

ગુજરાતમાં દલિત અત્યાચારની ઘટનાઓ

તમે અમને ફેસબુક, ઇન્સ્ટાગ્રામ, યુટ્યૂબ અને ટ્વિટર પર ફોલો કરી શકો છો