ગુજરાતમાં કયા વિસ્તારમાં ભારેથી અતિભારે વરસાદ પડશે, કયા જિલ્લામાં આગાહી કરાઈ?

ગુજરાતમાં ચોમાસાએ જમાવટ કરી દીધી છે અને સૌરાષ્ટ્ર, દક્ષિણ ગુજરાત તથા ઉત્તર ગુજરાતમાં ઘણી જગ્યાએ ભારે વરસાદ પડ્યો છે.

આગામી ચાર દિવસોમાં પણ રાજ્યના અમુક વિસ્તારોમાં ભારેથી અતિભારે વરસાદ પડવાની આગાહી છે.

ખાસ કરીને આણંદ, દાદરા અને નગરહવેલી, નર્મદા, તાપી અને સુરતમાં બહુ ભારે વરસાદ નોંધાયો છે. પંચમહાલ, અમદાવાદ, છોટા ઉદેપુર, ભરૂચ, વલસાડ, નવસારીમાં પણ ભારે વરસાદ થયો છે.

પંચમહાલ જિલ્લામાં મંગળવારે ભારે વરસાદ પડવાથી સુપ્રસિદ્ધ યાત્રાધામ પાવાગઢ ખાતે મહાકાળી માતાજીનાં દર્શને ગયેલા ભક્તોને પગથિયાં પર ધસમસતા પાણીનો સામનો કરવો પડ્યો હતો.

પંચમહાલના હાલોલ તાલુકામાં મંગળવારે ચાર ઈંચ વરસાદ નોધાયો હતો. અરવલ્લીમાં મંગળવારે સાંજ પછી વરસાદ તૂટી પડ્યો જેમાં માલપુરમાં એક કલાકમાં ત્રણ ઈંચ વરસાદ નોંધાયો હતો.

ગુજરાતમાં છેલ્લા 24 કલાકમાં ક્યાં ભારે વરસાદ પડ્યો?

હવામાન વિભાગના ડેટા પ્રમાણે રાજ્યમાં છેલ્લા 24 કલાકમાં નર્મદાના નાંદોદ તાલુકામાં સૌથી વધુ 220 મિમી વરસાદ નોંધાયો છે. આ ઉપરાંત દાહોદમાં 192 મિમી, નર્મદાના તિલકવાડામાં 181 મિમી, જેતપુર પાવીમાં 177 મિમી, પંચમહાલમાં 173 મિમી અને વલસાડના ધરમપુરમાં 170 મિમી વરસાદ નોંધાયો છે.

વાપીમાં 157 મિમી, બારડોલીમાં 151 મિમી, મોડાસામાં 139 મિમી, મોરવા હડફમાં 137 મિમી, વલસાડના પારડીમાં 136 મિમી, તાપીના સોનગઢમાં 130 મિમી, સુરતના મહુવામાં છેલ્લા 24 કલાકમાં 110 મિમી વરસાદ નોંધાયો છે.

હવામાન વિભાગ મુજબ ગુજરાતમાં 25 જૂનની સવાર સુધીમાં એકંદરે 214 મિમી વરસાદ પડ્યો છે જે સરેરાશ વરસાદના 24.25 ટકા થાય છે.

ગુજરાતમાં 2022માં 122 ટકા, 2023માં 108 ટકા અને 2024માં 143 ટકા વરસાદ નોંધાયો હતો.

ચાલુ સિઝનમાં 106 તાલુકામાં 126થી 250 મિમી વરસાદ નોંધાયો છે.

ચોમાસાની ચાલુ સિઝનમાં કચ્છમાં 21 ટકા, ઉત્તર ગુજરાતમાં 16 ટકા, પૂર્વ મધ્ય ગુજરાતમાં 26 ટકા, સૌરાષ્ટ્રમાં 26 ટકા અને દક્ષિણ ગુજરાતમાં 25 ટકા વરસાદ નોંધાયો છે.

હવામાન વિભાગની આગાહી શું છે?

અમદાવાદસ્થિત હવામાન વિભાગના બુલેટિન પ્રમાણે 25 જૂન, બુધવારે સાબરકાંઠા, અરવલ્લી, પંચમહાલ, દાહોદ, મહીસાગર, ભરૂચ, સુરત, નવસારી, વલસાડ, દમણ, દાદરા અને નગરહવેલીમાં છૂટાછવાયા સ્થળે ભારેથી અતિભારે વરસાદ પડવાની શક્યતા છે.

આ ઉપરાંત બુધવારે ગાંધીનગર, ખેડા, આણંદ, વડોદરા, છોટા ઉદેપુર, નર્મદા, ડાંગ, તાપી, રાજકોટ, જૂનાગઢ, અમરેલી, ભાવનગર, ગીર સોમનાથ, બોટાદ અને દીવમાં કેટલીક જગ્યાએ ભારે વરસાદ પડી શકે છે.

ગુજરાતના આ સિવાયના વિસ્તારોમાં 25 જૂને હળવાથી મધ્યમ વરસાદ પડવાની શક્યતા છે જે દરમિયાન પવનની ઝડપ 30થી 40 કિમી પ્રતિ કલાક રહેશે.

26 જૂનની આગાહી પ્રમાણે બનાસકાંઠા અને સાબરકાંઠામાં કેટલીક જગ્યાએ ભારેથી અતિભારે વરસાદ પડવાની શક્યતા છે. 26 જૂન, ગુરુવારે પાટણ, મહેસાણા, ગાંધીનગર, અરવલ્લી, નવસારી, વલસાડ, દમણ, દાદરા અને નગરહવેલી, રાજકોટ, પોરબંદર, જૂનાગઢ, અમરેલી, ભાવનગર, ગીર સોમનાથ અને દીવમાં છૂટાછવાયા સ્થળે ભારે વરસાદ પડવાની આગાહી છે.

ગુજરાતમાં હવે કયા જિલ્લામાં વરસાદની શક્યતા છે?

રાજ્યના બાકીના ભાગોમાં ગાજવીજ સાથે હળવાથી મધ્યમ વરસાદ પડી શકે છે જે દરમિયાન પવનની ઝડપ 30થી 40 કિમી પ્રતિ કલાક રહેશે.

27 જૂન, શુક્રવાર માટે હવામાન વિભાગની આગાહી પ્રમાણે સાબરકાંઠા અને અરવલ્લીમાં કેટલીક જગ્યાએ ભારેથી અતિભારે વરસાદ પડવાની શક્યતા છે.

27 જૂને બનાસકાંઠા, મહેસાણા, મહીસાગર, નવસારી, વલસાડ, દમણ, દાદરા અને નગરહવેલી, જામનગર, પોરબંદર અને દ્વારકા જિલ્લામાં કેટલાંક સ્થળોએ ભારે વરસાદ પડવાની આગાહી છે.

રાજ્યના બાકીના ભાગોમાં 27 જૂને હળવાથી મધ્યમ વરસાદ પડી શકે છે જે દરમિયાન ગાજવીજ પણ જોવા મળશે.

28 અને 29 જૂને બનાસકાંઠા અને સાબરકાંઠામાં કેટલીક જગ્યાએ ભારેથી અતિભારે વરસાદ પડવાની આગાહી છે. જ્યારે પાટણ, મહેસાણા, અરવલ્લી, ભરૂચ, સુરત, ડાંગ, નવસારી, વલસાડ, તાપી, દમણ, દાદરા અને નગરહવેલી, અમરેલી, ભાવનગર, ગીર સોમનાથ, કચ્છ અને દીવમાં છૂટાછવાયા સ્થળે ભારે વરસાદ થવાની આગાહી છે.

30 જૂને ગુજરાતમાં બનાસકાંઠા, સાબરકાંઠા, નવસારી, વલસાડ, દમણ, દાદરા અને નગરહવેલીમાં ભારેથી અતિભારે વરસાદ પડી શકે છે.

હવામાન વિભાગ મુજબ અમદાવાદમાં 25 જૂને ગાજવીજ સાથે હળવાથી મધ્યમ વરસાદ પડી શકે છે.

બીબીસી માટે કલેક્ટિવ ન્યૂઝરૂમનું પ્રકાશન