Avugwa mu mupira w'amaguru kuri iyi tariki ya 5/8/2019: Neymar, Mandzukic, Lukaku, Pogba, Van de Beek

Inyandiko gusa
Neymar amaze gutsindira Paris Saint-Germain ibitego 34 mu mikino 37 amaze kuyikinira muri shampiyona kuva yayigeramo mu kwezi kwa munani kwa 2017, ayifasha kugenda yisubiza igikombe cya shampiyona ya Ligue 1 yo mu Bufaransa

Ahavuye isanamu, AFP

Insiguro y'isanamu, Neymar amaze gutsindira Paris Saint-Germain ibitego 34 mu mikino 37 amaze kuyikinira muri shampiyona kuva yayigeramo mu kwezi kwa munani kwa 2017, ayifasha kugenda yisubiza igikombe cya shampiyona ya Ligue 1 yo mu Bufaransa

Barcelone yavuze ko nta gahunda ifite kuri iyi mpeshyi yo kongera kugura rutahizamu Neymar w'imyaka 27 y'amavuko ukomoka muri Brezili ukinira Paris St-Germain. (Goal.com)

Manchetser United yemeye amasezerano ya miliyoni 6.2 z'amapawundi ku mwaka yo kugura rutahizamu Mario Mandzukic w'imyaka 33 y'amavuko ukinira Juventus. Uyu mukinnyi ukomoka muri Croatia ashobora kuzagurwa miliyoni 15 z'amapawundi cyangwa akagurwa muri gahunda yo guhinduranya abakinnyi ku mpande zombi akaguranwa rutahizamu Romelu Lukaku, Umubiligi w'imyaka 26 y'amavuko ukinira United. (Mail)

Mario Mandzukic

Ahavuye isanamu, BBC Sport

Insiguro y'isanamu, Mario Mandzukic

United yanze ubusabe bwa Real Madrid bwo kugura Paul Pogba, umukinnyi w'Umufaransa w'imyaka 26 y'amavuko ukina hagati mu kibuga - amasezerano yari kuba arimo no kumugurana na James Rodriguez, rutahizamu w'imyaka 28 y'amavuko ukomoka muri Colombia ukinira Real Madrid. (Sun)

Real yafashe icyemezo cyo kugura Donny van de Beek, umukinnyi w'Umuholandi w'imyaka 22 w'ikipe ya Ajax ukina hagati mu kibuga, aho gukomeza gushakisha Pogba. (Marca)

Leicester City iri gutekereza ku kuba yagura James Tarkowski, myugariro w'Umwongereza w'imyaka 26 y'amavuko ukinira Burnley, cyangwa myugariro Nathan Ake, myugariro w'Umuholandi w'imyaka 24 y'amavuko ukinira Bournemouth, ngo umwe muri bo asimbure Harry Maguire, Umwongereza w'imyaka 26 y'amavuko. (Sky Sports)

Manchester City byitezwe ko irangiza ibyo kugura myugariro Joao Cancelo, Umunya-Portugali w'imyaka 25 y'amavuko ukinira Juventus, akabisikana na Danilo, uyu myugariro w'Umunya-Brezili w'imyaka 28 y'amavuko we akerekeza muri Juventus. (Mail)

Joao Cancelo

Ahavuye isanamu, Getty Images

Insiguro y'isanamu, Joao Cancelo

Newcastle United ntabwo izagura uwahoze ari rutahizamu wayo Andy Carroll. Uyu mukinnyi w'Umwongereza w'imyaka 30 y'amavuko, ubu nta kipe afite akinira nyuma yaho aviriye muri West Ham United. (Mirror)

Biteganyijwe ko Tottenham ishyira Josh Onomah, Umwongereza w'imyaka 22 y'amavuko ukina hagati mu kibuga, mu masezerano ya miliyoni 30 z'amapawundi arimo no kugura Ryan Sessegnon, myugariro w'imyaka 19 y'amavuko wa Fulham n'uw'ikipe y'igihugu y'Ubwongereza y'abari munsi y'imyaka 21 y'amavuko. (Mail)

Skip Ibisomwa cane and continue reading
Ibisomwa cane

End of Ibisomwa cane

Crystal Palace yitezweho kugura Victor Camarasa, umukinnyi wo hagati w'Umunya-Espanye w'imyaka 25 y'amavuko - wamaze umwaka ushize w'imikino akinira Cardiff nk'inguzanyo - imukuye muri Real Betis. (Independent)

Victor Camarasa

Ahavuye isanamu, Huw Evans picture agency

Insiguro y'isanamu, Victor Camarasa

Newcastle na Aston Villa zirimo gushaka kuba zagura James Tavernier, myugariro w'Umwongereza w'imyaka 27 y'amavuko ukinira Rangers. (Football Insider)

Watford yanze amasezerano ya miliyoni 32 z'amapawundi ya Everton yashakaga kugura umukinnyi wayo Abdoulaye Doucouré, Umufaransa w'imyaka 26 y'amavuko. (RMC, via Express)

Abdoulaye Doucouré

Ahavuye isanamu, Getty Images

Insiguro y'isanamu, Abdoulaye Doucouré

Rutahizamu Neal Maupay w'imyaka 22 y'amavuko ukinira ikipe ya Brentford agiye kwerekeza mu ikipe ya Brighton kuri kontaro y'imyaka ine. (L'Equipe)

Brighton izagura Maupay amafaranga menshi ya mbere mu mateka yayo izaba itanze mu kugura umukinnyi. (Talksport)

Inter Milan yabwiye Mauro Icardi, rutahizamu ukomoka muri Argentine w'imyaka 26 y'amavuko, ko azamara imyaka ibiri adakina naramuka akomeje gutsimbarara ku guhagarika kontaro ye muri iyi kipe. (Gazzetta Dello Sport)

Mauro Icardi

Ahavuye isanamu, Reuters

Insiguro y'isanamu, Mauro Icardi

Josep Maria Bartomeu, Perezida w'ikipe ya Barcelone, yabaye nk'uca amarenga ko iyi kipe ifite igikombe cya shampiyona ya Espanye ishobora kugura n'undi mukinnyi, nyuma yo kwemeza ko Junior Firpo, myugariro w'imyaka 22 w'Umunya-Espanye, yamaze kuyigeramo avuye muri Real Betis. (Sport)

Virgil van Dijk, myugariro wa Liverpool, kera kabaye yanyujijweho umupira ubwo ejo ku cyumweru iyi kipe yatsindwaga kuri penaliti na Manchester City, ikayitwara igikombe cya Community Shield muri uwo mukino wari warangiye ari igitego 1-1. Uyu Muholandi w'imyaka 28 y'amavuko yari amaze gukina imikino 65 nta mukinnyi bahanganye ubashije kumunyuzaho umupira. (Goal)

Virgil Van Dijk

Ahavuye isanamu, BBC Sport

Insiguro y'isanamu, Virgil Van Dijk

West Ham irimo kurambagiza umukinnyi wa gatanu yaba iguze kuri iyi mpeshyi, ariko ikavuga ko atazaba ari Gary Cahill, umukinnyi w'imyaka 33 y'amavuko wahoze ari myugariro wa Chelsea n'uw'ikipe y'igihugu y'Ubwongereza. (Football.London)

Crystal Palace ahubwo yo igeze kure amasezerano yo kugura Cahill ndetse ikazajya imuhemba ibihumbi 75 by'amapawundi buri cyumweru. (Sun)