Umutoza Maurizio Sarri wa Chelsea yamaganye ivangura mu mupira w'amaguru nyuma yaho Sterling yibasiwe
Ahavuye isanamu, Getty Images
Umutoza Maurizio Sarri w'ikipe ya Chelsea yamaganye "ivangura uko ryaba rimeze kose" nyuma yaho umukinnyi Raheem Sterling w'ikipe ya Manchester City bivugwa ko yakorewe ivangura rishingiye ku ibara ry'uruhu.
Chelsea na polisi y'Ubwongereza bakomeje iperereza kuri ibyo birego bivugwa ko bijyanye n'ibyabaye kuri Sterling mu mukino wo ku wa gatandatu w'icyumeru gishize Chelsea yatsinzemo Manchster City ibitego 2-0.
Chelsea yamaze kuba ihagaritse abafana bayo bane ngo ntibitabire imikino yayo mu gihe iperereza rikomeje.
Sterling yavuze ko ibinyamakuru bimwe bifasha mu "guhembera ivangura rishingiye ku ibara ry'uruhu" kubera uburyo bigaragaza urubyiruko rw'abirabura rukina umupira w'amaguru.
Ahavuye isanamu, Getty Images
Umukinnyi Ruben Loftus-Cheek wa Chelsea yashyigikiye Sterling bakinana mu ikipe y'igihugu y'Ubwongereza, agira ati:
"Ntekereza ko yari mu kuri ubwo yavugaga ibo yavuze. Sintekereza ko [ivangura] rikwiye kuba mu mupira w'amaguru cyangwa ahandi hantu aho ari ho hose".
"Kuba yarabivuze ku mugaragaro byari bikwiye. Bimbayeho nanjye ni ko nabigenza".
Loftus-Cheek yavuze ko yakorewe ivangura hanze y'ikibuga ariko ko atararikorerwa mu kibuga.
Yongeyeho ati: "Iyo ibintu nk'ibi bibaye, ducyeneye kubyamagana bikomeye. Ni ikintu abakinnyi bavuzeho, cyane cyane nkanjye wakuze nk'umukinnyi w'umwirabura".
Ubwo yari mu kiganiro n'abanyamakuru mbere y'umukino wo kuri uyu wa kane wa Europa League uhuza Chelsea n'ikipe ya Vidi yo mu gihugu cya Hongrie, umutoza Sarri yagize ati:
"Namaganye ivangura uko ryaba rimeze kose. Hari iperereza riri gukorwa, rero ndumva byaba byiza kurushaho ntagize ikindi ndenzaho".
"Biteye ishozi..."
