Russia yacucagiye ibibombe Kyiv mu gihe Ukraine irondera kwisubiza ubumanuko

Uburusiya bwakoze ibitero bikomeye mu bisagara vya Ukraine mu gihe Kyiv nayo iriko yongereza akariro mu kurondera kwisubiza akarere ka Kherson kari mu bumanuko.

Abantu batanu nibo bapfuye abandi 26 nabo barakomereka mu gihe ibisasu vya misire vyaterwa hagati mu gisagara ca Kropyvnytskyi, nk’uko abategetsi babivuga. Abandi batatu nabo bapfuye mu gisagara ca Bakhmut kiri mu buseruko.

Hafi y’umugwa mukuru Kyiv, abantu batanu nibo bakomeretse mu gitero cabereye ku kigo ca gisirikare. Eka n’uturere two mu buraruko n’ubumanuko bwa Ukraine natwo twatewe.

Ibi bibaye mu gihe Ukraine iriko irondera kuzibira ingabo z’Uburusiya ziri mu bumanuko.

Ikiraro gikomeye cinjira mu gisagara ca Kherson ntikigikora inyuma y’aho ingabo za Ukraine zigitereye na vya muzinga birasa kure vyatanzwe na Amerika.

Ibi bituma Uburusiya budashobora kurungika izindi ngabo n’ibindi birwanisho bukoresheje ikiraro ca Antonivsky.

Abategetsi bo mu bushikiranganji bwo kwivuna abansi b’Ubwongereza bavuga ko iki gisagara conyene cafashwe mu ntango y’igitero c’Uburusiya ku wa 24 Ruhuhuma (2) ubu “catandukanijwe n’utundi turere twigaruriwe”.

Hagati aho, igisirikare ca Ukraine kiragabisha ko ubu Uburusiya buriko burakura ingabo ziri mu buseruko buzitwara mu bumanuko kurwanira intara ya Kherson.

Hari amasanamu yasohotse yerekana ingabo z’Uburusiya zigerageza kwubaka ikiraro c’igihe gito hafi y’icabomowe.

Kugenzura Kherson ni ikintu gikomeye ku Burusiya kuko ibufasha kuronka umuhora wo ku butaka winjira muri Crimea – izinga riri mu bumanuko bwa Ukraine ryigaruriwe na Kremlin mu 2014.

I Kropyvnytskyi – umugwa mukuru w’intara ya Kirovohrad – ishure ryigisha abadereva b’indege ryatewe misire zibiri ku wa kabiri, nk’uko umukuru w’iyo ntara Andriy Raikovych abimenyesha.

I Bakhmut, akarere kari mu buseruko bw’intara ya Donetsk, abantu n’imiburiburi batatu nibo bishwe abandi batatu nyene barakomereka igihe Uburusiya bwahacucagira ibibombe, nk’uko bitangazwa n’uwurongoye iyo ntara Pavlo Kyrylenko. Inzu 12 zituwemwo n’abantu nazo nyene zononekaye.

Mu bindi vyabereye ahandi, abantu 15 bakomeretse igihe ibisasu vya misire z’Uburusiya zo mu bwoko bwa Kalibr vyaterwa ku kigo ca gisirikare i Liutizh, ku birometero vyababa cumi mu buraruko bwa Kyiv, nk’uko intwazangabo ya Ukraine Oleksiy Hromov abivuga. Ntatomora nimba hari abapfuye.

Ahandi naho, umuntu umwe niwe yishwe abandi babiri barakomereka igihe Uburusiya bwatera amabombe mu ntara ya Dnipropetrovsk hagati utera uja mu buseruko, nk’uko abategetsi babivuga.

Inyuma y’amezi atanu Perezida Vladimir Putin w’Uburusiya atanguye igitero muri Ukraine, ibihugu vy’uburengero bibandanya vyiyamiriza aka gasotoro ka Moscou.

Ejo ku wa kane, Amerika, Canada n’ibihugu 36 vya Bulaya vyavuze ko vyashinze umurwi w’abahinga wo kwihweza ingene ivy’agateka ka zina muntu vyifashe hagati mu Burusiya, aho bavuga ko ibintu vyayangaye kuva iki gitero gitanguye.

Biciye mw’ishirahamwe ry’umutekano n’ugufashanya i Bulaya (Organisation for Security and Cooperation in Europe, OSCE), ibi bihugu vyagiriza Moscou kubandanya bazivya amajwi yose anegura reta hagati mu gihugu.

Mw’itangazo vyasohoye, ibi bihugu vyerekana kandi impungenge yavyo ku makuru y’iyicarubozo rikorerwa mu mabohero.

Mu kw’icenda, aba bahinga bazosohora icegeranyo berekane n’ivyo abategetsi b’Uburusiya bakwiye gukora kugira ngo batorere umuti iki kibazo.

Nk’igihugu kimaze igihe kirekire mw’iri shirahamwe OSCE, Uburusiya bwari bwemeye gukurikiza ivyo bwiyemeje ku bijanye n’agateka ka zina muntu n’intwaro rusangi.