Ukraine: ikivuko ca Odesa catewe amabombe inyuma y’amasaha make habaye amasezerano

Ibibombe vyanyiganyije ikivuko gikomeye ca Ukraine inyuma y’umusi umwe gusa Kyiv na Moscou bashitse ku masezerano yotumye intete za Ukraine zisubira gushorwa hanze.

Ibisasu bibiri vya misire vyatewe mu gisagara ca Odesa gifise ikivuko mu masaha yo mu gaturuturu ko kuri uno wa gatandatu, nk’uko igisirikare ca Ukraine kibimenyesha.

Nk’uko biri muri ano masezerano yaraye ashitsweko, Uburusiya bwemeye kudatera ibivuko bizoba bifise intete ziriko zishorwa hanze.

Ishirahamwe ONU rivuga ko ano masezerano ari “ikimenyetso c’umwizero” inyuma y’intambara imaze amezi.

Mu butumwa bwacishijwe ku mbuga hwaniro, ibiro vya gisirikare mu bumanuko bwa Ukraine bivuga ko ibisasu bibiri vya misire zo mu bwoko bwa Kalibr vyaguye kuri iki kivuko, mu gihe ibindi bibiri navyo vyakorowe n’igisata kirwanira mu kirere.

Oleksiy Honcharenko, umushingamateka w’akarere, yanditse kuri Telegram ko iki gitero catumye haduka umuriro mu kivuko c’iki gisagara.

"Iyi mihimbiri itera igikumu ku masezerano n’ukuboko kumwe mu gihe ukundi nako gutera misire”, niko Honcharenko yanditse.

"Nico gituma dukeneye indege kugira ngo dusenyure amato y’intambara yose y’Uburusiya ari mu Nyanja yirabura. Iyi ni yo nzira yonyene yo gushobora gushora hanze intete”.

Ntibiramenyekana neza nimba hari abapfuye n’abakomeretse, canke nimba hari ibintu vyononekaye.

Ejo ku wa gatanu, abategetsi ba Kyiv na Moscou barateye igikumu ku masezerano yotumye imiriyoni n’imiriyoni z’amatoni y’intete zugaraniwe muri Ukraine zishobora gushorwa hanze.

Nk’uko bivugwa n’abaserukizi b’ibihugu, bimwe mu vyo bemeranije ni uko Uburusiya budatera ibivuko mu gihe bizoba biriko birasohora ibidandazwa hanyuma Ukraine nayo ikaba yemeye guherekeza imizigo mu mazi yuzuye ama mines.

Aya masezerano – akaba yafashe amezi abiri kugira ashikweko – yiteze kubandanya mu kiringo c’imisi 120, akazoba ahagarariwe kandi akurikiranirwa hagufi n’ibiro bizoshingwa i Istanbul muri Turukiya, bikazoreramwo abategetsi ba ONU, Turukiya, Ukraine n’ab’Uburusiya. Arashobora kwongerezwa ikiringo mu gihe impande zompi zovyumvikanako.

Andriy Yermak, umukuru w’ibiro vy’umukuru w’igihugu Volodymyr Zelensky, ariyamiriza iki gitero akagiriza Uburusiya ko “bubandanya buteza ikibazo c’imfungurwa”.

Umuvugizi w’ubushikiranganji bwa Ukraine bujejwe imigenderanire, Oleh Nikolenko yongeyeko ati: "Iyi misire y’Uburusiya ni amate Vladimir Putin aciriye ku munyamabanga mukuru w’ishirahamwe ONU, António Guterres no kuri Perezida Recep Erdogan wa Turukiya, bitanze uko bashoboye kwose habe aya masezerano, mbere Ukraine ikaba ibashimira cane”.

Iki gitero kibaye mu gihe abategetsi bo mu bushikiranganji bwo kwivuna abansi bw’Ubwongereza bavuga ko ingabo z’Uburusiya mu ntara ya Kherson zishobora kubura ingene zironswa ivya nkenerwa kubera amayira ashobora gukatwa n’ingabo za Ukraine.

Kyiv yaratanguje igitero gikomeye co kwivuna mu bumanuko bw’igihugu, kandi ingabo zayo zarakoresheje inkoho zirasa kure ibisasu vya misire zatanzwe na Reta Zunze Ubumwe za Amerika mu gutera ikiraro ca Antonovsky i Kherson. Mu gihe iki kiraro cobomorwa, Uburusiya ntibwokworoherwa gushikira ingabo zabwo.