Mali igiye gusesa umubano wose wa gisirikare yari ifitanye na France

Leta ya Mali ivuga ko irimo gusesa amasezerano yose y'ubufatanye bwa gisirikare yari ifitanye n'Ubufaransa bwahoze buyikoloniza.

Yatanze ingero nyinshi z'ibyo ivuga ko ari ihonyorwa ry'ubusugire bwayo byakozwe n'ingabo z'Ubufaransa muri icyo gihugu, inakomoza ku "izahara rikomeye rimaze igihe ry'ubufatanye bwa gisirikare n'Ubufaransa".

Itangazo ryasohowe n'umuvugizi w'ingabo za Mali Colonel Abdoulaye Maïga, rivuga ku ngero nyinshi z'ukuntu Ubufaransa bwavogereye ikirere cya Mali.

Mali yanavuze ku cyemezo cy'Ubufaransa cyo mu kwezi kwa gatandatu mu 2021 cyo gusoza ibikorwa bya gisirikare ingabo z'Ubufaransa zakoranaga n'ingabo za Mali, no gukura ingabo zabwo muri icyo gihugu.

Abategetsi ba Mali bavuze ko ku wa mbere nyuma ya saa sita z'amanywa bamenyesheje Ubufaransa iby'icyo cyemezo cya leta ya Mali.

Ubufaransa nta cyo burabitangazaho ku mugaragaro.

Umubano hagati y'Ubufaransa na Mali warazahaye nyuma yuko igisirikare cya Mali gifashe ubutegetsi mu mwaka wa 2020.

Ubufaransa bwarakajwe n'icyemezo cya Mali cyo gukoresha abarwanyi ba kompanyi Wagner yo mu Burusiya mu kurwanya intagondwa zigendera ku mahame akaze yiyitirira Islam, nubwo agatsiko ka gisirikare kari ku butegetsi gahakana kavuga ko nta bo muri iyo kompanyi bari muri Mali.