Nigeria: Kompanyi z'itumanaho rya telefone zasabwe gufunga urubuga rwa Twitter

Leta ya Nigeria yasabye kompanyi z'itumanaho rya telefone ngendanwa gutuma abakoresha ifatabuguzi ryazo batagera kuri Twitter, nkuko ishyirahamwe ry'izo kompanyi ryabivuze.

Abakoresha telefone ngendanwa bavuga ko barimo kugira ibibazo mu kugera kuri urwo rubuga nkoranyambaga. Ruracyashobora kugerwaho ku miyoboro imwe n'imwe ya wi-fi.

Ibi bibaye nyuma yuko leta ya Nigeria ivuze ko ihagaritse ibikorwa bya Twitter muri icyo gihugu "kugeza igihe kitazwi".

Yavuze ko uru rubuga rurimo gukoreshwa mu kubangamira "kumenyekana kwa Nigeria".

Twitter yavuze ko uko guhagarikwa "guhangayikishije bikomeye".

Ishyirahamwe ry'ibigo byemewe by'itumanaho muri Nigeria (ALTON) ryavuze ko abanyamuryango baryo bashyize mu bikorwa ubusabe bwo guhagarika kugera kuri Twitter hashingiwe "ku biteganywa mu nyungu rusange z'igihugu" bijyanye n'itegeko rigenga ibigo by'itumanaho n'amabwiriza agenga uruhushya rw'imikorere.

Ariko iryo shyirahamwe ryanavuze ko rishyigikiye aho umuryango w'abibumbye (ONU/UN) uhagaze ku kuvuga ko uburenganzira ku itumanaho, haba ku mbuga za internet cyangwa ahatari kuri izo mbuga, bukwiye kurindwa.

Umunyamakuru wa BBC Mayeni Jones uri muri Nigeria avuga ko bibabaje kuba iki gihugu gifatwa nka kimwe mu birangwamo demokarasi muri Afurika kibuza abantu kugera kuri bumwe mu buryo bw'itumanaho bukoreshwa cyane muri icyo gihugu.

Gukuraho ubutumwa bwa Buhari

Iki cyemezo cya leta ya Nigeria kije nyuma y'iminsi ubutumwa bwo kuri Twitter bwa Perezida Muhammadu Buhari bukuwe kuri uru rubuga kubera kurenga ku mategeko y'imikoreshereze yarwo, nubwo ibi nta na hamwe byagarutsweho mu itangazo rya leta.

Bwana Buhari, mbere yanenze uru rubuga nkoranyambaga rwo muri Amerika kubera gukuraho ubutumwa bwe, avuga ko ari "ugukoresha amategeko mu buryo butandukanye bitewe n'uwo uri we".

Ubwo butumwa bwatangajwe na Bwana Buhari ku itariki ya mbere y'uku kwezi kwa gatandatu, bwavugaga ku ntambara yabaye muri Nigeria kuva mu 1967 kugeza mu 1970 no guhagurukira "abitwara nabi ubu" bakabwirwa "mu rurimi bazumva".

Icyo gihe umuvugizi wa Twitter yavuze ko ubwo butumwa "bwarenze ku mategeko ya Twitter".

No mu itangazo ryo ku wa gatanu, Twitter - mu kwezi kwa kane yavuze ko ibiro bikuru byayo bishya muri Afurika bizaba biri muri Ghana, ituranye na Nigeria - yavuze ko irimo gukora "iperereza" kandi izatanga amakuru mashya "igihe tuzaba hari ibindi tuzi" ku ihagarikwa muri Nigeria.

Leta ya Nigeria nta kindi gisobanuro yatanze ku kuntu Twitter yabangamiye kumenyekana kw'iki gihugu.

Kugeza mu gitondo cyo kuri uyu wa gatandatu, abanyamakuru ba BBC mu mijyi ya Lagos na Abuja muri Nigeria ntabwo bashoboraga gukoresha Twitter banyuze ku mirongo ibiri ikomeye y'itumanaho rya telefone ngendanwa yo muri icyo gihugu: MTN na Airtel.

Urubuga Netblocks rugenzura ikoreshwa ry'umurongo wa internet rwatangaje ko Twitter yagabanyijwe ku mirongo yose ikomeye yo muri icyo gihugu.

Kugera kuri Twitter byari bigishoboka hifashishijwe uburyo bumwe bumwe bwa wi-fi, ariko ubu ntabwo ari bwo bukoreshwa na benshi muri Nigeria mu kugera kuri internet.