Ghana: Twitter igiye kuhashyira ibiro bikuru byayo muri Africa

Twitter yatangaje ko ibiro bikuru byayo muri Afurika bizaba biri muri Ghana.

Itangazo ribivuga, umukuru wa Twitter akaba no mu bayishinze Jack Dorsey yaricishije kuri Twitter, ashimira Ghana na Perezida wayo.

Perezida wa Ghana Nana Akufo-Addo na we yasubije kuri Twitter, ahishura ko ku itariki ya 7 y'uku kwezi kane, we na Bwana Dorsey bakoranye inama yo mu buryo bw'ikoranabuhanga ry'iyakure.

Bwana Addo yavuze ko kuba Twitter yahisemo Ghana ari "inkuru NZIZA CYANE" leta ya Ghana n'abaturage bayo bishimiye, igaragaza "icyizere kigirirwa igihugu cyacu".

Bwana Addo yongeyeho ati: "Iyi ni intangiriro y'ubufatanye bwiza hagati ya Twitter na Ghana, ikaba ari ingenzi ku iterambere ry'urwego rw'ikoranabuhanga rwa Ghana rw'ingirakamaro cyane".

Bamwe mu Banyafurika bakurikiranira hafi ikoranabuhanga bashobora kuba bacyekaga ko Twitter yashyira ibiro bikuru byayo by'Afurika muri Nigeria, Kenya cyangwa Afurika y'epfo kuko ibi bihugu bifite ibigo by'ikoranabuhanga biteye imbere kurushaho.

Ariko mu nyandiko yatangaje kuri Twitter, Bwana Dorsey yavuze ko kuba Ghana iherutse kugenwa ngo ibemo ubunyamabanga bw'isoko ritagira imipaka ry'Afurika (African Continental Free Trade Area) "bihuye n'intego yacu ikomatanyije yo kugaragara mu karere kazashyigikira umuhate wacu wo kuvugurura no kunoza serivisi yacu muri Afurika".