Igitero ku modoka itwara abanyeshuri mu Butaliyani cyaburijwemo n''intwari' yahamagaye polisi

Umwe mu banyeshuri b'abana bari mu modoka ya bisi yashimuswe hanyuma igahabwa inkongi mu Butaliyani, ari gushimwa n'abanyeshuri bagenzi be bari kumwe kubera kurokora abari muri iyo bisi bose.

Bivugwa ko iyo modoka ya bisi itwara abanyeshuri yashimuswe n'umushoferi wayo n'abanyeshuri b'abana 51 bari bayirimo hafi y'umujyi wa Milan, hanyuma akayiha inkongi.

Abana baganiriye n'ibitangazamakuru byo mu Butaliyani bavuze ko Ramy Shehata w'imyaka 13 y'amavuko yahishe telefone ye igendanwa ubwo uwo mushoferi yazamburaga abandi bana bagenzi be.

Nuko polisi iza guhamagarwa.

Umwe muri abo banyeshuri b'abana yagize ati: "Ni intwari yacu".

Bivugwa ko uwo mushoferi w'imyaka 47 y'amavuko, watangajwe ko yitwa Ousseynou Sy ufite ubwenegihugu bw'Ubutaliyani ariko akaba akomoka muri Senegali, yabanje kubwira abo banyeshuri b'abana ati: "Nta n'umwe uri burokoke".

Ibiro ntaramakuru Ansa by'Ubutaliyani bitangaza ko Ramy yahagamaye polisi ubwo yigiraga nkaho ari gusenga mu rurimi rw'Icyarabu - ariko ko mu by'ukuri yari ari kuburira se ko hari ibyago byendaga kubabaho.

Se wa Ramy yabwiye Ansa ko umuryango wabo wageze mu Butaliyani ukomotse mu Misiri, kandi ko Ramy yavutse mu mwaka wa 2005 - ariko ko atarigera ahabwa ubwenegihugu bw'Ubutaliyani.

Yagize ati: "Umuhungu wanjye yakoze ibyo yagombaga gukora, byaba byiza kuri ubu ahawe ubwenegihugu bw'Ubutaliyani. Twakwishimira gukomeza kuba muri iki gihugu. Ubwo nahuraga na we ejo, naramuhobeye cyane".

Imodoka za polisi zashoboye kumenya aho iyo bisi iherereye zirayigota bituma ihagarara mbere yuko uwo mushoferi, muri ubwo bushyamirane na polisi, ayikongeza nyuma yaho yari yamaze kuyimenaho lisansi.

Ikinyamakuru La Reppublica cyo mu Butaliyani gitangaza ko ibyuma byose byakoreshejwe mu kumena ibirahuri by'amadirishya y'inyuma y'iyi modoka byakuwe ku bushake kuri iyo modoka.

Nuko abo banyeshuri barokorwa batyo banyujijwe muri ayo madirishya.

Roberto Manucci, umupolisi wafashije muri ubwo butabazi, yagize ati: "Ikintu cyanyumije cyane kurusha ibindi byose ni aba bana... ubushake bwabo, imbaraga zabo zo kwirokora no gusohoka [mu modoka]".

Alberto Nobili, ukuriye ibikorwa byo kurwanya iterabwoba akaba akorera mu biro by'umushinjacyaha wa Milan, yavuze ko uyu ucyekwa atari yarigeze avuga ko akorana n'imitwe yaciwe muri iki gihugu.

Yabwiye abanyamakuru ko uyu ucyekwa yavuze ko cyari "icyemezo bwite" cye, ko atashoboraga gukomeza "kwihanganira kubona abana baribwa n'amafi mu nyanja ya Méditerranée ndetse n'abagore batwite bapfa" bagerageza kujya ku mugabane w'Uburayi.

Ibiro ntaramakuru Ansa bitangaza ko yafashe videwo ikubiyemo impamvu zabimuteye, ubu abakora iperereza bakaba bari kugerageza kuyibona bayikuye kuri konti y'ibanga yo ku rubuga rwa interineti.

Bwana Nobili avuga ko uyu ucyekwa yari asanzwe azwi na polisi kubera guhamwa n'icyaha cyo gufata ku ngufu - byamuviriyemo gufungwa umwaka umwe - ndetse no gutwara imodoka yanyoye.

Ubu hari kwibazwa impamvu uyu ucyekwa yemerewe kuba umushoferi utwara abanyeshuri mu gihe yari yarigeze guhamwa n'ibyaha nk'ibyo.