Cannoedd heb drydan ar ôl i eira a rhew gau ysgolion

Roedd dros 1,000 o gartrefi heb drydan am gyfnod ddydd Iau a nifer o ysgolion wedi cau ar ôl i eira a rhew daro rhannau o Gymru.

Roedd y Swyddfa Dywydd eisoes wedi cyhoeddi rhybudd melyn am eira a rhew fydd yn parhau mewn grym tan 23:59 nos Iau.

Mae'r rhybudd yn benodol i ardaloedd yn y de orllewin, ble roedd nifer o adroddiadau o drafferthion ar y ffyrdd ag amodau gyrru gwael.

Cafwyd cawodydd gaeafol drwy gydol y dydd wnaeth effeithio ar drafnidiaeth gyhoeddus ac amodau gyrru.

Mae'r tywydd hefyd wedi effeithio cyflenwadau trydan, gyda'r Grid Cenedlaethol yn adrodd bod dros 300 o dai dal heb drydan ar draws Sir Benfro, Sir Gâr a Blaenau Gwent erbyn 19:00.

Yn ogystal â'r eira trwm yn tarfu ar drenau, mae Trafnidiaeth Cymru wedi cadarnhau bod coeden wedi cwympo ger Llanboidy yn rhwystro'r llinell, ac maen nhw'n annog cwsmeriaid i wirio'u gwefan cyn teithio.

Mae'r Swyddfa Dywydd hefyd wedi cyhoeddi rhybudd melyn am rew i rannau helaeth o ogledd orllewin a de orllewin Cymru fore Gwener.

Bydd y rhybudd hwn mewn grym rhwng hanner nos ac 11:00 - gydag arbenigwyr yn annog pobl i wirio'r wybodaeth ddiweddaraf cyn teithio.

Dywedodd Sharlaine Quick-Lawrence o Grymych ei bod yn teimlo bod y pentref "yn mynd i ddarnau" pan mae eira'n taro, a'u bod ddim yn cael eira "digon aml falle i fod wedi gallu paratoi ar gyfer e", gan ddisgrifio'r sefyllfa ar y ffyrdd fel "bach o bedlam".

Ond i eraill yn y pentref, mae'n gyfle i fwynhau'r eira. Dywedodd Helen Mcloughlin mai "2020 oedd y tro diwetha i ni gael eira mawr yma".

"Mae'n neis bod popeth ar gau a ni'n cael aros gartre. Cerddon ni lan [Foel Drigarn] a ni wedi gweld pobl yn sgio lawr."

Roedd Mali, 15 oed, hefyd yn gwerthfawrogi'r olygfa, gan ddisgrifio'r sefyllfa fel "Chaos! Ond chaos da…Mae'n neis i weld pawb yn joio yn yr eira a'r gymuned yn dod at ei gilydd."

Wrth siarad ar Dros Frecwast fore Iau, dywedodd y cynghorydd Shon Rees, sydd hefyd yn rhedeg cwmni bysys yng Nghymrych, mai "hwn yw'r mwya' o eira dwi wedi gweld ym mhentref Crymych yn yr 20 mlynedd ddiwethaf".

"Mae pobl yn mynd i edrych mas bore 'ma a meddwl ydy hi'n saff mynd? Bydden i'n argymell i unrhyw un i aros adref heddiw."

Ychwanegodd fod yr "amodau gyrru yn ofnadwy o wael.

"Bydden i'n dweud wrth unrhyw un os nad ydych chi'n gorfod gyrru heddiw, bydden i'n aros adref nes bod pethau'n gwella achos mae'r amodau yn ofnadwy."

Fe ddisgrifiodd y sefyllfa fel un "go fregus" gyda "phob un yn argoeli y bydden ni'n cael rhyw 10cm o eira ac mae 'na 20 modfedd o eira fan hyn yng Nghrymych ei hunan."

Mae nifer o ysgolion wedi gorfod cau ddydd Iau oherwydd yr amodau gwael.

Sir Benfro

Mae modd i chi weld y diweddaraf ynghylch yr ysgolion sydd wedi cau ar wefan Cyngor Sir Benfro yma., dolen allanol

Sir Gaerfyrddin

Mae modd i chi weld y diweddaraf ynghylch yr ysgolion sydd wedi cau ar wefan Cyngor Sir Gaerfyrddin yma, dolen allanol.

Ceredigion

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.