Eira a rhew mewn rhannau o Gymru wrth i'r tymheredd ostwng

Mae yna eira a rhew mewn rhannau o Gymru ddydd Mercher ac mae disgwyl diwrnod tebyg ddydd Iau wrth i'r tymheredd ostwng.

Mae Heddlu Dyfed-Powys wedi dweud bod cyflwr y ffyrdd yn wael iawn ar draws y B4329 o New Inn i Ffynnon-groes yn sgil yr eira.

Y rhybudd yw i bobl deithio ar lwybr gwahanol os yn bosibl, neu i gynllunio bod amser ychwanegol a gyrru'n ddiogel.

Mae Traffig Cymru hefyd wedi rhybuddio bod eira wedi yn disgyn yn annisgwyl ledled Ynys Môn, gan ddweud y gallai hyn achosi llif traffig araf, ffyrdd llithrig a rhwystrau rhwydwaith.

Yn ôl adroddiadau eraill, mae yna eira hefyd ar yr A5 rhwng Capel Curig a Bethesda ac yn ardal Llyn Brenig yn Sir Ddinbych.

Roedd y Swyddfa Dywydd eisoes wedi rhybuddio bod eira'n bosib yn y gorllewin wrth i aer oer o'r Arctig gyrraedd rhannau o'r DU.

Cafodd y rhybudd melyn gwreiddiol am eira ei ehangu i rybudd rhag rhew ac mae'n effeithio ar fannau yng Ngheredigion, Sir Gâr, Sir Benfro ac Abertawe.

Daeth i rym am 12:00 ddydd Mercher ac mae'n para tan 23:59 nos Iau.

Bu o leiaf un o ffyrdd y gogledd ar gau am gyfnod oherwydd eira - y B4391 yn ne Gwynedd, rhwng yr A496 [Rhyd Y Sarn] ac yr A470 Pen Y Bryn [Ffestiniog].

Mae'r ffordd honno wedi ailagor bellach.

Mae disgwyl i gawodydd gaeafol ledu tua'r de, gan gyrraedd mannau mewndirol yn sgil y gwyntoedd o'r gogledd.

Ym mannau'r cawodydd mwyaf cyson mae disgwyl 2-5cm o eira ac hyd at 10cm mewn ambell fan yn enwedig ar fryniau dros 200m o uchder yn Sir Benfro a gorllewin Sir Gâr.

Mae yna berygl o rew pe bai eira'n dadmer yn rhannol ac yna'n ail-rewi dros nos.

Fe allai'r amodau achosi problemau gan gynnwys ffyrdd, llwybrau a phalmentydd llithrig, trafferthion i yrwyr a theithwyr a thoriadau trydan a all effeithio ar ddefnyddio ffonau.

Dywedodd y Swyddfa Dywydd bod disgwyl cawodydd glaw dros nos, gyda'r posibilrwydd o eira ar y bryniau, a bod risg o rew ar ffyrdd nad sydd wedi eu graeanu wrth i'r tymheredd ostwng tua'r rhewbwynt.

Fe ddaw'r tywydd oer ddiwrnodau wedi i Storm Claudia achosi llifogydd yn rhannau o Gymru.

Bu'r difrod gwaethaf yn ardal Trefynwy, a welodd fis o law mewn cyfnod byr.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.