Merched y Môr hanner ffordd i Antigua

Er gwaethaf wynebu tonnau 20 troedfedd, gorflinder a salwch y môr, mae tîm rhwyfo Merched y Môr wedi cyrraedd hanner ffordd yn Ras Rhwyfo Anoddaf y Byd ar draws Cefnfor yr Iwerydd.

Ar ôl dechrau o Tenerife bron i fis yn ôl, mae'r criw benywaidd cyntaf erioed o Gymru wedi rhwyfo dros 1,400 o filltiroedd yn eu cwch, Cariad, ar y ffordd i Antigua.

Mae'r tîm o bedair menyw o Sir Benfro - Denise Leonard, Helen Heaton, Heledd Williams a Liz Collyer - wedi bod yn rhwyfo yn ddi-baid mewn 'shifftiau' o ddwy awr yn rhwyfo, dwy awr yn gorffwys am 24 awr bob dydd, a hynny heb unrhyw gymorth.

Ond mae Heledd Williams o Drefdraeth yn bositif iawn am siwrne'r criw wrth iddi siarad gyda'r BBC hanner ffordd drwy'r daith:

"Mae popeth yn mynd yn grêt. Mae'r coesau a'r breichiau'n iawn, mae ambell i beth yn dechrau bod yn boenus, ond ni'n gwneud yn dda."

Mae'r criw wedi bod ar y môr ers bron i fis bellach, meddai Heledd, sy'n weithiwr cymdeithasol o ran swydd.

"Mae wedi bod yn anodd. Y peth anoddaf, dwi'n credu, oedd ar ddechrau'r daith.

"Mae'r salwch môr wedi bwrw ni gyd, diffyg cwsg yn amlwg ac mae wedi hala sbel fach i'r corff dod i ymarfer a bod ar ddihun. Ni'n rhwyfo 12 awr y dydd."

Dywedodd un arall o'r criw, Helen Heaton, pa mor anodd yw'r rhwyfo yn y nos:

"Dydyn ni ddim yn gallu gweld unrhyw beth. Ni'n gallu teimlo'r môr yn codi ac yn clywed y tonnau'n rhuo ond ni'n methu gweld ble maen nhw, nes iddi nhw dorri dros y cwch a gwlychu ni."

Ond mae digon o fywyd gwyllt i godi calon ar hyd y ffordd, fel mae Heledd yn esbonio: "Ni wedi cael sawl pod o dolffiniaid yn dilyn ni, yn aros gyda ni.

"Un uchafbwynt oedd morfil yn dod a oedd e gyda ni am siŵr o fod 2-3 awr. Mae aderyn bach, stone petrel, wedi bod gyda ni ers yr ail ddiwrnod a ni wedi galw fe'n Tegwyn.

"Mae'n dod rhyw dri i bedwar gwaith y dydd."

Mae'r criw wedi bod ar y môr dros y Nadolig a'r flwyddyn newydd gan ddathlu drwy fwyta cacen Nadolig ac agor anrhegion gan eu teuluoedd adref.

Ond roedd hi'n ddiwrnod gwahanol iawn i'r ŵyl arferol, yn ôl Heledd: "Roedd Nadolig 'ma yn wahanol iawn - ond mae mor brydferth yma a'r awyr mor glir. Oedd anrhegion hyfryd gan deulu a playlist Nadoligaidd i gael ni mewn i'r mŵd!

"O'n ni'n amlwg yn gweld eisiau teulu, o'n ni'n meddwl, beth sy mlaen gyda nhw nawr? Ody nhw'n bwyta twrci neu'n eistedd o flaen tân? Roedd e'n anodd ond 'nathon ni'r gorau ohoni allen ni."

Mae yna 43 o griwiau yn y ras gyda naw criw benywaidd ac mae'r gwynt yn hwyliau Merched y Môr wrth iddyn nhw godi i'r pumed safle yn eu grŵp yr wythnos yma.

Dywedodd Heledd: "Mae'r safleoedd yn newid bob dydd. Ambell waith ni'n chweched, ni'n bumed, ond mae'r cwrs ni'n cymryd yn cael effaith mawr ar y safle.

"Ni wedi mynd lawr am y de, a nawr ni'n mynd am y gorllewin. Mae lot o'r timoedd eraill wedi mynd am y gorllewin, ac wedyn yn newid cwrs. Felly it's anyone's game, fel maen nhw'n dweud."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.