'Methu stopio gwenu': Gosod mainc i gydnabod dewrder dynes o Gaernarfon

Mae dynes o Gaernarfon yn dweud ei bod "methu stopio â gwenu" ers clywed bod mainc barhaol yn cael ei gosod yn y dref i ddathlu ei henw.

Cafodd Sarah Tyler-Davies ataliad ar y galon 15 mlynedd yn ôl pan oedd hi'n 30 oed.

Mae'r meinciau coch gyda phlaciau aur arnyn nhw yn anrhydeddu pobl sydd wedi goroesi cyflyrau ar y galon.

Elusen y British Heart Foundation [BHF] sydd yng ngofal y meinciau ac mae 65 wedi'u gosod hyd yn hyn, i ddathlu 65 mlynedd ers iddyn nhw ddechrau ariannu ymchwil i achub bywyd.

Wrth siarad ar Dros Frecwast fore Iau, dywedodd Sarah y bydd y fainc "tu allan i walia' G'narfon" ym Mharc Coed Helen.

Mae pob mainc yn cynrychioli stori unigol ac esboniodd Sarah, pan gafodd hi wybod ei bod wedi cael ei dewis - yr unig un yng ngogledd Cymru - ei fod yn brofiad "cwbl anhygoel".

Cafodd ei geni gyda nam cynhenid ​​ar y galon ac roedd hi'n "pendwmpian ar y soffa" flynyddoedd yn ddiweddarach pan sylweddolodd fod rhywbeth o'i le.

Dim ond wyth a naw oed oedd plant Sarah ar y pryd ac roedden nhw yn eu gwlâu.

"Nath y ci ddeffro'r gŵr fatha bod rhywbeth yn bod, felly lwcus am y ci mewn ffor'.

"Nath Aled wedyn roi CPR i fi, ffonio ambiwlans a dwi yma i ddeud y stori ac ma'r fainc 'ma just am fod yn wbath hiwj," ychwanegodd Sarah.

Dyw Sarah ddim yn cofio unrhyw beth am y digwyddiad ei hun ond dywedodd ei gŵr wrthi fod ei gwefusau yn las yn ystod yr argyfwng.

Mae hi'n credu bod "rhywun yn edrych i lawr arna i" ar y noson honno.

Dim ond dau funud i ffwrdd yng Nghaernarfon roedd yr ambiwlans ac mi gysgodd ei phlant trwy'r cyfan.

Cafodd ei chludo i Ysbyty Gwynedd wedi hynny a'i rhoi mewn "induced coma", gan fod ei chalon yn curo 350-400 curiad y funud.

Mae Sarah bellach yn nain ac yn teimlo mor lwcus ar ôl y digwyddiad.

Er y blynyddoedd sydd wedi pasio dydy hi dal ddim yn hawdd siarad am y profiad hyd heddiw, meddai.

Ond ychwanegodd ei bod hi'n teimlo ei bod hi'n "hynod bwysig" siarad amdano gan bod hynny yn help i brosesu'r trawma a hefyd yn helpu eraill sy'n mynd trwy'r profiad.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.